4. अब्राहम कने परमेश्वर रा वादा

बाढ़ रे केई सालां बाद, दुनियां विच्च मत्ते सारे मणू रेह्या करदे थिये, अते उन्हा ने फिरी परमेश्वर रे अते एक दुज्जे रे खिलाफ पाप कित्तेया। किजोकी सेह् सारे इक्क ही भासा बोल्लेया करदे थिये, इधेरे तांइ सेह् सब इकठ्ठे होए अते दुनियां री होर जगह विच्च फैली जाणे रे परमेश्वर रे हुकम रे बजाए इक्क ही सैह्र बणाया।

सेह् बड़े घमण्डी थिये, अते उन्हा जो कदेयी जिंदगी जीणी चंहिदी इस बारे विच्च सेह् परमेश्वर रे हुकम जो नी मनणा चांह्दे थिये। इत्ते तांइ की उन्हा ने इक्क ऐसी मीनार जो बनाणा सुरु कित्तेया जे स्वर्ग तक पुज्जे। परमेश्वर ने दिख्खेया कि जे सेह् इकठ्ठे मिली करी बुराई करदे रैंह्गे, ता सेह् होर भी मत्ते सारे पाप्पी कम्मां जो करी सकदे हिन।

इधेरे तांइ परमेश्वर ने उन्हेरी इक्क भासा जो अलग-अलग भासा विच्च बदली दित्तेया अते उन्हा मणुआं जो पूरी दुनियां विच्च फैलाई दित्तेया जिस सैह्र जो उन्हा ने बणाणा सुरु कित्तेया थिया सेह् बाबेल कैहलाया गेया, जिसेरा मतलब “ गड़बड़ी” है।

केई सौ सालां रे बाद, परमेश्वर ने अब्राहम नां रे इक्क मणू कने गाल्ल कित्ती। परमेश्वर ने उसजो बोल्लेया, “अपणे देस अते परिवार जो छड्डी करी उस देस जो चली जा जे मैं तिज्जो दिखांगा। मैं तिज्जो इदेयी असीस दिंगा अते तेरे का इक्क बड्डी जाति बणागा। मैं तेरा नां महान करगा। जे तिज्जो असीस दिंगा, मैं उसजो असीस दिंगा, अते जे तिज्जो श्राप दिंगा उसजो श्राप दिंगा। तेरी वजह कने दुनियां रे सारे कुल ने असीस पाणी|”

इधेरे तांइ अब्राहम ने परमेश्वर री गाल्ल मन्नी। उनिये अपणे सारे सेवकां अते अपणी सारी धन-दौलत समेत अपणी लाड़ी सारै जो अपणे कने लित्तेया अते उस देस जो, कनान देस जो चली गेया जे परमेश्वर ने उसजो दिखाया थिया।

जां अब्राम कनान पुज्जेया तां परमेश्वर ने उसजो बोल्लेया, “अपणे चारों पास्से दिख्ख। मैं तिज्जो ए सारा देस दिंगा अते तेरे वंश हमेसा तांइ इस पर अधिकार रख्खणा।” तां अब्राम उस देस विच्च बसी गेया।

मलिकिसिदक नां रा एक मणू थिया जे परमेश्वर रा पुरोत थिया। इक्क दिन जां अब्राम युद्ध करणे का बाद आया करदा थिया तां सेह् अते अब्राम मिले। मलिकिसिदक ने अब्राम जो असीस दित्ती अते बोल्लेया ”महान परमेश्वर जे स्वर्ग अते धरती रा मालक है सेह् तिज्जो असीस दे।” फिरी अब्राम ने युद्ध विच्च जीत्ते री सारी चिज्जाँ रा दसमा हिस्सा मलिकिसिदक जो दित्तेया।

केई साल बीती गे, पर हल्ले भी अब्राम अते सारै रे कोई मुंडा नी थिया। परमेश्वर ने अब्राम कने गाल्ल कित्ती अते फिरी का वादा कित्तेया कि उसजो इक्क मुंडा हूणा अते जियां आसमान विच्च तारे हिन तियां ही उसेरे भी मत्ते सारे वंशज हूणे। अब्राम ने परमेश्वर रे वादे पर भरोसा कित्तेया। परमेश्वर ने घोषणा कित्ती कि अब्राम इक्क नेक जन थिया किजोकी उनिये परमेश्वर रे वादे पर भरोसा कित्तेया थिया।

तां परमेश्वर ने अब्राम कने इक्क वादा कित्तेया। आम तोर पर, इक्क वादा दो दलां विच्च इक्क दुज्जे तांइ कम्मां जो करणे रा इक्क समझौता हूंदा। परमेश्वर ने अब्राम कने ए वादा तां कित्तेया जां अब्राम सोया करदा थिया, पर सेह् तां भी परमेश्वर जो सुणी सकदा थिया। परमेश्वर ने बोल्लेया, “मैं तेरे सरीर का पैदा करी के तिज्जो तेरा अपणा इक्क मुंडा दिंगा। मैं तेरे वंशजां जो ए कनान देस दिंदा|” पर हल्ले भी अब्राम रा कोई मुंडा नी थिया। उत्पत्ति अध्याय 11-15 से एक बाइबल की कहानी उत्पत्ति अध्याय 11-15 का बाइबल री इक्क कहाणी