18. बंड्डिते रे देस

दाऊद राज्जा ने चाली साल्लां तांइ राज कित्तेया। तां सेह् मरी गेया, अते उसेरे मुंडे सुलैमान ने इस्राएल पर राज्ज करणा सुरु कित्तेया। परमेश्वर ने सुलैमान कने गाल्ल कित्ती अते उसका पुच्छेया कि सेह् सबका जादा कै चांह्दा कि परमेश्वर उसेरे तांइ करे। सुलैमान ने परमेश्वर का मंगेया कि सेह् उस्सो बड़ा जादा बुद्धिमान बणाई दे। इस गाल्ल ने परमेश्वर जो खुस कित्तेया, इधेरे तांइ परमेश्वर ने सुलैमान जो दुनिया रा सबका बुद्धिमान मरद बणाई दित्तेया। सुलैमान ने मत्ती सारी गल्लां जो सिख्खेया अते सेह् इक्क बुद्धिमान राज्जा थिया। परमेश्वर ने उस्सो बड़ा जादा अमीर भी बणाई दित्तेया थिया।

यरूशलेम विच्च सुलैमान ने उस मंदिर जो बणाया जिसेरे तांइ उसेरे प्यो ने योजना बनाई थी अते समान जो इकठ्ठा कित्तेया थिया। अवे मणू मिलाप वाले तम्बू रे बजाए मंदिर विच्च परमेश्वर री आराधना करदे थिए अते उसेरे तांइ बलि चढ़ांदे थिए।परमेश्वर मंदिर विच्च हाजिर रैंह्दा थिया, अते उत्ते सेह् अपणे मणुआं कने रैंह्दा थिया।

पर सुलैमान ने दुज्जे देसां री जनानियां कने प्यार कित्तेया। उनिये मत्ती सारी, लगभग 1,000 जनानियां कने ब्याह करी के परमेश्वर रे हुकम जो नी मन्नेया। इन्हा विच्च का मत्ती सारी पराए देसां का आई अते अपणे देवतेयां जो कने लियाई अते उन्हेरी पूजा करणा जारी रख्खेया। जां सुलैमान बुजुर्ग होई गेया तां उनिये भी उन्हेरे देवतेयां री पूजा कित्ती।

इस वजह कने परमेश्वर सुलैमान कने गुस्सा थिया। उनिये बोल्लेया कि सेह् इस्राएल देस जो दो हिस्सेयां विच्च बंड्डी करी उस्सो सजा दिंग्गा। सेह् सुलैमान रे मरणे रे बाद इयां करगा।

सुलैमान रे मरणे रे बाद, रहबाम राज्जा बणेया। इस्राएल देस रे सब मणू उस्सो अपणे राज्जे रे रुप विच्च स्वीकार करणे तांइ सब इकठ्ठे होए। उन्हा ने रहबाम का सिकायत कित्ती कि सुलैमान ने उन्हा का बड़ी जादा मेहनत कराई थी अते बड़ा जादा पैसा वसूलेया थिया। उन्हा ने रहबाम का बिनत्ति कित्ती कि उन्हा का घाट्ट काम्म कराए।

पर रहबाम ने उन्हा जो बड़ी ही बेवकूफी कने जबाव दित्तेया, “तुसी बोलदे कि मेरे प्यो सुलैमान ने तुसा का बड़ा जादा काम्म कराया। पर मैं तुसा का उसका भी जादा काम्म करवांगा, अते मैं तुसा जो उसका भी जादा दुखी करगा।”

जां मणुआं ने उस्सो इयां बोलदे सुणेया ता उन्हा विच्च का केईयां ने उसेरे खिलाफ बलवा कित्तेया। दास्स गौत्रां ने उस्सो छड्डी दित्तेया; उस कने अवे सिर्फ दो गौत्र ही बचे। इन्न दोनां गौत्रां ने अपणे आप जो यहूदा रा देस बोल्लेया।

बाकी रे दास्स गौत्रां ने यारोबाम नां रे इक्क मरद जो अपणा राज्जा बणाई लित्तेया। ए गौत्र देस उत्तर-पूर्वी रे हिस्से विच्च थिया। उन्हा ने अपणे आप जो इस्राएल देस बोल्लेया।

पर यारोबाम ने परमेश्वर रे खिलाफ बलवा कित्तेया अते मणुआं का पाप करवाया। उनिये अपणे मणुआं रे जरिये पूजा करणे तांइ दो मूर्तियाँ जो बणाया। सेह् अवे यहूदा रे देस यरूशलेम विच्च परमेश्वर रे मंदिर विच्च उसेरी आराधना करणे तांइ नी गे।

यहूदा अते इस्राएल रे देस अप्पू विच्च दुसमण बणी गे अते अक्सर इक्क दुज्जे रे खिलाफ लड़ना लगे।

इस्राएल रे नौए देस विच्च, सारे ही दुष्ट राज्जे थिए। इन्हा विच्च का केई राज्जे उन्हेरी जगह पर राज्जा बणने री चाह् रख्खणे वाले होर इस्राएलियां रे जरिये मारे गे थिए।

इस्राएल देस रे सारे ही राज्जेयां ने अते जादातर मणुआं ने मूर्तियां री पूज्जा कित्ती। जां उन्हा ने इयां कित्तेया, तां से अक्सर वेश्यां रे कने सोए अते इत्ते तांइ कि कई बारी मूर्तियां रे आग्गे बच्चेयां री बलि भी दित्ती।

यहूदा देस रे राज्जा, दाऊद रे वंशज थिए। इन्हा राज्जेयां विच्च का केई भले मणू थिए जिन्हा ने सच्चे न्याय कने राज कित्तेया अते परमेश्वर री आराधना कित्ती। पर यहूदा रे जादातर राज्जा दुष्ट थिए। उन्हा ने दुष्टता कने राज कित्तेया, अते मूर्तियाँ री पूजा कित्ती। इत्ते तांइ कि इन्हा विच्च का किच्छ राज्जेयां ने झूठे देवतेयां रे आग्गे अपणे बच्चेयां जो बलि भी करी दित्तेया। यहूदा रे जादातर मणुआं ने भी परमेश्वर रे खिलाफ बलवा कित्तेया अते होर देवतेयां री पूजा कित्ती। 1 राजा अध्याय 1-6; 11-12 से एक बाइबल की कहानी 1 राजा अध्याय 1-6; 11-12 बाइबल री इक्क कहाणी