5. वादे रा मुंडा

अब्राम अते सारै रे कनान देस विच्च पुज्जणे रे दास साल बाद, हल्ले तांइ भी उन्हेरी कोई उलाद नी थी। इधेरे तांइ, अब्राम री लाड़ी सारै ने उसजो बोल्लेया, “किजोकी परमेश्वर ने हल्ले तांइ मिंजो बच्चा जमणे तांइ सक्षम नी कित्तेया है अते अवे मैं बच्चा जमणे तांइ बड़ी बुजुर्ग है, दिख्ख, मेरी नौकराणी हाजिरा इत्ते है। उस कने ब्याह करी लै ताकि सेह् मेरे तांइ इक्क बच्चा पैदा करी सके।”

इधेरे तांइ अब्राम ने हाजिरा कने ब्याह करी लित्तेया। हाजिरा रा इक्क मुंडा होया, अते अब्राम ने उसेरा नां इश्माएल रख्खेया। पर सारै हाजिरा का जलना लग्गी। जां इश्माएल तेराह् साल रा थिया, परमेश्वर ने फिरी अब्राम कने गाल्ल कित्ती।

परमेश्वर ने बोल्लेया,” मैं सबका जादा सक्तिसाली परमेश्वर है। मैं तेरे कने इक्क वादा करगा।” तां अब्राम ने जमीन पर गिरी करी मत्था टेकेया। परमेश्वर ने अब्राम कने ए भी बोल्लेया,” तू बड़ी सारी जातियां रा प्यो हूणा। मैं तिज्जो अते तेरे वंशजा जो उन्हेरी अपणी जमीन होणे तांइ कनान देस दिंगा अते मैं हमेसा तांइ उन्हेरा परमेश्वर हूणा। तिज्जो अपणे टब्बर रे हर इक्क मरद रा खतना करणा है।

“तेरी लाड़ी सारै रा इक्क मुंडा हूणा- सेह् वादे रा मुंडा हूणा। उसेरा नां इसहाक रख्खेयां। मैं उस कने अपणे वादे जो बणाई रख्खगा अते सेह् इक्क बड़ी जाति बणनी। मैं इश्माएल जो भी इक्क बड्डी जाति बणांगा, पर मेरा वादा इसहाक कने हूणा|” तां परमेश्वर ने अब्राम रा नां बदली करी अब्राहम रख्खी दित्तेया, जिसेरा मतलब “मत्ते सारेयां रा प्यो”। परमेश्वर ने सारै रा नां भी बदली करी सारा रख्खी दित्तेया, जिसेरा मतलब “मूलमाता”।

उस दिन अब्राहम ने अपणे टब्बर रे सारे मरदां रा खतना कित्तेया। लगभग इक्क साल रे बाद, जां अब्राहम 100 साल री उम्र रा थिया अते सारा 90साल री थी, तां सारा ने अब्राहम रे मुंडे जो जन्म दित्तेया। जियां परमेश्वर ने उन्हा जो बोल्लेया थिया उन्हा ने उसेरा नां इसहाक रख्खेया।

जां इसहाक जवान होया तां परमेश्वर ने ए बोल्ली करी अब्राहम रे भरोसे रा इन्तेहाम लित्तेया,”अपणे इक्क लौते मुंडे जो लै, अते उसजो मेरे तांइ बलि रे रुप विच्च मारी दे।” फिरी अब्राहम ने परमेश्वर री गाल्ल मन्नी अते अपणे मुंडे जो बलि करणे तांइ तियार कित्तेया।

जां अब्राहम अते इसहाक बलि चढ़ाणे री जगह री तरफ जाणा लगे तां इसहाक ने पुच्छेया,” ओ पिता, असा का बलि तांइ लकड़ियाँ ता हिन, पर बलि चढ़ाणे तांइ बछ्छू कुते है?” अब्राहम ने जवाब दित्तेया,” ओ मेरे मुंडे, परमेश्वर बलि तांइ बछ्छू रा इन्तेजाम करगा|”

जां सेह् बलि चढ़ाणे री जगह पर पुज्जी गे, तां अब्राहम ने इसहाक जो बन्नी करी वेदी पर लेटाई दित्तेया। सेह् अपणे मुंडे जो मारणे ही वाला थिया कि परमेश्वर ने बोल्लेया, रुकी जा! मुंडे जो मत मार! अवे मैं जाणी गेया कि तू मेरा डर मंदा किजोकी तू अपणे इक्कलोते मुंडे जो भी मेरे का बचाई करी नी रख्खेया।”

नेड़े ही अब्राहम ने इक्क बकरे जो दिख्खेया जे झाड़ियां विच्च फसे रा थिया। इसहाक रे बदले बलि तांइ परमेश्वर ने बकरे रा इन्तेजाम कित्तेया। अब्राहम ने खुसी-खुसी बकरे री बलि चढ़ाई दित्ती।

तां परमेश्वर ने अब्राहम जो बोल्लेया, “किजोकी तू मेरे तांइ सब किच्छ दैणा चांह्दा थिया, इत्ते तांइ कि अपणे इक्कलौते मुंडे जो भी, इधेरे तांइ तिज्जो असीस दैणे रा वादा करदा। तेरे वंशज आसमान रे तारेयां का भी जादा हूणे। किजोकी तू मेरे हुकम जो मन्नेया है इधेरे तांइ मैं तेरे परिवार रे जरिये दुनियां रे सब कुलां जो असीस दिंगा|” उत्पत्ति अध्याय 16-22 से एक बाइबल की कहानी उत्पत्ति अध्याय 16-22 का बाइबल री इक्क कहाणी