13. इस्राएल कने परमेश्वर रा वादा

इस्राएलियां जो लाल समुंद्र रे पार लेई करी जाणे का बाद, परमेश्वर उन्हा जो बियावान का लेई करी सीनै पहाड़ री तरफ लेई चलेया। ए सेई पहाड़ थिया जित्ते मूसा ने बलदी झाड़ी जो दिख्खेया थिया। उन्हा मणुआं ने उस पहाड़ रे थल्ले पास्से अपणे तम्बू लगाए।

परमेश्वर ने मूसा कने अते इस्राएल रे सब मणुआं जो बोल्लेया, “तुसा जो हमेसा मेरी गल्लां जो मनणा है अते जे वादा मैं तुसा कने करदा है उस वादे जो बणाई रख्खेयो। जे तुसी इयां करदे, ता तुसी मेरा इनाम कीमती धन-दौलत, परोतां रा देस, अते इक्क पवित्तर जाति बणना।”

परमेश्वर रे जरिये उन्हेरे का आणे वाले मणुआं ने तिन्न दिन तांइ अपणे आप जो तियार कित्तेया। तां परमेश्वर सीनै पहाड़ री चोटी का थल्ले उतरेया। जां सेह् आया ता हिल्लण आया, बिजलियाँ चमकी, धुँआ उठेया, अते तुरहियां का उच्ची अवाज निकली। तां मूसा अपु पहाड़ रे उप्पर चढ़ी गेया।

तां परमेश्वर ने मणुआं कने इक्क वादा कित्तेया। उनिये बोल्लेया, “मैं तुसा रा परमेश्वर, यहोवा है। मैं ही है जिनिये तुसा जो मिस्र री गुलामी का छुड़ाया। कुस्की दुज्जे देवते री आराधना मत करदे।”

“ मूर्तियां मत बणांदे अते उन्हेरी पूजा मत करदे, किजोकी मैं, यहोवा, तुसा रा इक्क ही इक्क परमेश्वर है। गलत तरिक्के कने मेरे नां रा इस्तेमाल मत करदे। याद रख्खेयो की सब्त रा दिन पवित्तर है। दुज्जे तरिक्के विच्च, छै दिनां विच्च अपणे सारे काम्म करेयो, सतमा दिन तुसा तांइ अराम करणे अते मिंजो याद करणे रा दिन है।”

“अपणे माँ अते प्यो री इज्जत करेयो। कुस्की रा खून मत करदे। व्यभिचार मत करदे। चोरी मत करदे। अपणे पड़ोसी री लाड़ी, उसेरे घर, या उसेरी कुस्की भी चीज जो लैणे री इच्छा मत करदे।”

तां परमेश्वर ने इन्हा दास्स हुकमां जो पत्थर री दो पटियां पर लिख्खी करी मूसा जो देई दित्तेया। परमेश्वर ने मणुआं जो बड़े सारे होर हुकमां जो दित्तेया की सेह् उन्हा जो मन्ने। जे उन्हा ने इन्हा हुकमां जो मन्नेया ता परमेश्वर ने उन्हा मणुआं जो असीस दैणी अते उन्हेरी रक्षा करणे रा वादा कित्तेया। पर उनिये बोल्लेया कि जे उन्हा ने इन्हा हुकमां जो नी मन्नेया तां तिसने उन्हा जो सज्जा दैणी।

परमेश्वर ने इस्राएलियां जो इक्क बड्डा तम्बू बणाणे तांइ भी बोल्लेया - मिलाप रा तम्बू। उनिये उन्हा जो सही सही दस्सेया कि इस तम्बू जो कियां बणाणा है, अते उसेरे अंदर कुण जणी चिज्जाँ रख्खणी हिन। उनिये उन्हा जो उस तम्बू जो दो कमरेयां विच्च बंडणे तांइ इक्क बड़े बड्डे पर्दे जो बणाणे तांइ भी बोल्लेया। परमेश्वर ने उस पर्दे रे पिच्छे वाले कमरे विच्च आंणा अते उत्ते रैह्ना। जित्ते परमेश्वर थिया उस कमरे रे अंदर जाणे री इजाजत सिरफ बड्डे परोत जो थी।

उन्हा मणूआं जो उस मिलाप वाले तम्बू रे सामणे इक्क वेदी जो बणाणा पैणा। कोई भी जे परमेश्वर रे हुकम जो तोड़े सेह् उस वेदी पर इक्क जानवर जो लेई करी आए। तां परोत उसजो बलि करे अते वेदी पर परमेश्वर तांइ बलि रे रुप विच्च उसजो आग्ग पर फुक्के। परमेश्वर ने बोल्लेया कि उस जानवर रे खून ने उस मणू रे पाप्पां जो छुपाई लैणा। इस तरिक्के कने, अवे परमेश्वर ने उस पाप जो नी दिख्खणा। सेह् मणू परमेश्वर री नजर विच्च “सुद्ध” हूना। परमेश्वर ने मूसा रे भाई हारून जो अते हारून रे वंशज जो अपणे परोत बणने तांइ चुणी लित्तेया।

परमेश्वर ने उन्हा मणुआं जो हुकम दित्तेया थिया अते सेह् उन्हेरे जो मनणे तांइ राजी होए। सेह् सिरफ परमेश्वर रे मणू बनणे तांइ अते सिरफ उसेरी आराधना करणे तांइ राजी होए।

केई दिनां तांइ, मूसा सीनै पहाड़ री चोटी पर ही रेह्या। सेह् परमेश्वर कने गाल्ल करेया करदा थिया। पर मणू उसेरे वापस हटणे री भाल करदे करदे थक्की गे। इधेरे तांइ सेह् हारून का सोन्ना लेई करी आए अते उसका इक्क मूर्ति बणाणे जो बोल्लेया ताकि सेह् परमेश्वर रे बजाए उस मूर्ति री पूजा करी सकण। इस तरिक्के कने, उन्हा ने भयंकर तरिक्के कने परमेश्वर रे खिलाफ पाप कित्तेया।

हारून ने बछ्छू रे आकार विच्च सोन्ने री इक्क मूर्ति बणाई। उन्हा मणुआं ने उस मूर्ति री पूजा करणा सुरु करी दित्ती अते उसेरे सामणे बलि चढ़ाई! उन्हेरे पाप री वजह कने परमेश्वर उन्हा का बड़ा गुस्सा होया थिया। परमेश्वर उन्हा जो मारी दैणा चांह्दा थिया। पर मूसा ने परमेश्वर का बिनत्ती कित्ती की उन्हा जो ना मारे। परमेश्वर ने उसेरी बिनत्ती सुणी अते उन्हा जो खत्म नी कित्तेया।

आखिर कार मूसा सीनै पहाड़ का थल्ले उतरी आया। सेह् उन्हा दो पथर री पटियां जो लेई करी आया जिस पर परमेश्वर ने दास्स हुकम जो लिख्खेया थिया। फिरी उनिये उस मूर्ति जो दिख्खेया। सेह् इतणा गुस्सा होया कि उन्हा पटियां जो तोड़ी करी चकना चूर करी दित्तेया।

फिरी मूसा ने उस मूर्ति जो तोड़ी करी उसजो राख्ख बणाई दित्तेया, अते उस राख्ख जो पाणी विच्च मिलाई करी उन मणुआं जे सेह् पाणी पियाई दित्तेया। परमेश्वर ने उन्हा मणुआं पर इक्क बिपत्ती भेजी अते उस विच्च बड़े मणू मरी गे।

जिन्हा पटियां जो मूसा ने तोड़ी दित्तेया थिया उन्हा पटियां री जगह मूसा ने दास्स हुकमां री नौई पत्थर री पटियां जो बणाया। तां सेह् फिरी पहाड़ पर चढ़ी गेया अते प्रार्थना कित्ती कि परमेश्वर उन्हा मणुआं जो माफ करे। परमेश्वर ने मूसा री सुणी अते उन्हा जो माफ करी दित्तेया। नौई पटियां पर दास्स हुकमां जो लेई करी मूसा पहाड़ का उतरी करी थल्ले आया।तां परमेश्वर ने सीनै पहाड़ का लेई करी वादे रे देस तांइ इस्राएलियां री अगुवाई कित्ती। निर्गमन अध्याय 19-34 से एक बाइबल की कहानी निर्गमन अध्याय 19-34 का बाइबल री इक्क कहाणी