8. परमेश्वर यूसुफ अते उसेरे टब्बर जो बचांदा

केई सालां बाद, जां याकूब बुजुर्ग होई गया थिया, तां उनिये अपणे प्यारे मुंडे युसफ जो उसेरे भाइयां जो दिख्खणे भेज्जेया जे जानवरां रे झुण्डा री देखभाल करदे थिये।

युसूफ रे भाई उसका नफरत करदे थिये किजोकी उन्हेरा प्यो उस कने जादा प्यार करदा थिया अते इधेरे तांइ भी की युसूफ ने सुपना दिख्खेया थिया कि सेह् उन्हा रा राज्जा होई जाणा। जां यूसुफ अपणे भाइयां का गेया तां उन्हा ने उसजो कैदी बणाई लित्तेया अते उसजो दासां रा व्यापार करणे वालेयां का बेच्ची दितेया।

घर वापस आणे का पैल्ले यूसुफ रे भाइयां ने यूसुफ रे कपड़े जो फाड़ी करी बकरी रे खून विच्च डोब्बी दित्तेया। फिरी उन्हा ने सेह् कपड़ा अपणे प्यो दिख्खाया ताकि सेह् ए सोच्चे की कुस्की जंगली जानवर ने उसजो मारी दित्तेया। याकूब बड़ा उदास थिया।

दासां रा व्यापार करणे वाले सेह् मणू यूसुफ जो मिस्र लेई गे। नील नदी रे किनारे पर बसे रा मिस्र इक्क बड़ा बड्डा अते सक्तिसाली देस थिया। उन्हा दासां रा धंधा व्यापार करणे वालेयां ने यूसुफ जो इक्क अमीर सरकारी प्रधान जो दास रे रुप विच्च बेच्ची दित्तेया। यूसुफ ने अपणे मालक री खरे तरिक्के सेवा कित्ती, अते परमेश्वर ने यूसुफ जो असीस दित्ती।

उसेरे मालक री लाड़ी ने यूसुफ कने सोणे री कोसिस कित्ती, पर यूसुफ ने इस तरिक्के कने परमेश्वर रे विरुद्ध पाप करणे का मन्हा करी दित्तेया। सेह् गुस्सा होई अते यूसुफ पर झूठ्ठा इल्जाम लगाई दित्तेया, इधेरे तांइ उसजो पकड़ी करी जेल विच्च पाई दित्तेया। इत्ते तांइ की जेल विच्च भी, यूसुफ परमेश्वर रे प्रति सच्चा रेह्या, अते परमेश्वर ने उसजो असीस दित्ती।

दो सालां बाद, यूसुफ हल्ले भी जेल विच्च थिया, भले ही सेह् बेकसुर थिया। इक्क रात, फिरौन, जियां कि मिस्री मणू अपणे राज्जेयां जो पुकारदे थिये, ने दो सुपने दिख्खे जिसेरी वजह कने सेह् बैचैन होई गेया। उसेरा कोई भी सलाहकार उन्हा सुपनेयां रा मतलब नी दस्सी सकेया।

परमेश्वर ने यूसुफ जो सुपनेयां रा मतलब बताणे री क्षमता दित्ती थी, इधेरे तांइ फिरौन ने यूसुफ जो जेल का वापस सद्देया। यूसुफ ने उन्हा जो उन्हा सुपनेयां रा मतलब दस्सेया अते बोल्लेया, “परमेश्वर ने सात साल दैणे जिस विच्च बड़ी सारी फसल उगणी अते उसेरे बाद सात साल अकाल पैणा।

फिरौन यूसुफ का इन्ना खुस होया कि उनिये उसजो मिस्र रा दुज्जा सबका सक्तिसाली मणू बणाई दित्तेया।

यूसुफ ने मणुआं जो ए बोल्लेया की खरी फसल वाले सात सालां रे दौरान जादा का जादा फसल इकठ्ठी करो। जां सात साल रा अकाल आया तां यूसुफ ने मणुआं जो सेह् फसल बेच्ची ताकि उन्हा का खाणे तांइ हो।

सेह् अकाल सिर्फ मिस्र विच्च ही नी थिया, पर कनान विच्च भी बड़ा जादा थिया जित्ते याकूब अते उसेरा परिवार रैंह्दा थिया।

इधेरे तांइ याकूब ने अपणे सबका बड्डे मुंडेयां जो रोटी खरीदणे तांइ मिस्र जो भेज्जेया। जां सेह् रोटी तांइ फसल खरीदणे तांइ यूसुफ रे सामणे खड़े होए तां उन्हा भाइयां ने यूसुफ जो नी पछाणेया। पर यूसुफ ने उन्हा जो पछाणी लित्तेया।

अपणे भाइयां जो परखणे का बाद ए पता लगाणे तांइ की कै सेह् बदली गेरे हिन, यूसुफ ने उन्हा जो बोल्लेया, “मैं तुसां रा भाई यूसुफ है! डरो मत। जां तुसा ने मिंजो दास रे रुप विच्च बेचेया थिया ता तुसा ने बुरा करणे री ठाणी थी, पर परमेश्वर ने उस बुराई जो भलाई तांइ इस्तेमाल कित्तेया! आओ अते मिस्र विच्च रेह्यो ताकि मैं तुसा रे अते तुसां रे टब्बर तांइ रोटी रा इंतजाम करी सकां।”

जां यूसुफ रे भाई घर वापस आए अते अपणे प्यो याकूब जो दस्सेया कि यूसुफ हल्ले तांइ जिंदा है ता सेह् बड़ा जादा खुस होया थिया।

बल्कि याकूब इक्क बुजुर्ग मणू थिया तां भी सेह् अपणे पूरे टब्बर समेत मिस्र जो चली गेया, अते सेह् उत्ते बसी गे। याकूब रे मरणे का पैल्ले, उनिये अपणे इक्क इक्क बच्चे जो असीस दित्ती।

परमेश्वर ने जे वादे अब्राहम कने कित्ते थिए सेह् इसहाक पर अते उसेरे बाद याकूब, अते उसेरे बाद उसेरे बारा मुंडेयां अते उन्हेरे टब्बरां पर होए थिए। उन्हा बारा मुंडेयां रे वंशज इस्राएल रे बारा गोत्र बणी गे। उत्पत्ति अध्याय 37-50 से एक बाइबल की कहानी उत्पत्ति अध्याय 37-50 का बाइबल री इक्क कहाणी