3. बाढ़

बड़े वक्त बाद, दुनियां विच्च बड़े सारे मणू रैंह्दे थिये। सेह् बड़े दुष्ट अते बागी होई गे थिये। ए इस हद तक बुरा थिया कि परमेश्वर ने इक्क बड्डी बाढ़ कने इस पूरी दुनियां जो खत्म करणे रा फैसला लित्तेया।

पर परमेश्वर नूह का खुस थिया। सेह् दुष्ट मणुआं रे विच्च रैह्णे वाला इक्क नेक मणू थिया। परमेश्वर ने नूह जो दस्सेया कि सेह् इक्क बड्डी बाढ़ जो लियाणे वाला है। इधेरे तांइ, उनिये नूह जो इक्क बड्डी किस्ती बणाणे जो बोल्लेया।

परमेश्वर ने नूह जो लगभग 140 मीटर लम्बी, 23 मीटर चौड़ी अते 13.5 मीटर उच्ची किस्ती बणाणे जो बोल्लेया। नूह ने उसजो लकड़ी कने बणाणा थिया अते उस विच्च तिन तल, मत्ते सारे कमरे, इक्क छात्त अते इक्क खिड़की बणाणी थी। तिस किस्ती ने नूह, उसेरे परिवार, अते जमीन रे हर नसल रे जानवरां जो उस बाढ़ का महफूज रखणा|

नूह ने परमेश्वर री गाल्ल मन्नी। उसने अते उसेरे मुन्डेयाँ ने तदेयी ही किस्ती बणाई जदेयी परमेश्वर ने बोल्लेया थिया। किजोकी सेह् किस्ती बड़ी बड्डी थी इधेरे तांइ उसजो बणाणे विच्च बड़े साल लगी गे। नूह ने मणुआं जो आणे वाली बाढ़ रे बारे चेतावनी दित्ती अते उन्हा जो परमेश्वर रे पास्से फिरणे तांइ बोल्लेया, पर उन्हा ने उस पर भरोसा नी कित्तेया।

परमेश्वर ने नूह अते उसेरे टब्बर जो अपणे अते जानवरां तांइ खाणे री चिज्जाँ जो इकठ्ठा करणे रा हुकम भी दित्तेया। जां सब किच्छ तियार थिया, तां परमेश्वर ने नूह जो बोल्लेया कि ए वक्त उसेरे, उसेरी लाड़ी, उसेरे तिन मुन्डे, अते उन्हेरी लाड़ियां जो मिलाई करी कुल आठ्ठ जणे जो किस्ती विच्च जाणे रा थिया|

परमेश्वर ने हर जानवर अते पक्सी रे नर अते मादा जो नूह का भेजेया ताकि सेह् किस्ती विच्च जाई सकण अते बाढ़ रे वक्त महफूस रेह्ई सकण। परमेश्वर ने इदेये हर नसल रे सात्त नर अते मादा जो भेजेया, जिन्हा जो बलि चढ़ाणे रे वक्त इस्तेमाल कित्तेया जाई सके। जां सेह् सारे किस्ती विच्च पुज्जी गे तां परमेश्वर ने अप्पु किस्ती रा दरवज्जा बांद्द करी दित्तेया।

तां बरख्खा लगणा सुरु होई, अते बरख्खा हूंदी गेई, हूंदी गेई। चाली दिन अते चाली रातां तांइ बिना रुके बरख्खा हूंदी रेह्ई। पूरी दुनियां री हर इक्क चीज, इत्ते तांइ की उच्चे का उच्चे पहाड़ भी पाणी विच्च डुबी गे।

सूक्की जमीन पर रैह्णे वाली हर इक्क चीज मरी गेई, उन्हा मणुआं अते जानवरां जो छड्डी करी जे किस्ती विच्च थिये। सेह् किस्ती पाणी पर तैरदी रेह्ई अते किस्ती रे अंदर री हर इक्क चीज डुबणे का बची रेह्ई।

बरख्खा रे रुकणे रे बाद, पांज्ज महीने तांइ सेह् किस्ती पाणी पर तैरदी रेह्ई, अते उस वक्त रे दौरान पाणी घटणे लग्गेया थिया। तां इक्क दिन सेह् किस्ती इक्क पहाड़ री चोटी पर टिकी गेई, पर दुनियां हल्ले भी पाणी कने ढक्के री थी। तिन महीने रे बाद, पहाड़ां री चोटियां लिब्बणा लगी थिया।

फिरी होर चाली दिनां बाद, नूह ने इक्क काह् जो ए दिख्खणे तांइ बार भेज्जेया कि कै पाणी सुक्की गेया कि नी। सेह् काह् सुक्की जमीन री तोप विच्च इत्ते-उत्ते उड़दा रेह्या, पर उसजो इदेयी कोई जगह नी मिल्ली।

फिरी बाद विच्च नूह ने इक्क कबूतरी जो बार भेजेया| पर उसजो भी कोई सुक्की जमीन नी मिली, इधेरे तांइ सेह नूह का वापस आई गेई। इक्क हफ्ते बाद उनिये उस कबूतरी जो फिरी भेजेया, अते सेह् अपणी चोंच विच्च इक्क जैतून री डाली लेई करी वापस आई। पाणी घट्टेया करदा थिया, अते बूट्टे फिरी का उगणा लगे थिये।

नूह ने इक्क हफ्ता होर इंतजार कित्तेया अते तिज्जी वरी उस कबूतरी जो बार भेजेया। इस वरी, उसजो जमीन पर रुकणे री जगह मिली गेई अते सेह वापस नी आई। पाणी सुक्केया करदा थिया।

दो महीने बाद परमेश्वर ने नूह जो बोल्लेया, “अवे तू अते तेरा परिवार अते सारे जानवर किस्ती का बार निकली आओ। मत्ते सारे बच्चे अते पौत्रु-धियोतरु पैदा करो अते धरती जो भरी दो।” इधेरे तांइ नूह अते उसेरा परिवार किस्ती का बार निकली आया।

नूह ने किस्ती का बार आणे का बाद, उनिये इक्क वेदी बणाई अते बलि तांइ इस्तेमाल कित्ते जाणे वाले हर इक्क जानवर विच्च का किच्छ जानवर लेई करी बलि चढ़ाई। परमेश्वर उस बलि का खुस होया अते नूह अते उसेरे परिवार जो असीस दित्ती।

परमेश्वर ने बोल्लेया, “मैं वादा करदा कि मणुआं रे जरिये कित्ते जाणे वाले बुरे कम्मां री वजह कने मैं फिरी कदी जमीन जो श्राप नी दिंगा या बाढ़ रे जरिये दुनिया जो खत्म नी करगा, हालाँकि मणू अपणे बचपन का ही पापी है।

फिरी परमेश्वर ने अपणे वादे री निसानी रे रुप विच्च इन्द्रधनुष जो बणाया। जां भी आसमान विच्च इन्द्रधनुष लिब्बे, तां परमेश्वर ने याद करणा कि उनिये कै वादा कित्तेया है अते तियां ही उसेरे मणुआं ने भी याद करणा। उत्पत्ति अध्याय 6-8 से एक बाइबल की कहानी उत्पत्ति अध्याय 6-8 का इक्क बाइबल री कहाणी