16. छुटकारा करणे वाले

यहोशु रे मरणे का बाद, इस्राएलियां ने हुकम नी मन्ने। उन्हा ने परमेश्वर रे नियम जो नी मन्नेया, अते उन्हा ने बाक्की बच्चे रे कनानीयां जो वादे रे देस का बार नी निकालेया। इस्राएली मणू यहोवा, सच्चे परमेश्वर रे बजाए कनानी देवतेयां री पूजा करणा लगी पेह्। इस्राएलियां रा कोई राज्जा नी थिया, तां सारेयां ने जे उन्हा जो ठीक लगदा थिया सेह् उन्हा ने कित्तेया।

परमेश्वर रे हुकम नी मन्नी करी, इस्राएलियां ने अपणी रीती सुरु कित्ती जिस्सो उन्हा ने घड़ी-घड़ी कित्तेया। ए रीती किच्छ इस तरिक्के कने थी: इस्राएली परमेश्वर रे हुकम केई सालां तांइ नी मन्ने, फिरी परमेश्वर उन्हा जो उन्हेरे दुस्मणां का हराई करी सजा दिंदा थिया। ए दुस्मण इस्राएलियां का उन्हेरी चिज्जां चोरी करदे थिये, उन्हेरी जायदाद तबाह करदे, अते मतेयां जो मारी दिंदे थिये। इस्राएल दुस्मणां का सताए जाणे रे मते साल्लां का बाद, इस्राएली अपणे पाप्पां जो मंदे अते परमेश्वर जो बचाणे तांइ बोलदे।

हर वरी इस्राएलियां ने पाप्पां जो मन्नेया, ताकि परमेश्वर उन्हा जो छुड़ाए। ए उनिये इक्क छुटकारे दैणे वाले रे जरिये कित्तेया। इक्क मणू जे उन्हेरे दुस्मण कने लड़दा अते उन्हा जो हराई दिंदा। फिरी उसका बाद उत्ते सांति हूंदी अते छुड़ाणे वाला उन्हा पर राज भी करदा। परमेश्वर ने मते मणू भेज्जे जे मणुआं जो छुड़ाई सके। परमेश्वर ने ए इयां फिरी कित्तेया जां उनिये मिदिअनीयां, जे उन्हेरे पड़ोसी दुस्मण थिए, इस्राएलियां जो हराणे तांइ भेज्जेया।

मिद्दीयानी इस्राएलियां री सात्त साल री सारी फसलां लेई गे। इस्राएली मणू बड़े जादा डरे थिये, सेह् गुफा विच्च लुक्की गे ताकि मिद्दीयानी उन्हा जो तोप्पी ना सकण। आखरी विच्च, सेह् परमेश्वर रे सामणे मदत तांइ रोए।

गिदोन नां रा इक्क आदमी थिया। इक्क दिन, लुक्के री जगह, जित्ते का मिद्दीयानी चोरी ना करी सकण, विच्च सेह् अनाज जो साफ थिया करदा। यहोवा रा दूत गिदोन का आया अते बोल्लेया, “परमेश्वर तेरे कने है, ताकतवर योद्धा जा अते इस्राएल जो मिद्दीयानीयां का बचा।

गिदोन रे प्यो ने मूर्ति तांइ इक्क वेदी थी बणाए री। गिदोन जो परमेश्वर ने पैल्ली गाल्ल उसेरे प्यो री बणाई री वेदी तोड़ने जो बोल्लेया। पर गिदोन मणुआं का डरदा थिया, तां उनिये रात रे वक्त रा इन्तेजार कित्तेया। फिरी उनिये वेदी जो टुकड़ेयां विच्च तोड़ी दित्तेया। उनिये नेड़े ही परमेश्वर तांइ इक्क वेदी बणाई अते परमेश्वर तांइ बलि चढ़ाई।

अगली भ्यागा मणुआं ने दिख्खेया कि कुस्की ने वेदी जो तोड़ी दित्तेया, अते सेह् इस गाल्ल पर बड़े गुस्सा थिये। सेह् गिदोन रे टब्बर जो मारणे तांइ गे, पर गिदोन रे प्यो ने बोल्लेया, “तुसी अपणे देवते री मदत किज्जो हिन करदे? अगर सेह् परमेश्वर है, तां उस्सो अपणी रक्सा अपु करणा दो!” इसेरे ए बोलणे कने मणुआं ने गिदोन जो नी मारेया।

मिद्दयानी फिरी इस्राएलियां जो लुटणे जो आए। सेह् बड़े सारे मणू थिए कि उन्हेरी गिणती भी कित्ती नी जाई सके। गिदोन ने इसरालियां जो उन्हा कने लड़ने तांइ सद्देया। गिदोन ने परमेश्वर का दो चिन्ह जो मंगेया ताकि सेह् इस गाल्ल पर पक्का भरोसा करी ले कि परमेश्वर ने उस्सो इस्राएल जो बचाणे तांइ बोल्लेया।

पैल्ली निसानी तांइ, गिदोन ने इक्क भेड़ री चमड़ी फर्स पर रख्खी अते परमेश्वर जो बोल्लेया कि भ्यागा री ओस सिर्फ भेड़ री चमड़ी पर गिरे, ना कि फर्स पर। परमेश्वर ने तियां ही कित्तेया। अग्गली रात, उनिये बोल्लेया कि फर्स गिला हो पर भेड़ री चमड़ी नी। परमेश्वर ने फिरी तियां ही कित्तेया। इन्हा दो निसानी री वजह कने, गिदोन ने विश्वास कित्तेया कि परमेश्वर सच्ची चांह्दा कि सेह् इस्राएल जो मिद्दयानियां का बचाए।

तां गिदोन ने सपाहीयां जो अपणे आप का सदेया, अते 32,000 मरद आए। पर परमेश्वर ने उस्सो बोल्लेया कि ए मत्ते हिन। तां गिदोन ने 22,000 मरदां जो घरे भेज्जी दित्तेया, जे लडणे का डरे रे थिए। परमेश्वर ने गिदोन जो बोल्लेया कि ए हल्ले भी मते हिन। तां गिदोन ने 300 सपाहीयां जो रख्खी करी बाकि सारेयां जो घरे भेज्जी दित्तेया।

उस रात परमेश्वर ने गिदोन जो बोल्लेया, “थल्ले मिद्दयानी रे तम्बू का जा अते उन्हा जो गल्लां करदे सुण। जां तू उन्हा जो सुणगा कि सेह् कै बोलदे, तां तू उन्हा पर हमला करणे का जरा भी नी डरगा।” तां उस रात, गिदोन उन्हेरे तम्बू का थल्ले गेया अते मिद्दयानी सपाही जे अपणे दोस्त जो अपणे सूपणे रे बारे विच्च दस्सदे सुणेया। उस मणू रे दोस्त ने बोल्लेया, “इस सुपने रा मतलब कि गिदोन री सेना असां जो हराई दिंगी, मतलब कि मिद्दयानी सेना!’ जां गिदोन ने ए सुणेया, तां उनिये परमेश्वर री आराधना कित्ती।

ए गिदोन अपणे सपाही का वापस आया अते हर इक्क जो सिंग दित्तेया, इक्क मिट्टी रा भाण्डा, अते बलदी मसाल। जित्ते मिद्दयानी सपाही सोया करदे थिए उन्हा ने उन्हेरे तम्बू जो घेरी लित्तेया। गिदोन रे 300 सपाही ने मसालां अपणे मिट्टी रे भाण्डे विच्च रख्खी लित्ती ताकि मिद्दयानी उन्हेरी मसालां री रोसनी जो ना दिख्खी सकण।

तां, गिदोन रे सारे सपाहियां ने इक्क वक्त पर अपणे भाण्डे तोड़े, इक्क दम आग्ग री मसालां जो बार कड्डेया। उन्हा ने नरसिंगे विच्च फुक्क मारी अते चिल्लाए, “यहोवा अते गिदोन तांइ तलवार।”

परमेश्वर ने मिद्दयानियां जो उलझन विच्च पाई दित्तेया ताकि सेह् इक्क दुज्जे पर हमला करे अते इक्क दुज्जे जो मारी देण। इक्क दम गिदोन ने बसेख दैणे वाल्ले जो भेज्जेया कि सेह् इस्राएलियां जो उन्हेरे घरां का सदे अते उन्हेरी मदत करण मिद्दयानियां जो नस्साणे तांइ। उन्हेंने मत्ते जणेया मारी दित्तेया अते जे बची गे थिए उन्हा जो इस्राएलियां री जगह का नह्साया परमेश्वर ने उस दिन 120,000 मिद्दयानियां जो मारी दित्तेया। इस तरिक्के कने परमेश्वर ने इस्राएल जो बचाया।

मणू चांह्दे थिए कि गिदोन उन्हेरा राज्जा बणे। गिदोन ने उन्हा जो ए करणे का मन्हा कित्तेया, पर उनिये सबना का सोन्ने री अंगूठी मंगी जे उन्हा ने मिद्दयानी का लित्ती थी। मणुआं ने गिदोन जो बड़ा जादा सोन्ना दित्तेया।

तां गिदोन ने सेह् सोन्ना इक्क खास कपड़े बनाणे तांइ इस्तेमाल कित्तेया जियां बड्डा परोत पाया करदे थिए। पर मणुआं ने उसेरी पूजा करणा सुरु करी दित्तेया कि सेह् जियां इक्क मूर्ति थी। तां परमेश्वर ने इस्राएल जो फिरी का सज्जा दित्ती किजोकी उन्हा ने मूर्ति री पूजा कित्ती थी। परमेश्वर ने फिरी होणा दित्तेया कि सेह् अपणे दुस्मणां का हारे। आखरी विच्च उन्हा ने फिरी का परमेश्वर का मदत मंगी, अते परमेश्वर ने इक्क होर मणू जो भेज्जेया जे उन्हा जो छुडाई सके।

एही गाल्ल कई वरी होई इस्राएली पाप करदे, परमेश्वर उन्हा जो सज्जा दिंदा, सेह् फिरी पाप्पां री तौबा करदे, अते परमेश्वर फिरी का कुस्सी जो उन्हेरे छुटकारे तांइ भेज्जदा। कई सालां तांइ, परमेश्वर ने कई मणू भेज्जे जिन्हा ने उन्हा जो उन्हेरे दुस्मणां का छुड़ाया।

आखरी विच्च, मणुआं ने परमेश्वर का इक्क राज्जे जो मंगेया जियां होर देस का राज्जे थिए। सेह् इक्क इदेया राज्जा चाहंदे थिए जे लम्बा अते ताकतवर, अते जे उन्हा जो लडाई विच्च अगुवाई करी सके। परमेश्वर जो ए बिनती पसंद नी आई, पर उनिये उन्हा जो इक्क राज्जा देई दित्तेया जदेया सेह् चांह्दे थिए।

न्यायीयों 1-3; 1 शमुएल 1-10 विच्च का बाइबल री इक्क कहाणी