1. रचना

इस तरिक्के परमेश्वर ने सुरुआत विच्च सारी चिज्जाँ री रचना कित्ती। उनिये छे दिनां विच्च संसार री अते जे किच्छ उस विच्च है उन्हा सारी चिज्जाँ री रचना कित्ती | परमेश्वर रे धरती बनाणे रे बाद धरती बिलकुल न्याहरी अते खाली थी, किजोकी हाली तांइ परमेश्वर ने उस विच्च कुस्की भी चीज जो नी बणाया थिया। पर परमेश्वर रा आत्मा पाणी रे उपर मण्डरांदा थिया।

फिरी परमेश्वर ने बोल्लेया,” रौसनी होई जाए!” अते रौसनी होई गेई। परमेश्वर ने दिख्खेया की रौसनी खरी है अते उसजो “दिन” बोल्लेया| अते उनिये रौसनी जो न्याहरे का अलग कित्तेया जिसजो उनिये “रात” बोल्लेया। परमेश्वर ने रचना रे पैल्ले दिन विच्च रौसनी री रचना कित्ती।

रचना करणे रे दुज्जे दिन विच्च परमेश्वर ने बोल्लेया,”पाणी रे उप्पर इक्क अंतर हो|” अते इक्क अंतर होई गेया| परमेश्वर ने उस अलग कित्ते रे अंतर जो “आसमान” बोल्लेया|

तिज्जे दिन विच्च परमेश्वर ने बोल्लेया, “पाणी इक्क जगह पर इकठ्ठा होई जाए अते सुक्की जमीन लिब्बे|” उनिये सुक्की जमीन जो “धरती” बोल्लेया अते पाणी जो “समुन्द्र” बोल्लेया। परमेश्वर ने दिख्खेया कि जे उनिये बणाया थिया सेह् सब खरा है।

फिरी परमेश्वर ने बोल्लेया,”धरती सब नसल रे बूट्टे अते पौधे उगांए|” अते इयां ही होया। परमेश्वर ने दिख्खेया कि जे उनिये बणाया थिया सेह् खरा है|

रचना रे चौथे दिन विच्च परमेश्वर ने बोल्लेया,”आसमान विच्च रौसनी दैणे वाली ज्योतियां हो|” अते सूरज,चाँद अते तारागण लिब्बे। परमेश्वर ने उन्हा जो धरती पर रौसनी दैणे तांइ दिन अते रात, मौसम अते साल रे विच्च फरक करणे तांइ बणाया।

पंज्जमें दिन परमेश्वर ने बोल्लेया,” पाणी जिंदे प्राणी कने भरी जाण अते आसमान विच्च पक्सी उडण।” इस तरिक्के कने उनिये पाणी विच्च तैरेणे वाले सब जन्तु अते पक्सियां जो बणाया, परमेश्वर ने दिख्खेया की ए खरा थिया अते उन्हा जो असीस दित्ती।

रचना रे छठ्ठे दिन विच्च परमेश्वर ने बोल्लेया,”धरती पर रैह्णे वाले सारे जानवरां कने भरी जाए।” अते परमेश्वर री बोल्ली री गल्लां रे हिसाब कने इयां ही होई गेया। किच्छ जानवर पालतू थिये, किच्छ जमीन पर रेंगणे वाले, अते किच्छ जंगली जानवर थिये। अते परमेश्वर ने दिख्खेया की ए खरा थिया।

फिरी परमेश्वर ने बोल्लेया,”आओ असी मणू जो अपणी ही छवि विच्च अते अपणे साईं बनांए| सेह धरती पर अते सब्ब जानवरां पर राज करगे|

अते परमेश्वर ने मिट्टी लेई करी उस का मणू जो बणाया अते उस विच्च जिंदगी रे साह् पाई दित्ते। इस मणू रा नाम आदम थिया। परमेश्वर ने आदम रे रैह्णे तांइ इक बड्डे बगीच्चे जो बणाया अते उसेरी देखभाल तांइ आदम जो उत्ते रख्खी दित्तेया।

उस बगीचे रे मझाटे विच्च परमेश्वर ने दो बूट्टे लगाए-जिंदगी रा बूट्टा अते भले अते बुरे रे ज्ञान रा बूट्टा। परमेश्वर ने आदम जो बोल्लेया कि सेह् उस बगीच्चे रे जिंदगी रे बूट्टे अते भले अते बुरे रे ज्ञान रे बूट्टे जो छड्डी करी बाकि कुस्की भी बूट्टे रे फल जो खाई सकदा। जे उनिये उस बूट्टे रा फल खाया ता तिनिये मरी जाणा।

फिरी परमेश्वर ने बोल्लेया,”मरद तांइ कल्ला रैह्णा खरा नी है।” पर कोई भी जानवर आदम रा साथी नी बणी सकेया।

इधेरे तांइ परमेश्वर ने आदम जो गैहरी निंद्र विच्च पाई दित्तेया। फिरी परमेश्वर ने आदम री इक्क पसली लेई करी उस विच्च का इक्क जनानी बणाई अते उसजो आदम का लेई आया।

जां आदम ने उस्जो दिख्खेया ता उनिये बोल्लेया.“घाट का घाट ए ता मेरे सांइ है! इसजो ‘जनानी’ बोल्लेया जाणा, किजोकी ए मरद विच्च का बणाई गेरी है। इस वजह कने मरद अपणे माँ-प्यो जो छड्डी दिंदा अते अपणी लाड़ी कने इक्क होई जांदा।

परमेश्वर ने मरद अते जनानी जो अपणे सांइ बणाया। उनिये उन्हा जो असीस दित्ती अते उन्हा जो बोल्लेया, “मते सारे बच्चे अते पौत्रु-धियायोत्रु पैदा करो अते धरती जो भरी दो!” अते परमेश्वर ने दिख्खेया कि जे किच्छ भी उनिये बणाया थिया सेह् बड़ा छैल थिया, अते सेह् उन सब का बड़ा खुस थिया। ए सब किच्छ रचना करणे रे छठ्ठे दिन होया थिया|

जां सतमां दिन आया ता जे किच्छ परमेश्वर करेया करदे थिये उनिये उन सारे कम्मां जो पूरा कित्तेया। उनिये सतमें दिन जो असीस दित्ती अते उसजो पवित्तर ठैहराया, किजोकी उस दिन उनिये सब चिज्जाँ री रचना करणे रे काम्म जो खत्म कित्तेया थिया। इस तरिक्के परमेश्वर ने दुनियां री अते जे किच्छ उस विच्च है उन्हा सबना री रचना कित्ती। उत्पत्ति अध्याय 1-2 से बाइबल की एक कहानी उत्पत्ति अध्याय 1-2 का बाइबल री इक्क कहाणी