6. परमेश्वर इसहाक तांइ इंतजाम करदा।

जां अब्राहम बड़ा बुजुर्ग होई गेया तां उसेरा मुंडा, इसहाक, इक्क मरद री उम्र रा होई गेया थिया। इधेरे तांइ अब्राहम ने अपणे इक्क नौकर जो अपणे मुंडे इसहाक तांइ उस देस का इक्क लाड़ी लियाणे तांइ भेज्जेया जित्ते उसेरे रिश्तेदार रैंह्दे थिये।

जित्ते अब्राहम रे रिश्तेदार रैंह्दे थिये उस देस जो जाणे तांइ बड़ा लम्बा सफर करणे रे बाद परमेश्वर ने उस नौकर री मुलाकात रिबका कने कराई। सेह् अब्राहम रे भाई री पोती थी।

रिबका अपणे परिवार जो छड्डी करी उस नौकर कने वापस जाणे तांइ मनी गेई। जियां ही सेह् पुज्जे इसहाक ने उस कने ब्याह करी लित्तेया।

इक्क लम्बे वक्त का बाद, अब्राहम मरी गेया। तां परमेश्वर ने अब्राहम रे मुंडे इसहाक जो, अब्राहम कने कित्ते रे वादे री वजह कने असीस दित्ती। उस वादे विच्च परमेश्वर रा इक्क वादा थिया कि अब्राहम रे अणगिणत वंशज हूणे। पर इसहाक री लाड़ी रिबका री उलाद नी होई।

इसहाक ने रिबका तांइ प्रार्थना कित्ती, अते परमेश्वर ने उसजो जुड़वा बच्चे कने दुपराणी कित्तेया। जिस वक्त से बच्चे रिबका रे पेट विच्च ही थिये सेह् आपस विच्च लड़णा लगे, इधेरे तांइ जे किच्छ होया करदा थिया सेह् रिबका ने परमेश्वर जो दस्सी दित्तेया।

परमेश्वर ने रिबका जो बोल्लेया,”तू दो मुंडेयां जो जन्म दैणा। उन्हेरे वंशज दो अलग-अलग जातियां बणनी। तिन्हा इक्क दुज्जे कने लड़ना। पर बड्डे मुंडे का पैदा होणे वाली जाति जो छोटे मुंडे का आणे वाली जाति रा हुकम मनणा पैणा।”

जां रिबका रे बच्चे पैदा होए, तां बड्डा वाला मुंडा लाल अते रूईदार थिया, अते उन्हा ने उसेरा नां एसाव रख्खेया। तां छोटा मुंडा एसाव री ऐड़ी पकड़े रे पैदा होया, अते उन्हा ने उसेरा नां याकूब रख्खेया। उत्पत्ति अध्याय 24:1-25:26 से एक बाइबल की कहानी उत्पत्ति अध्याय 24:1-25:26 का बाइबल री इक्क कहाणी