11. फसह

परमेश्वर ने मूसा अते हारून जो फिरौन का ए बोलणे तांइ भेज्जेया कि इस्राएलियां जो जाणे दे। उन्हा ने उसजो चेतावनी दित्ती कि जे सेह् उन्हा जो नी जाणे दिंगा, ता परमेश्वर ने मिस्र रे मणुआं रे अते जानवर रे सब पैल्ले बच्चेयां जो मारी दिंगा। फिरौन ने ए सुणी करी भी परमेश्वर पर भरोसा करणे का अते उसेरी गाल्ल मनणे का मन्हा करी दित्तेया।

परमेश्वर ने उस पर भरोसा करणे वाले रे कुस्की भी पैल्ले मुंडे जो बचाणे तांइ इक्क उपाय रा इन्तेजाम कित्तेया। हर टब्बर जो बिना नुख्स रे इक्क छेलु लेई करी उसेरी बलि दैणी पैणी।

परमेश्वर ने इस्राएलियां जो उस बलि कित्ते रे छेलु रे खून जो अपणे घरे रे दरवज्जे री चौखट पर लगाणे जो बोल्लेया। उन्हा जो उसेरे मांस जो भुनणा थिया अते फिरी उन्हा जो बिना खमीर री रोटी कने उसजो जल्दी-जल्दी खाणा थिया। उनिये उस रोटी जो खाणे का बाद उन्हा जो फौरन मिस्र छड़णे तांइ तियार रैह्णे तांइ बोल्लेया।

जियां परमेश्वर ने इस्राएलियां जो करणे तांइ हुकम दित्तेया थिया उन्हा ने उसेरे हिसाब कने सब किच्छ कित्तेया। अद्दी रात्ती, परमेश्वर हर इक्क रे मुंडे जो मारदे होए मिस्र देस रे विच्च का होई करी गुजरेया।

इस्राएलियां रे हर इक्क घर पर खून लग्गे रा थिया, इधेरे तांइ परमेश्वर ने उन्हा घरां जो छड्डी दित्तेया। उन्हेरे अन्दर रे सब मणू महफूस थिये। सेह् छेलु रे खून री वजह कने बची गे थिये।

पर मिस्रियां ने परमेश्वर पर भरोसा नी कित्तेया थिया अते उसेरे हुकमां जो नी मन्नेया थिया। इधेरे तांइ परमेश्वर ने उन्हा रे घरां जो नी छड्डेया। परमेश्वर ने मिस्रियां रे हर इक्क पैल्ले पैदा होए रे मुंडेयां जो मारी दित्तेया।

जेल रे कैदियां रे पैल्ले बच्चेयां का लेई करी, फिरौन रे पैल्ले बच्चे तांइ, हर इक्क पैल्ला मुंडा मरी गेया। अपणी गेहरी वेदना री वजह कने मिस्र रे बड़े मणू रोया करदे थिये अते जोरे-जोरे रुंदै थिये।

उस्सी रात्ती, फिरौन ने मूसा अते हारून जो सदवाया अते बोल्लेया, “इस्राएलियां जो लेई करी जल्दी ही मिस्र का निकली जाओ|” मिस्र रे मणुआं ने भी इस्राएलियां जो जल्दी जाणे तांइ बिनत्ती कित्ती। निर्गमन अध्याय 11:1-12:32 से एक बाइबल की कहानी निर्गमन अध्याय 11:1-12:32 का बाइबल री इक्क कहाणी