2. दुनियां विच्च पाप री सुरुआत

आदम अते उसेरी लाड़ी परमेश्वर रे जरिये बणाए रे छैल बगीचे विच्च रेह्ई करी बड़े खुस थिये। उन्हा विच्च का कोई भी कपड़े नी पांदा थिया, फिरी भी इस गाल्ल ने उन्हा विच्च का कुस्की जो भी शर्मिंदा नी कित्तेया थिया, किजोकी दुनियां विच्च पाप नी थिया। सेह् अक्सर उस बगीच्चे विच्च घुमदे-फिरदे थिये अते परमेश्वर कने गल्लां करदे थिये।

पर उस बगीच्चे विच्च इक्क साँप थिया। सेह् बड़ा चलाक थिया| उनिये उस जनानी का पुच्छेया,”कै सच्ची विच्च परमेश्वर ने तिज्जो इस बगीच्चे रे कुस्की भी बूट्टे रे फल खाणे का मन्हा कित्तेया है?

उस जनानी ने जवाब दित्तेया,“परमेश्वर ने असा जो बोल्लेया है कि असी भले अते बुरे रे ज्ञान रे बूट्टे रे अलावा कुस्की भी बूट्टे रे फल जो खाई सकदे हिन। परमेश्वर ने असा जो बोल्लेया है कि जे तुसा ने उस फल जो खाया या उसजो छुत्तेया भी, ता तुसी मरी जाणा।”

उस साँप ने जनानी जो जवाब विच्च बोल्लेया,”ए सच्च नी है! तुसा नी मरणा। परमेश्वर जाणदा कि जियां ही तुसी उस फल जो खांगे, ता तुसी परमेश्वर रे सांइ होई जाणा अते उसेरे सांइ भले अते बुरे जो समझणा लगी पैणा।

उस जनानी ने दिख्खेया की सेह् फल मन जो छुई जाणे वाला थिया अते सुआद लगेया करदा थिया| सेह् भी समजदार बणना चांह्दी थी, इधेरे तांइ उनिये फल तोड़ी करी खाई लित्तेया। फिरी उसने अपणे लाड़े जो जे उसेरे कने थिया सेह् फल दित्तेया अते उनिये भी खाई लित्तेया।

इक्कदम ही, उन्हेरी हाख्खियाँ खुली गेई, अते उन्हा जो पत्ता लगेया कि सेह् नंगे हिन। उन्हा ने पत्तेयाँ जो इकठ्ठे बुणी करी उन्हेरे कपड़े बणाई करी अपणे सरीर जो ढकणे री कोसिस कित्ती।

तां मरद अते उसेरी लाड़ी ने उस बगीच्चे विच्च परमेश्वर जो घुमदे होए उन्हेरी अवाज जो सुणेया| सेह् दोन्नों परमेश्वर का लुकी गे| तां परमेश्वर ने मरद जो आवाज लगाई,“तू कुते है?” आदम ने जवाब दित्तेया,”मैं तुसा जो बगीच्चे विच्च घुमदे-फिरदे होए सुणेया, अते मैं डरी गेया थिया, किजोकी मैं नंगा थिया। इधेरे तांइ मैं लुकी गेया।

फिरी परमेश्वर ने पुच्छेया, “तिज्जो कुसने दस्सेया कि तू नंगा है? कै तू सेह् फल खाया जिसजो खाणे तांइ मैं तिज्जो मन्हा कित्तेया थिया?” मरद ने जवाब दित्या,” तुसा ने जे जनानी मिंजो दित्ती इनिये ही मिंजो ए फल दित्तेया|” तां परमेश्वर ने जनानी का पुच्छेया, “तैं ए कै कित्तेया?” तिस जनानी ने बोल्लेया,” साँप ने मिंजो धोख्खा दित्तेया|”

परमेश्वर ने साँप जो बोल्लेया,“तू शापित है! तू अपणे पेट रे भारे लेटगा अते मिट्टी चटगा। तू अते इस जनानी ने इक्क दुज्जे का नफरत करणी, अते तेरे बच्चे अते उसेरे बच्चेयाँ ने भी इक्क दुज्जे का नफरत करणी। इस जनानी रे वंश ने तेरे सिर जो कुचलणा, अते तू उसेरी ऐड़ी जो ड़सणा|”

तां परमेश्वर ने जनानी जो बोल्लेया,“मैं तेरे बच्चे जमणे रे वक्त जो बड़ा तकलीफदायक करणा। तू अपणे लाड़े कने लालसा करणी, अते तिस ने तेरे पर राज करणा।

परमेश्वर ने मरद जो बोल्लेया,“तैं अपणी लाड़ी री सुणी अते मेरे हुकम जो नी मन्नेया। इधेरे तांइ जमीन शापित होई, अते तिज्जो खाणे री चिज्जाँ उगाणे तांइ बड़ी जादा मैहनत करणा पैणी। अवे तू मरी जाणा, अते तेरा सरीर मिट्टी विच्च मिली जाणा।” उस मरद ने अपणी लाड़ी रा नां हव्वा रख्खेया, जिसेरा मतलब,“जिंदगी दैणे वाली”, किजोकी सेह् सब जातियां री माँ हूणी| अते परमेश्वर ने आदम अते हव्वा जो जानवर री चमड़ी का बणे रे कपड़े पुआए।

फिरी परमेश्वर ने बोल्लेया, “अवे भले अते बुरे जो जाणने कने मणू असा सांइ होई गेरा है, इधेरे तांइ उन्हा जो उस जिंदगी रे बूट्टे रे फल जो खाणे नी दैणा चंहिदा ताकि सेह् हमेसा तांइ जिंदे रैह्ण|” इधेरे तांइ परमेश्वर ने आदम अते हव्वा जो उस बगीच्चे का बार निकाली दित्तेया। अते परमेश्वर ने कुस्की जो भी उस जिंदगी रे बूट्टे रे फल जो खाणे का रोकणे तांइ उस बगीच्चे रे दरवज्जे पर सक्तिसाली स्वर्गदूतां जो बिठाई दित्तेया। उत्पत्ति अध्याय 3 से एक बाइबल की कहानी उत्पत्ति अध्याय 3 का इक्क बाइबल री कहाणी