19. भविष्यद्वक्ता

परमेश्वर हमेसा इस्राएलियां का भविष्यद्वक्तां जो भेज्जदा रैंदा थिया। भविष्यद्वक्ता परमेश्वर रे बसेख जो सुणादे थिए अते फिरी उस्सो मणुआं जो दस्सदे थिए।

जां अहाब इस्राएल देस पर राज्जा थिया तां उस वक्त एलिय्याह भविष्यद्वक्ता थिया। अहाब इक्क बुरा मणू थिया। उनिये झूठ्ठे बाल देवता री पूजा करवाणे तांइ मणुआं जो मजबूर कित्तेया थिया। इधेरे तांइ एलिय्याह ने अहाब जो बोल्लेया कि परमेश्वर उन्हा मणुआं जो सजा दैणे जाया करदा है। उनिये उस जो बोल्लेया, “जां तांइ मैं फिरी बरखा होणे तांइ ना बोलूं तां तांइ इस्राएल देस विच्च ना बरखा हूणी अते ना ही ओस पैणी।” इस गाल्ल कने अहाब जो इतणा गुस्सा दिलाई दित्तेया कि उनिये एलिय्याह जो मारी रख्खणे रा फैसला कित्तेया।

इधेरे तांइ परमेश्वर ने एल्लियाह जो बोल्लेया कि सेह् जंगल विच्च जाई करी लुक्की जाए। एलिय्याह जंगल विच्च उस पाणी रे सोते का गेया जित्ते परमेश्वर ने जाणे तांइ दस्सेया थिया। रोज भ्यागा अते शाम, पक्सी एल्लियाह तांइ रोटी अते मांस लेई करी आंदे थिए। इस पूरे वक्त विच्च, अहाब अते उसेरी सेना एलिय्याह री तोप विच्च लगी रेह्ई, पर सेह् उस्सो तोप्पी नी पाए।

बरखा ना होणे री वजह कने पाणी रा सोता सुक्की गेया। इधेरे तांइ एलिय्याह अपणे नेड़े इक्क देस विच्च चली गेया। उस देस विच्च इक्क गरीब विधवा थी जिसेरा इक्क मुंडा थिया। उन्हेरे का खाणे री चिज्जां लगभग खत्म होई गेई थी, किजोकी उत्ते कोई फसल नी उगी थी। पर फिरी भी, उस जनानी ने एलिय्याह री देखभाल कित्ती, इधेरे तांइ परमेश्वर ने उसेरी अते उसेरे मुंडे री जरुरतां जो पूरा कित्तेया, इस वजह कने उसेरे आटे रा भाण्डा अते उसेरे तेल री कुप्पी कदी भी खाली नी होई। उस पूरे अकाल रे दौरान उन्हा का रोटी थी। एलियाह किच्छ सालां तांइ उत्ते ही रुकी रेह्या।

साढ़े तिन्न सालां का बाद, परमेश्वर ने एलिय्याह जो बोल्लेया कि सेह् फिरी का बरखा करगा। उनिये एलिय्याह जो वापस इस्राएल रे देस विच्च जाई करी अहाब कने गाल्ल करणे तांइ बोल्लेया। इधेरे तांइ एलिय्याह अहाब का गेया। जां अहाब ने उस्सो दिख्खेया तां उनिये बोल्लेया,”अच्छा तू है, मुसीबत पैदा करणे वाला।” एलिय्याह ने जवाब दित्तेया, “मुसीबत पैदा करणे वाला ता तू है! तैं यहोवा जो छड्डी दित्तेया। सेई सच्चा परमेश्वर है, पर तू बाल री पूजा करेया करदा है। अवे तिज्जो इस्राएल देस रे सारे मणुआं जो कर्मेल पहाड़ पर लेई करी आणा है।”

इधेरे तांइ सारे मणू कर्मेल पहाड़ जो गे। सेह् मरद भी आए जे बोलदे थिए कि सेह् बाल रे बसेख जो बोलदे थिए। ए बाल रे भविष्यद्वक्ता थिए। सेह् सारे 450 थिए। एलिय्याह ने मणुआं जो बोल्लेया, “कधाड़ी तांइ तुसी अपणे मनां जो परमेश्वर का दूर रख्खगे? अगर यहोवा परमेश्वर है ता उसेरी आराधना करो! अगर बाल परमेश्वर है ता उसेरी पूजा करो!”

तां एलिय्याह ने बाल रे भविष्यद्वक्ता जो बोल्लेया, “इक्क बैल जो बलि करी के उसेरे मांस जो बलिदान होणे तांइ इक्क वेदी पर रख्खो, पर आग्ग मत लगांदे। उसेरे बाद मैं भी तियां ही करगा, अते इक्क अलग वेदी पर मैं उस मांस जो रख्खगा। तां अगर परमेश्वर वेदी पर आग्ग सुटदा है तां तुसी जाणी लैणा कि सेह् सच्चा परमेश्वर है।” तां बाल रे भविष्यद्वक्तां ने इक्क बलि जो तियार कित्तेया पर आग्ग नी लगाई।

तां बाल रे भविष्यद्वक्तां ने बाल का प्रार्थना कित्ती, “ओ बाल, असा री सुण!” पूरे दिन उन्हा ने प्रार्थना कित्ती अते चिलांदे अते इत्ते तांइ कि अपणे आप जो छुरियां कने कटी लित्तेया, पर बाल ने जवाब नी दित्तेया, अते उनिये कोई आग्ग नी सुट्टी।

बाल रे भविष्यद्वक्तां ने बाल का प्रार्थना करणे विच्च लगभग पूरा दिन लगाई दित्तेया। आखरी विच्च उन्हा ने प्रार्थना करणा बांद्द करी दित्तेया। तां एलिय्याह ने दुज्जे बैल रे मांस जो परमेश्वर री वेदी पर रख्खी दित्तेया। उसेरे बाद, उनिये मणुआं का पाणी रे बड्डे भाण्डेयां जो उस बलिदान पर तां तांइ रख्खणे तांइ बोल्लेया जां तांइ कि मांस, लकड़ियां, अते इत्ते तांइ कि वेदी रे नेड़े री जमीन पूरे तरिक्के कने गीली नी होई गेई।

तां एलिय्याह ने प्रार्थना कित्ती, “ओ यहोवा, अब्राहम, इसहाक, अते याकूब रे परमेश्वर, असा जो दस्सो कि तुसी इस्राएल रे परमेश्वर हिन अते ए कि मैं तुसा रा दास है। मिंजो जवाब दो जिस कने कि ए मणू जाणी लैण कि तुसी ही सच्चे परमेश्वर हिन।”

इकदम ही, आसमान का आग्ग पेई अते उनिये मांस , लकड़ियां, पहाड़ां, मिट्टी, अते इत्ते तांइ कि वेदी रे आसपास रा पाणी भी फुक्की दित्तेया। जां मणुआं ने ए दिख्खेया, सेह् जमीन पर गिरी गे अते बोल्ले, “यहोवा ही परमेश्वर है! यहोवा ही परमेश्वर है!”

तां एलिय्याह ने बोल्लेया, “बाल रा इक्क भी भविष्यद्वक्ता बची करी नी जाणे पाए!” इधेरे तांइ मणुआं ने बाल रे भविष्यद्वक्तां जो पकड़ी लित्तेया अते उन्हा जो उत्ते का दूर लेई गे अते उन्हा जो मारी दित्तेया।

तां एलिय्याह ने अहाब राज्जा जो बोल्लेया, “जल्दी अपणे घर जो नह्सी जा, किजोकि बरख्खा होणे वाली है।” जल्दी ही बदल घणे होई गे, अते बड़ी तेज बरख्खा सुरु होई गेई। यहोवा उस अकाल जो खत्म करेया करदा थिया। इस कने पत्ता चलेया कि यहोवा ही सच्चा परमेश्वर है।

जां एलिय्याह ने अपणे काम्म जो खत्म करी दित्तेया, तां परमेश्वर ने एलिशा नां रे इक्क मरद जो अपणा भविष्यद्वक्ता होणे तांइ चुणी लित्तेया। परमेश्वर ने एलिशा रे जरिए बड़े चमत्कार कित्ते। इक्क चमकार नामान कने होया थिया। सेह् इक्क दुस्मण री सेना रा सरदार थिया, पर उस्सो चमड़ी री इक्क बुरी बमारी होई गेई थी। नामान ने एलिशा रे बारे विच्च सुणेया थिया, इधेरे तांइ सेह् एलिशा का आया अते उस्सो उसेरी बमारी जो ठीक करणे तांइ बिनत्ती कित्ती। एलिशा ने नामान जो बोल्लेया कि जाई करी यरदन नदी रे पाणी विच्च सात्त बारी डुबकी लगाई लै।

नामान गुस्सा होई गेया। उनिये इयां करणे का मन्हा करी दित्तेया, किजोकी ए उस्सो बेवकूफी रा काम्म लगदा थिया। पर बाद विच्च उनिये अपणे मन जो बदलेया अते जाई करी यरदन नदी विच्च सात्त बरी डुबकी लगाई। जां आखरी बारी सेह् पाणी का बार निकलेया तां परमेश्वर ने उस्सो ठीक करी दित्तेया।

परमेश्वर ने इस्राएल रे मणुआं का होर भविष्यद्वक्तां जो भी भेज्जेया। उन्हा सारेयां ने मणुआं जो मूर्तियाँ री पूजा बांद्द करणे तांइ बोल्लेया। इसेरे बजाए, उन्हा जो इक्क दुज्जे कने न्याय कने सलूख करणा चंहिदा अते इक्क दुज्जे पर दया करणी चंहिदी। उन्हा भविष्यद्वक्तां ने मणुआं जो चेतावनी दित्ती कि उन्हा जो बुरे कम्मां जो करणा बांद करणा चंहिदा अते इसेरे बजाए परमेश्वर री गल्लां रा पालन करणा है। अगर उन्हा मणुआं ने इदेया नी कित्तेया तां परमेश्वर उन्हा जो दोसी जाणी करी उन्हेरा न्याय करगा, अते उन्हा जो सजा दिंगा।

जादातर वक्त, उन्हा मणुआं ने परमेश्वर रे हुकमां जो नी मन्नेया। अक्सर उन्हा ने भविष्यद्वक्तां कने बुरा सलूख कित्तेया अते इत्ते तांइ कि उन्हा जो मारी रख्खेया। इक्क बरी, उन्हा ने यिर्मयाह भविष्यद्वक्ता जो सुक्के कुएँ विच्च पाई दित्तेया अते उस्सो उत्ते मरणे तांइ छड्डी दित्तेया। सेह् कुएं रे अंदर चिकड़ विच्च फसी गेया थिया। पर तां राज्जा जो उस पर दया आई अते उनिये अपणे सिपाहियां जो हुकम दित्तेया कि यिर्मयाह रे मरणे का पैल्ले उस्सो कुएं का बार निकाली ले।

भविष्यद्वक्तां ने परमेश्वर रे पास्से का बोलणा जारी रख्खेया भले ही मणुआं ने उन्हा का नफरत कित्ती। उन्हा ने मणुआं जो चेतावनी दित्ती कि अगर उन्हा ने पाप करणा बांद्द नी कित्तेया ता परमेश्वर ने उन्हा जो खत्म करी दैणा। उन्हा ने मणुआं जो ए भी याद कराया कि परमेश्वर ने उन्हा तांइ मसीह जो भेज्जणे रा वादा कित्तेया है। 1 राजा अध्याय 16-18; 2 राजा 5; यिर्मयाह 38 से एक बाइबल की कहानी 1 राजा अध्याय 16-18; 2 राजा 5; यिर्मयाह 38 का बाइबल री इक्क कहाणी