22. यूहन्ना का जनम

भूतकाल में, परमेश्वर ने अपने भविष्यद्वक्तानाउन से बात करे होतीस एकेगुना ही लोगनाऊन से बात कर सके। पर वा समय से लेके फिर 400 साल के बीतन तक ओने हुनके से बात नी करीस। तब परमेश्वर ने जकर्याह नाम के भविष्यद्वक्तानाउन के जवर एक स्वर्गदूत को भेजिस। जकर्याह अऊर ओकी लुगाइन एलीशिबा परमेश्वर को आदर करत होतीन। ही बहुत बुडगे भय गइतीन होतीन, अऊर ओकी कोई संतान उत्पन्न नी होती।

हु स्वर्गदूत ने जकर्याह से कहिस, "तोरी लुगाइन को एक टूरा पैदा होये। तू ओको नाम यूहन्ना रखबेन। परमेश्वर ओको पवित्र आत्मा से पूरा भरे, अऊर यूहन्ना लोगनाउन को मसीह को ग्रहण करन के गुना तैयार करे।" जकर्याह ने उत्तर देइस, "मय अऊर मोरी लुगाइन संतान पैदा करन के गुना बहुत बुडगे हन! मय कसो जानूँ कि तू मोरे से सच कह रहे हस?"

हु स्वर्गदूत ने जकर्याह को उत्तर देइस, "तोरो जवर या सजरो खबर को लान के गुना मय परमेश्वर के किना से भेजो गऐम हम। कायाकि तूने मोरो पे विश्वास नी करेस, एकेगुना टूरा के जनम लेन तक तू बोलन के गुना सक्षम नी होबेन।" तुरन्त च, जकर्याह बोलने में असमर्थ रहीस। अऊर तब हु स्वर्गदूत जकर्याह के जवर से चलो गइस। एके बाद, जकर्याह घर चले गइस अऊर ओकी लुगाइन गर्भवती भइ।

जब एलीशिबा छे महीना की गर्भवती होती, तो हुच स्वर्गदूत अचानक से एलीशिबा की रिश्तेदार पे प्रकट भइस, जेको नाम मरियम होतीस। मरियम कुँवारी होती अऊर बिहाव होने के गुना यूसुफ नाम के एक मानुष के संग ओकी सगाई भय गइ होती। स्वर्गदूत ने कहिस, "तू गर्भवती होबेन अऊर एक टूरा को जनम देबेन। तू ओको नाम यीशु रखना रखबेन। हु सर्व-शक्तिमान परमेश्वर को टूरा होये अऊर हु हमेशा के गुना राज्य करे।"

मरियम ने जवाब देई, "यो कसो हो सकते, कायाकि मय तो कुँवारी हम?" हु स्वर्गदूत ने समझाइस, "पवित्र आत्मा तोरो पे आये, अऊर परमेश्वर की शक्ति तोरे पे छा जाये। एकेगुना हु टूरा पवित्र होये, अऊर हु परमेश्वर का टूरा होये।" जो हु स्वर्गदूत ने कहिस ओके पे मरियम ने विश्वास करी।

यो बात होने के तुरन्त बाद, मरियम ने जायके एलीशिबा से मुलाकात करी। जसीच मरियम ने ओको नमस्कार करी, एलीशिबा का बच्चा ओकी पेट में उछलीस। हुनके गुना परमेश्वर ने जो करे होतीस ओकी बारे में कई बाईनाऊन मिलके आनन्दित भइन। एलीशिबा के संग तीन महीने रहन के बाद, मरियम घर लौट चली गई।

एके बाद, एलीशिबा ने अपने टूरा को जनम देइ। जकर्याह अऊर एलीशिबा ने हु टूरा को नाम यूहन्ना रखीन, जसो कि हु स्वर्गदूत ने आदेश देये होतीस। तब परमेश्वर ने जकर्याह को बोलन में सक्षम करीस। जकर्याह ने कहिस, "परमेश्वर की स्तुति हो, कायाकि ओने अपने लोगनाऊन की मदत करन को याद रखीस हय! हे मोरे टूरा, तू सर्व-शक्तिशाली परमेश्वर को भविष्यद्वक्ता होबेन। अऊर तू लोगनाऊन को बताबेन कि ही कसे अपने पापनाऊन के गुना माफ़ी मांग सकतत! "