36. यीशु को रूप बदलनो (रूपान्तरण)

एक दिन, यीशु ने अपने तीन चेला, पतरस, याकूब, अऊर यूहन्ना को अपने संग में ले गइस। (यो यूहन्ना नाम को मानुष हु चेला नोहय जेने यीशु को बपतिस्मा देहे होतीस।) ही प्रार्थना करन के गुना एक ऊँचे पहाडी पे गइन।

जब यीशु प्रार्थना करत होतीस तो ओको चेहरा सूरज के सारखो चमकदार भय गइस। ओके कपडा उजालो के सारखो पांढ़रो भय गइस, जसो धरती पे कोई कर सकते ओके से भी जादा पांढरो।

तब मूसा अऊर एलिय्याह भविष्यद्वक्ता प्रकट भइन। ही मानुष या धरती पे या समय से सेकड़ों साल पहले रहत होतीन। हुनने यीशु से ओकी मरन के बारे में बात करीन, कायाकि हु जल्दी से यरूशलेम में मर जाए।

जब मूसा अऊर एलिय्याह यीशु से बात करत होतीन तब पतरस ने यीशु से कहिस, "हमारो यहाँ पे रहनो साजरो हय। हम तीन मंडा बनाबोन, एक तोरे गुना, एक मूसा के गुना, अऊर एक एलिय्याह के गुना।" पर पतरस नी जानत होतीस कि हु का कह रहीस हय।

जब पतरस बात करत होतीस, तो एक चमकदार बादल ने खाल्ले आयके हुनके पे छा गइस। फिर हुनने बादल में से एक आवाज को आते हुए सुनीन। ओने कहिस, "यो मोरो टूरा आय जेके से मय प्यार करतम। मय ओके खुश हम। ओकी सुनो।" ही तीनाई चेला डर गइन अऊर जमीन पे लेट गइट।

तब यीशु ने हुनको छुइस अऊर कहिस, "डरो मत। उठ जाओ।" जब हुनने चारइ किना देखीन, तो जो भी वहाँ होतीस हु सिरिफ यीशु होतीस।

यीशु अऊर ही तीनाई चेला वा पहाडी से वापस खाल्ले उतर आइन। तब यीशु ने हुनके से कहिस, "अभी जो यहाँ भइस ओकी बातचीत कोइ से मत करने। मय जल्दी से मर जाऊँ अऊर फिर से जिन्दो हो जाऊँ। ओके बाद, तुम सप्पाई लोगनाऊन को बता सकतव।"