7. परमेश्वर याकूब जो असीस दिंदा.

जां सेह् बच्चे बड्डे होए तां याकूब जो घरे रैह्णा खरा लगेया, पर एसाव जो जानवरां रा सिकार करणा अच्छा लगेया। रिबका ने याकूब कने जादा प्यार रख्खेया, पर इसहाक ने एसाव कने प्यार रख्खेया।

इक्क दिन, जां एसाव सिकार करी के वापस आया ता तिसजो बड़ी भुख्ख थी लगे री। एसाव ने याकूब जो बोल्लेया,”जे रोटी तैं पकाई री है उस विच्च का थोड़ी रोटी मिंजो भी दे।” याकूब ने जवाब दित्तेया,”पैल्ले मेरे कने ए वादा कर की पैहलौठा होणे री वजह कने जे चिज्जाँ तिज्जो मिलणी चंहिदी, सेह् सब चिज्जाँ तू मिंजो दिंगा।” इधेरे तांइ एसाव ने सारी चिज्जाँ जो याकूब जो दैणे तांइ वादा कित्तेया। तां याकूब ने उसजो किच्छ रोटी दित्ती।

इसहाक एसाव जो असीस दैणा चांह्दा थिया। पर इस का पैल्ले कि उनिये इयां कित्तेया, रिबका अते याकूब ने याकूब रे एसाव हूणे रा ढोंग करी के उस कने धोख्खा कित्तेया। इसहाक बुजुर्ग थिया अते अवे तिसजो किच्छ लिबदा नी थिया। इधेरे तांइ याकूब ने एसाव रे कपड़े पाई करी अते बकरी री खाल जो अपणे गले अते हत्थां पर लपेटी लित्तेया।

याकूब इसहाक रे करीब आया अते बोल्लेया, “मैं एसाव है। मैं इधेरे तांइ आया की तू मिंजो असीस दे।” जां इसहाक ने बकरी रे बालां जो महसूस कित्तेया अते कपडेयां जो सूंघेया, तां उनिये सोच्चेया की ए एसाव है अते उसजो असीस दित्ती।

एसाव ने याकूब का जलन कित्ती किजोकी याकूब ने उसेरे पैल्ले मुंडे हूणे रे हक जो अते उसेरी असीसां जो भी चोरी लित्तेया थिया। इधेरे तांइ उनिये अपणे प्यो रे मरणे का बाद याकूब जो जान का मारणे री योजना बणाई।

पर रिबका ने एसाव री योजना जो सुणी लित्तेया। इधेरे तांइ उनिये अते इसहाक ने याकूब जो उसेरे रिश्तेदारां कने रैह्णे तांइ बड़ी दूर भेजी दित्तेया।

याकूब केई सालां तांइ रिबका रे रिश्तेदारां कने रेह्या| उस वक्त रे दौरान उनिये ब्याह कित्तेया अते उसेरे बारा मुंडे अते इक्क कुड़ी होई। परमेश्वर ने उसजो बड़ा अमीर बणाई दित्तेया।

बिह् सालां तांइ कनान विच्च अपणे घर का दूर रैह्णे का बाद, याकूब अपणे परिवार, अपणे सेवकां, अते अपणे जानवरां रे सारे झुण्डा कने वापस आई गेया।

याकूब इधेरे तांइ बड़ा डरे रा थिया किजोकी उनिये सोच्चेया कि एसाव हल्ले भी उसजो मारणा चांह्दा थिया। इधेरे तांइ उनिये तोफे रे रुप विच्च जानवरां रे झुण्ड जो एसाव का भेज्जेया। जे सेवक उन झुण्डा जो लेई करी गे थिए उन्हा ने बोल्लेया,”तेरा दास याकूब, इन जानवरां जो तिज्जो दिंदा। सेह् जल्दी ही आया करदा है।”

पर एसाव अवे याकूब जो नुकसान नी पुजाणा चांह्दा थिया। इसेरे बजाए, सेह् उसजो इक्क वरी फिरी दिख्खी करी बड़ा खुस होया। उसेरे बाद याकूब कनान विच्च सांति कने रेह्या। फिरी इसहाक मरी गया अते याकूब अते एसाव ने उसजो दफनाया। जे वादा परमेश्वर ने अब्राहम कने कित्तेया थिया सेह् अवे इसहाक का याकूब पर आई गेया थिया। उत्पत्ति अध्याय 25:27-35:29 से एक बाइबल की कहानी उत्पत्ति अध्याय 25:27-35:29 का बाइबल री इक्क कहाणी