10. दास्स बिपत्ता

परमेश्वर ने मूसा अते हारून जो समजाया कि फिरौन रा मन ढीठ होई जाणा। जां सेह् फिरौन का गे तां उन्हा ने बोल्लेया, “इस्राएल रा परमेश्वर इयां बोलदा, ‘मेरे मणुआं जो जाणे दे!’” पर फिरौन ने उन्हेरी गाल्ल नी सुणी अते इस्रएलियां जो भेजणे तांइ आजाद करणे री बजाए उनिये उन्हा जो होर जादा कड़ी मैहनत करणे तांइ मजबूर कित्तेया।

फिरौन उन्हा मणुआं जो भेजणे तांइ घड़ी-घड़ी मन्हा करदा रेह्या, इधेरे तांइ परमेश्वर ने मिस्र पर दास्स खतरनाक बिपत्तां भेज्जी। इन्हा बिपत्तां रे जरिये, परमेश्वर ने फिरौन जो दस्सेया कि सेह् फिरौन अते मिस्र रे देवतेयां का जादा सक्तिसाली है।

परमेश्वर ने नील नदी जो खून विच्च बदली दित्तेया, पर फिरौन ने हल्ले भी इस्राएलियां जो जाणे नी दित्तेया।

परमेश्वर ने पूरे मिस्र देस विच्च मेंढक भेज्जे। फिरौन ने मेंढकां जो दूर करणे तांइ मूसा का बिनत्ती कित्ती। पर सब मेंढकां रे मरणे का बाद, फिरौन ने अपणे मन जो सख्त करी लित्तेया अते इस्राएलियां जो मिस्र का बार जाणे नी दित्तेया।

इधेरे तांइ परमेश्वर ने चच्चड़ा री बिपत्ता भेज्जी। उसेरे बाद उनिये बड्डी मक्खियाँ री बिपत्ता भेज्जी। फिरौन ने मूसा अते हारून जो सद्दॆया अते उन्हा जो बोल्लेया की जे सेह् उस बिपत्ता जो रोकी देण तां इस्राएली मिस्र जो छड्डी करी जाई सकदे हिन्। जां मूसा ने प्रार्थना कित्ती तां परमेश्वर ने मिस्र पर का बड्डी मक्खियाँ जो हटाई दित्तेया। पर फिरौन ने अपणे मन जो सख्त करी लित्तेया अते उन्हा मणुआं जो आजाद होई करी जाणे नी दित्तेया।

इसेरे अग्गे, परमेश्वर ने मिस्रियां रे सब पालतू जानवरां जो बमार करी के मरणा दित्तेया। पर फिरौन रा मन सख्त होई गेया थिया अते उनिये इस्राएलियां जो जाणे नी दित्तेया।

तां परमेश्वर ने मूसा जो फिरौन रे सामणे हवा विच्च धुड़ सुटणे तांइ बोल्लेया। जां उनिये इयां कित्तेया तां मिस्र रे मणुआं री चमड़ी पर पीड़ वाले दाणे निकली आए, पर इस्राएलियां जो किच्छ नी होया। परमेश्वर ने फिरौन रे मन जो सख्त करी दित्तेया, अते फिरौन रे इस्राएलियां जो आजाद होई करी जाणे नी दित्तेया।

इसेरे बाद, परमेश्वर नेे ऐण रे गोल्ले गिराए अते मिस्र री सारी फसलां जो तबाह करी दित्तेया अते जे कोई भी बार निकलेया उसजो मारी दित्तेया। फिरौन ने मूसा अते हारून जो सदवाया अते उन्हा जो बोल्लेया, “मैं पाप्प कित्तेया है। तुसी मणू जाई सकदे हिन|’ इधेरे तांइ मूसा ने प्रार्थना कित्ती, अते आसमान का ऐण रे गोल्ले गिरणा रुकी गे।

पर फिरौन ने फिरी का पाप्प कित्तेया अते अपणे मन जो सख्त करी लित्तेया। उनिये इस्राएलियां जो आजाद करी के जाणे नी दित्तेया।

इधेरे तांइ परमेश्वर ने मिस्र पर टिड्डियां रे झुंड जो आणे दित्तेया। इन टिड्डियां ने उन्हेरी सारी फसलां जो खाई लित्तेया जे ऐण री बिपत्ता रे बाद बची गेई थी।

फिरी परमेश्वर ने न्याहरा करी दित्तेया जे तिन्न दिनां तांइ बणी रेह्या| ए इन्ना जादा थिया कि मिस्री मणू अपणे घरां का नी निकली पाए| पर जित्ते इस्राएली मणू रैंह्दे थिये, उत्ते रौसनी थी।

इन्हा नौ बिपत्तां का बाद भी, फिरौन ने इस्राएलियां जो आजाद होई करी जाणे नी दित्तेया। किजोकि फिरौन ने नी सुणेया थिया इधेरे तांइ परमेश्वर ने इक्क आखरी बिपत्ता जो भेजणे री सोच्ची। ए फिरौन रे मन जो बदली दिंगी। निर्गमन अध्याय 5-10 से एक बाइबल की कहानी निर्गमन अध्याय 5-10 बाइबल री इक्क कहाणी