12. निर्गमन

इस्राएली मिस्र का बार निकली करी बड़े खुस थिये। सेह् अवे गुलाम नी थिये, अते सेह् वादे कित्ते रे देस जो जाया करदे थिये! जे किच्छ भी इस्राएलियां ने मंगेया, मिस्रियां ने उन्हा जो सेह् सब किच्छ देई दित्तेया, इत्ते तांइ कि सोन्ना अते चाँदी अते होर मैंहगी चिज्जाँ।| दुज्जे देसां रे किच्छ मणुआं ने परमेश्वर पर भरोसा कित्तेया अते जां इस्राएली मणू मिस्र का निकले ता सेह् भी उन्हेरे कने आई गे।

दिन रे वक्त बदल रा इक्क बड्डा खम्बा उसेरे अग्गे-अग्गे चलेया। अते रात्ती रे वक्त ए आग्ग रा खम्बा बणी गेया। परमेश्वर जे कि उस बदल रे खम्बे विच्च अते आग्ग रे खम्बे विच्च थिया, हमेसा उन्हेरे कने थिया अते उनिये सफर करदे वक्त उन्हेरी अगुवाई कित्ती। उन्हा जो बस्स इन्ना करणा थिया कि सेह् उन्हेरे पिच्छे चलण।

थोड़े वक्त का बाद, फिरौन अते उसेरे मणुआं ने अपणे मन जो बदली दित्तेया। सेह् इस्राएलियां जो फिरी का अपणा दास बणाणा चांह्दे थिये। इधेरे तांइ उन्हा ने इस्राएलियां रा पिच्छा कित्तेया। ए परमेश्वर ही थिया जिनिये उन्हेरे मनां जो बदली दित्तेया थिया। उनिये इदेया इधेरे तांइ कित्तेया किजोकी सेह् चांह्दा थिया कि हर कोई जाणी ले कि फिरौन का अते मिस्रियां रे सब देवतां का जादा सक्तिसाली यहोवा है।

जां इस्राएलियां ने मिस्र री सेना जो आंदे दिख्खेया ता उन्हा जो पत्ता लग्गेया की सेह् फिरौन री सेना अते लाल समुंद्र रे बिच्च विच्च फसी गे। सेह् बड़े डरी गे अते रोणा लग्गे, “असा ने मिस्र किजो छड्डेया? असी मरणे वाले हिन।”

मूसा ने इस्राएलियां जो बोल्लेया, “डरो मत! परमेश्वर आज्ज तुसा तांइ लड़गा अते तुसा जो बचांगा।” तां परमेश्वर ने मूसा जो बोल्लेया, “इन्हा मणुआं जो लाल समुंद्र रे पास्से बढ़ने तांइ बोल|”

तां परमेश्वर ने उस बदल रे खम्बे जो लेई करी इस्राएलियां अते मिस्रियां रे बिच्च रख्खी दित्तेया ताकि मिस्री मणू इस्राएलियां जो दिख्खी ना सकण।

परमेश्वर ने मूसा जो समुंद्र रे पास्से अपणा हात्थ बढ़ाणे तांइ बोल्लेया। फिरी परमेश्वर ने हवा जो समुंद्र रे पाणी जो सिद्दे पास्से अते पूठ्ठे पास्से करवाई दित्तेया, जिस कने कि समुंद्र रे बिच्च का रस्ता बणी गेया।

इस्राएली मणू अपणे दोन्नों तरफ पाणी री खड़ी दवारां रे बिच्च सुक्की जमीन का होई करी निकले।

तां परमेश्वर ने उस रस्ते का बदल जो उठाई लित्तेया ताकि मिस्री मणू इस्राएलियां जो बच्ची करी जांदे दिख्खें। मिस्रियां ने उन्हा जो पकड़ने तांइ उन्हेरा पिच्छा करणे रा फैंसला लित्तेया।

इधेरे तांइ उन्हा ने समुंद्र रे बिच्च का उस रस्ते पर इस्राएलियां रा पिच्छा कित्तेया, पर परमेश्वर ने मिस्रियां जो डराई दित्तेया अते उन्हेरे रथां जो फसाई दित्तेया। सेह् लेरां मारणे लग्गे, “नह्सो! इस्राएलियां रे पास्से का परमेश्वर लड़ेया करदा है!”

सारे इस्राएली समुंद्र रे दुज्जे पास्से पुज्जी गे। तां परमेश्वर ने मूसा जो बोल्लेया कि सेह् फिरी का पाणी रे पास्से अपणा हात्थ बढ़ाए। जां मूसा ने इयां कित्तेया, ता पाणी मिस्र रे सेना रे उप्पर पेई गेया अते पाणी जियां पैल्ले थिया तियां ही होई गेया। सारी मिस्र री सेना रे सिपाही पाणी विच्च डुबी गे।

जां इस्राएलियां ने दिख्खेया कि मिस्री मरी गे ता उन्हा ने परमेश्वर पर भरोसा कित्तेया। उन्हा ने भरोसा कित्तेया की मूसा परमेश्वर रे पास्से का भेज्जे रा भविष्यद्वक्ता थिया।

इस्राएली मणू इधेरे तांइ भी बड़े खुस थिये किजोकी परमेश्वर ने उन्हा जो मरणे का अते गुलाम हूणे का बचाई लित्तेया थिया। अवे सेह् परमेश्वर री आराधना करणे अते उसेरे हुकमां जो मनणे तांइ सेह् आजाद थिये इस्राएलियां ने अपणी आजादी रा जश्न मनाणे तांइ अते परमेश्वर री तारिफ करणे तांइ मत्ते गाणेयां जो गाया किजोकी उनिये उन्हा जो मिस्रियां री सेना का बचाया थिया।

परमेश्वर ने इस्राएलियां जो हर साल इक्क तिहार मनाणे रा हुकम दित्तेया ए याद करणे तांइ कि कियां परमेश्वर ने मिस्रियां जो हराया अते उन्हा जो गुलाम हूणे का आजाद कित्तेया। ए फसह रे तिहार रे नां कने जाणेया जांदा थिया। उन्हा जो इस तिहार मनाणे तांइ इक्क बिना नुख्स रे छेलु री बलि करणी थी, उसजो भुनणा थिया, अते उसजो बिना खमीर री रोटी कने खाणा थिया। निर्गमन अध्याय 12:33-15:21 से एक बाइबल की कहानी निर्गमन अध्याय 12:33-15:21 का बाइबल री इक्क कहाणी