9. परमेश्वर मूसा जो सद्ददा

यूसुफ रे मरणे का बाद उसेरे सब रिश्तेदार मिस्र विच्च बसी गे। सेह् अते उसेरे वंशज केई सालां तांइ मिस्र विच्च ही रेह् थिये अते उन्हेरे मत्ते बच्चे पैदा होए। सेह् सब इस्राएलि केहलाए गे।

केई सौ सालां का बाद, इस्राएलियां री गिणती बड़ी बद्धी गेई थी। अते मिस्री मणू अवे इस गाल्ल तांइ सुकर गुजार नी थिये की उन्हेरी मदत तांइ यूसुफ ने बड़ा किच्छ कित्तेया। सेह् इस्राएलियां का डरी गे किजोकी सेह् गिणती विच्च उन्हा का जादा थिये। इधेरे तांइ उस वक्त मिस्र पर राज करणे वाला फिरौन ने इस्राएलियां जो मिस्रियां रे दास बणाई दित्तेया।

मिस्रियां ने इस्राएलियां जो मत्ते सारे भवन अते केई सैह्रां जो बणाणे तांइ मजबूर करी दित्तेया। उस मुस्किल मैहनत ने उन्हेरी जिंदगी बड़ी दुखदाई बणाई दित्ती, पर परमेश्वर ने उन्हा जो असीस दित्ती अते उन्हेरे होर भी बच्चे पैदा होए।

फिरौन ने दिख्खेया कि इस्राएलियां रे मत्ते बच्चे पैदा होया करदे हिन, इधेरे तांइ उनिये अपणे मणुआं जो इस्राएलियां रे सारे नर बच्चेयां जो नील नदी विच्च सुट्टी करी मारणे रा हुकम दित्तेया।

इक्क इस्राएली जनानी ने इक्क नर बच्चे जो जन्म दित्तेया। उनिये अते उसेरे लाड़े ने जिन्ना होई सकदा थिया उन्हा उस बच्चे जो लुकाई करी रख्खेया।

जां उस बच्चे रे माँ-प्यो उसजो जादा नी लुकाई सके, तां उन्हा ने उसजो मारे जाणे का बचाणे तांइ इक्क तैरणे वाली टोकरी विच्च रख्खी करी नदी रे किनारे झाड़ियां विच्च रख्खी दित्तेया। उसेरी बड्डी भैंण ने ए दिख्खणे तांइ निगरानी कित्ती कि उस कने कै हूंगा।

फिरौन री कुड़ी ने उस टोकरी जो दिख्खी करी उसेरे अंदर नजर मारी। जां उनिये इक्क बच्चे जो दिख्खेया तां उनिये उस बच्चे जो अपणे रे रुप विच्च अपणाई लित्तेया। उनिये इक्क इस्राएली जनानी जो उस बच्चे जो दुद्द पियाणे तांइ काम्म पर रख्खेया, बिना जाणे की ए जनानी ही उस बच्चे री असली माँ है। जां सेह् बच्चा इन्ना बड्डा होई गया कि अवे उसजो अपणी माँ रे दुद्द री जरुरत नी रेह्ई थी, तां उनिये फिरौन री कुड़ी रे नेड़े उसजो लेटाई दित्तेया, उसेरा नां मूसा थिया।

इक्क दिन, जां मूसा बड्डा होई गेया, तां उनिये दिख्खेया कि इक्क मिस्री एक इस्राएली जो मारेया करदा है। मूसा ने अपणे साथी इस्राएली जो बचाणे री कोसिस कित्ती।

जां मूसा ने सोच्चेया कि उसजो कोई नी दिख्खगा तां उनिये उस मिस्री जो मारी दित्तेया अते उसेरी लाह्स जो दफन करी दित्तेया। पर मूसा ने जे कित्तेया थिया उसजो कुस्की ने दिख्खी लित्तेया थिया।

फिरौन जो पत्ता चली गेया कि मुसा ने कै कित्तेया है। उनिये उसजो मारणे री कोसिस कित्ती, पर मूसा मिस्र रे जंगल जो नह्सी गेया। फिरौन रे सपाही उसजो तोप्पी नी पाए।

मिस्र का दूर जंगल विच्च मूसा एक पुहाल बणी गेया थिया। उनिये उत्ते इक्क जनानी कने ब्याह करी लित्तेया अते उसेरे दो मुंडे पैदा होए।

मुसा अपणे सौरे री भेड़ां री देखभाल करदा थिया। इक्क दिन, उनिये बलदी झाड़ी दिख्खी जे राख होए बिना बलेया करदी थी। उसजो दिख्खणे तांइ सेह् उस झाड़ी रे करीब गेया। जां सेह उसेरे बड़े नेड़े थिया तां परमेश्वर ने उस कने गाल्ल कित्ती। उनिये बोल्लेया, “ओ मूसा, अपणे जुत्तेयां जो खोली दे। तू इक्क पवित्तर जगह पर खड़ा है।”

परमेश्वर ने बोल्लेया, “मैं अपणे मणुआं रे दुखां जो दिख्खेया है। मैं तिज्जो फिरौन का भेजगा ताकि तू इस्राएलियां जो मिस्र री गुलामी का बार निकाली लियाए। मैं उन्हा जो कनान देस दिंगा जिसेरा मैं अब्राहम, इसहाक अते याकूब कने वादा कित्तेया थिया।”

मूसा ने पुच्छेया, “अगर मणुआं ने जाणना चाह्या कि मिंजो कुनिये भेज्जेया तां मैं कै बोल्लां?” परमेश्वर ने बोल्लेया, “जे मैं है सेह् मैं है। उन्हा जो बोल्लेयां, मैं है ने मिंजो तुसा का भेज्जेया है।” उन्हा जो ए भी बोल्लेयां, ”मैं तुसा रे पुरखे अब्राहम, इसहाक अते याकूब रा परमेश्वर यहोवा है।’ मेरा ए नां हमेसा तांइ है।”

मूसा डरदा थिया अते फिरौन का वापस नी जाणा चांह्दा थिया किजोकी उनिये सोच्चेया की तिसने खरे तरिक्के कने नी बोल्ली पांणा, इधेरे तांइ परमेश्वर ने मूसा रे भाई, हारून, जो उसेरी मदत करणे तांइ भेज्जेया। निर्गमन अध्याय 1-4 से एक बाइबल की कहानी निर्गमन अध्याय 1-4 का बाइबल री इक्क कहाणी