14. बियावान विच्च भटकणा

परमेश्वर ने इस्राएलियां जो उन्हा हुकमां जो दस्सणा बांद्द कित्तेया, जिन्हा जो कित्ते रे वादे री वजह कने मनणा थिया। फिरी उनिये सीनै पहाड़ का अग्गे उन्हेरी अगुवाई कित्ती। सेह् उन्हा जो वादे कित्ते रे देस विच्च लेई जाणा चांह्द थिया। ए देस कनान भी केहलाया जांदा थिया। परमेश्वर बदल रा खम्बा बणी करी उन्हेरे अग्गे-अग्गे चलेया, अते सेह् उसेरे पिच्छे-पिच्छे चले।

परमेश्वर ने आब्राहम, इसहाक अते याकूब कने वादा कित्तेया थिया कि सेह् वादे रे देस उन्हेरे वंशजा जो दिंगा, पर इस्स वक्त उत्ते बड़ी सारी जाति रे मणू रैंह्दे थिये। सेह् कनानी रे नां कने जाणे जांदे थिये। ए कनानी मणू परमेश्वर री आराधना नी करदे थिये अते उसेरे हुकमां जो नी मंदे थिये। सेह् झूठे देवतेयां री पूजा करदे थिये अते बड्डे बुरे काम्म करदे थिये।

परमेश्वर ने इस्राएलियां जो बोल्लेया, “जां तुस्सी उस वादे रे देस विच्च जांगे तां उत्ते तुसी सब कनानियां का आजाद होई जांगे। उन्हेरे कने दोस्ती मत करदे अते ना उत्ते रे मणुआं कने अपणे बच्चेयां रे ब्याह करायो। तुसा जो उन्हेरी सारी मूर्तियाँ जो पूरे तरिक्के कने तोड़ी दैणा है। अगर तुस्सी मेरे हुकम नी मनगे, तां तुस्सी मेरे बजाए उन्हेरे देवतेयां री पूजा करणा लगगे।”

जां इस्राएली कनान देस री सीमा पर पुज्जे, मूसा ने इस्राएल रे हर इक्क गोत्र विच्च का इक्क-इक्क करी के बारा मरदां जो चुणेयां। उनिये उन्हा जो जाई करी उस देस रा भेद लैणे रा हुकम दित्तेया कि दिख्खे की सेह् देस कुदेया है। उन्हा जो उन्न कनानियां रा भेद भी लैणा थिया कि दिख्खे कि सेह् ताकतवर हिन या कमजोर हिन।

उन्हा बारा मरदां ने पूरे कनान का होई करी चाली दिन रा सफर कित्तेया अते फिरी सेह् वापस आई गे। उन्हा ने मणुआं जो दस्सेया, “सेह् देस बड़ा उपजाऊ है अते तित्ते बड़ी जादा फसलां उग्गे री थी!” पर दास्स भेदियां ने बोल्लेया, “उन्हेरा सैह्र बड़ा मजबूत है अते सेह् मणू लम्बे-चोड़े हिन! अगर असी उन्हा पर हमला करदे हिन, ता पक्का तिन्हा असा जो हराई दैणा अते असा जो मारी दैणा।”

उस्सी बेल्ले कालेब अते यहोशू अते होर दो भेदियां ने बोल्लेया, “ए सच्च है कि कनान रे मणू लम्बे अते ताकतवर हिन, पर असी बिल्कुल उन्हा जो हराई सकदे हिन! परमेश्वर असां तांइ लड़गा!”

पर मणुआं ने कालेब अते यहोशू री गाल्ल नी सुणी। सेह् मूसा अते हारून पर गुस्सा होई गे अते बोल्ले, “तुसी असा जो खतरनाक जगह पर किजो लेई करी आए? असा जो मिस्र विच्च ही रैह्णा चंहिदा थिया। अगर असी उस देस विच्च जांदे हिन ता असी लड़ाई विच्च मारे जाणे, अते कनान रे मणुआं ने असा री लाड़ियां अते बच्चेयां जो गुलाम बणाई लैणा। ”सेह् मणू उन्हा जो मिस्र विच्च लेई करी जाणे तांइ इक्क होर अगुवा चुणना चांह्दे थिये।

जां उन्हा मणुआं ने इयां बोल्लेया तां परमेश्वर बड़ा गुस्सा होई गेया थिया। सेह् मिलाप वाले तम्बू विच्च आया अते बोल्लेया, “तुसी मेरे खिलाफ बगावत कित्ती, इधेरे तांइ तुसा सबनां जो इस बियावान विच्च भटकणा पैणा। हर इक्क मणू जे बिह् साल या उसका जादा उम्र रा है तिसने इस बियावान विच्च मरी जाणा अते कद्दी भी उस देस विच्च नी पुज्जणा जे मैं तुसा जो देया करदा है। सिरफ कालेब अते यहोशू ने उस देस विच्च पुज्जणा।”

जां मणुआं ने परमेश्वर जो इयां बोलदे सुणेया, तां सेह् दुखी होए किजोकी उन्हा ने पाप कित्तेया थिया। इधेरे तांइ उन्हा ने कनान रे मणुआं पर हमला करणे रा फैसला कित्तेया। मूसा ने उन्हा जो नी जाणे तांइ समझाया किजोकी परमेश्वर उन्हा मणुआं कने नी थिया, पर उन्हा ने ने उसेरी गाल्ल नी सुणी।

परमेश्वर इस लड़ाई विच्च उन्हा कने नी गेया थिया, इधेरे तांइ कनानियां ने उन्हा जो हराई दित्तेया अते उन्हा विच्च का बड़े सारे मरी गे। तां इस्राएली मणू कनान का वापस मुड़ी गे। अगले चाली सालां तांइ, सेह् बियावान विच्च इत्ते-उत्ते भकटदे रेह्।

इस्राएली मणुआं रे चाली साल तांइ बियावान विच्च भटकणे रे दौरान, परमेश्वर ने उन्हेरी जरूरतां जो पूरा कित्तेया। उनिये उन्हा जो स्वर्ग का “मन्ना” कहलाणे वाली रोटी दित्ती। उनिये बटेरेयाँ रे झुंड जो भी उन्हेरी छावनी विच्च भेज्जेया ताकि उन्हेरे का खाणे तांइ मास हो। उस पूरे वक्त, परमेश्वर ने उन्हेरे कपड़ेयां अते जुतेयां जो फटणे नी दित्तेया।

इत्ते तांइ कि परमेश्वर ने उन्हेरे पीणे तांइ चमत्कारी रुप विच्च चट्टान विच्च का पाणी कड्डेया। पर इन्हा गल्लां रे बावजूद, इस्राएली मणुआं ने परमेश्वर रे खिलाफ अते मूसा रे खिलाफ सिकायत कित्ती अते कुड़कुड़ाए। तां भी, परमेश्वर भरोसे रे लायक थिया। उनिये जे वादा कित्तेया थिया कि सेह् अब्राहम, इसहाक, अते याकूब रे वंशजा तांइ करगा उनिये सेह् कित्तेया।

इक्क होर वक्त जां उन्न मणुआं का पीणे रा पाणी नी थिया, परमेश्वर ने मूसा जो बोल्लेया, “चट्टान कने गल्लां कर, अते उसका पाणी निकलगा।” पर मूसा ने चट्टान कने गल्लां नी कित्ती। बजाए इधेरे, उनिये सोठ्ठी जो चट्टान पर दो बारी मारेया। इस तरिक्के कने उनिये परमेश्वर री बेज्जती कित्ती। सारेयां तांइ पीणे रा पाणी ता निकली आया, पर परमेश्वर मूसा कने गुस्सा होई गेया। उनिये बोल्लेया, “किजोकी तू इयां कित्तेया, इधेरे तांइ तू वादे रे देस रे अंदर नी जाई पाणा।”

जां इस्राएली मणू चाली सालां तांइ बियावान विच्च भटकी चुक्के थिये, तां जिन्हा ने परमेश्वर रे खिलाफ बलवा कित्तेया थिया सेह् सब मरी गे थिये। तां परमेश्वर फिरी उन्हा मणुआं जो वादे कित्ते रे देस रे करीब लेई गेया। अवे मूसा बड़ा जादा बुजुर्ग होई गेया थिया, इधेरे तांइ परमेश्वर ने मणुआं री अगुवाई करणे तांइ मूसा री मदत तांइ यहोशू जो चुणेया। परमेश्वर ने मूसा कने ए वादा भी कित्तेया थिया कि इक्क दिन उन्हा मणुआं का मूसा सांइ इक्क भविष्यवक्ता भेजगा।

तां परमेश्वर ने मूसा जो इक्क पहाड़ री चोटी पर जाणे तांइ बोल्लेया ताकि सेह् वादे रे देस जो दिख्खी सके। मूसा ने उस वादे रे देस जो दिख्खेया पर परमेश्वर ने उसजो उस विच्च जाणे तांइ मंजूरी नी दित्ती। तां मूसा मरी गेया, अते इस्राएलियां ने तीह् दिनां तांइ सोक मनाया। यहोशू उन्हेरा नौआ अगुवा बणी गेया। यहोशू इक्क अच्छा अगुवा थिया किजोकी उनिये परमेश्वर पर भरोसा कित्तेया अते उसेरी गल्लां जो मनेया। निर्गमन अध्याय 16-17; गिनती 10-14; 20; 27; व्यवस्थाविवरण 34 से एक बाइबल की कहानी निर्गमन अध्याय 16-17; गिनती 10-14; 20; 27; व्यवस्थाविवरण 34 का बाइबल री इक्क कहाणी