15. वादे रा देस

आखरी विच्च, अवे ओ वक्त आई गेया कि इस्राएली मणू वादे रे देस, कनान विच्च जांगे। उस देस विच्च यरीहो नां रा इक्क सैह्र थिया। उसेरी रक्षा तांइ उसेरे चारों पास्से पक्की दवारां थी। यहोशू ने उस सैह्र विच्च दो भेदियां जो भेज्जेया। उस सैह्र विच्च राहाब नां री इक्क वेश्या रैंदी थी। उनिये इन्हा भेदियां जो छुपाया, अते फिरी बाद विच्च उनिये उन्हा जो सैह्र का बची निकलणे विच्च मदत कित्ती। उनिये इयां इधेरे तांइ कित्तेया किजोकी सेह् परमेश्वर पर भरोसा रख्खदी थी। जिस वक्त इस्राएली मणू यरीहो जो खत्म करगे तां उन्हा ने राहाब अते उसेरे परिवार री रक्षा करणे रा वादा कित्तेया थिया।

इस्राएली मणुआं जो वादे रे देस विच्च जाणे तांइ यरदन नदी जो पार करणा थिया। परमेश्वर ने यहोशू जो बोल्लेया, “परोतां जो पैल्ले जाणा दे।” जां परोतां ने यरदन नदी विच्च अपणे कदमां जो रख्खेया तां पाणी री धार बांद्द होई गेई, जिस कने इस्राएली मणू नदी रे पार सुक्की जमीन पर जाई सकण।

उन्हा मणुआं ने यरदन नदी पार करी लित्ती तां परमेश्वर ने यहोशू जो बोल्लेया कि यरीहो पर हमला करणे तांइ तियार रेह्, बल्कि सेह् बड़ा मजबूत सैह्र थिया। परमेश्वर ने उन्हा मणुआं जो बोल्लेया कि उन्हेरे परोतां अते सिपाहियां जो छे दिनां तांइ उस सैह्र रे चारों पास्से चक्कर लगाणे हिन। इधेरे तांइ परोतां अते सिपाहियां ने इयां ही कित्तेया।

तां सतमें दिन, इस्राएलियां ने उस सैह्र रे चारों पास्से सात्त वरी होर चक्कर लगाए। उन्हेरे सैह्र रे चारों पास्से सतमी वरी चक्कर लगाणे का बाद, परोतां ने अपणी तुरहियां जो बजाया अते सिपाहियां ने उच्चे शब्द विच्च जै-जैकार भरे।

तां यरीहो रे चारों पास्से री दवारां गिरी गेई! जियां परमेश्वर ने हुकम दित्तेया थिया इस्राएलियां ने सैह्र री हर इक्क चीज जो खत्म करी दित्तेया। उन्हा ने सिरफ राहाब अते उसेरे परिवार जो छड्डी दित्तेया, जे इस्राएलियां रा हिस्सा बणी गे थिये। जां कनान विच्च रैह्णे वाले होर मणुआं ने सुणेया कि इस्राएलियां ने यरीहो जो खत्म करी दित्तेया है, तां से डरी गे कि इस्राएली मणुआं ने उन्हा पर भी हमला करणा।

परमेश्वर ने इस्राएलियां जो हुकम दित्तेया थिया कि कनान विच्च रैह्णे वाली कुस्की भी जाति कने सांति री संधि नी करणी। पर गिबोनियां नां री इक्क कनानी जाति ने यहोशू कने झूठ बोल्लेया कि सेह् कनान का दूर इक्क जगह रे रैह्णे वाले हिन। उन्हा ने यहोशू कने सांति संधि करणे री बिनत्ती कित्ती। यहोशू अते होर इस्राएली अगुवां ने परमेश्वर का नी पुच्छेया की उन्हा कने कै करणा चंहिदा। इसेरे बजाए, उन्हा ने गिबोनियां कने सांति री संधि करी लित्ती।

तिन्न दिन बाद, इस्राएलियां जो पता चलेया कि गिबोनी मणू कनान विच्च रैंह्दे थिये। सेह् गुस्सा होई गे किजोकी गिबोनियां ने उन्हा जो धोख्खा दित्तेया थिया। पर उन्हा ने उन्हेरे कने कित्ती री सांति संधि जो बणाए रख्खेया किजोकी सेह् परमेश्वर रे सामणे कित्ती गेई थी। तां किच्छ वक्त का बाद, कनान विच्च रैह्णे वाली इक्क होर जाति, एमोरियाँ रे राज्जेयां ने सुणेया कि गिबोनियां ने इस्राएलियां कने सांति री संधि करी लित्ती, इधेरे तांइ उन्हा ने अपणी-अपणी सेना जो इकठ्ठा करी के इक्क बड्डी सेना बणाई अते गिबोन पर हमला करी दित्तेया। गिबोनियां ने उन्हेरी मदत करणे तांइ यहोशू का इक्क बसेख भेज्जेया।

इधेरे तांइ यहोशू ने इस्राएलियां री सेना जो इकठ्ठा कित्तेया अते गिबोनियां का पुज्जणे तांइ तिन्हा ने पूरी रात सफर कित्तेया। तड़के भ्यागा उन्हा ने एमोरियां री सेना जो हैरान करी दित्तेया अते उन्हा पर हमला करी दित्तेया।

उस दिन परमेश्वर इस्राएलियां तांइ लड़ेया। उनिये एमोरियां जो डराई दित्तेया अते उनिये बड्डे-बड्डे ऐण रे गोले गिराई करी बड़े सारे एमोरियां जो मारी दित्तेया।

परमेश्वर ने सूरज जो भी आसमान विच्च इक्क जगह पर रोक्की दित्तेया ताकि इस्राएलियां जो ठीक वक्त मिली जाए कि एमोरियां जो पूरे तरिक्के कने हराई दित्तेया। उस दिन, परमेश्वर ने इस्राएलियां तांइ इक्क बड्डी जीत हासल कित्ती।

जां परमेश्वर ने उन्हा सेनाओं जो हराने का बाद, बड़े सारे कनानी जाति रे मणू इस्राएल पर हमला करणे तांइ इकठ्ठे होए। तां यहोशू अते इस्राएलियां ने हमला करी के उन्हा जो खत्म करी दित्तेया।

इन्हा लड़ाइयां का बाद, परमेश्वर ने इस्राएल रे हर इक्क गौत्र जो वादे रे उस देस विच्च उन्हा जो उन्हेरा हिस्सा दित्तेया। तां परमेश्वर ने इस्राएल जो उसेरी जमीन री सारी सीमा पर सांति दित्ती।

जां यहोशू सियाणा होई गेया तां उनिये इस्राएल रे सारे मणुआं जो इकठ्ठे सद्देया। तां यहोशू ने उन्हा मणुआं जो याद कराया कि उन्हाने उस वादे जो मनणे तांइ वादा कित्तेया थिया कि जे परमेश्वर ने उन्हेरे कने सीनै पहाड़ पर कित्तेया थिया। उन्हा मणुआं ने परमेश्वर रे अग्गे वफादार रैह्णे अते उसेरे नियमां जो मनणे रा वादा कित्तेया। यहोशू अध्याय 1-24 से एक बाइबल की कहानी यहोशू अध्याय 1-24 का बाइबल री इक्क कहाणी