20. गुलामी अते उत्ते का वापस आणा

इस्राएल रे देस अते यहूदा रे देस दोन्नां ने परमेश्वर रे खिलाफ पाप कित्तेया। उन्हा ने उस वादे जो तोड़ी दित्तेया जे परमेश्वर ने उन्हेरे कने सीनै पहाड़ पर कित्तेया थिया। परमेश्वर ने उन्हा जो उन्हेरे पाप्पां जो छडणे तांइ अते फिरी का उसेरी आराधना करणे तांइ चेतावनी दैणे तांइ भविष्यद्वक्तां जो भेज्जेया, पर उन्हा ने उन्हेरी गल्लां जो मनणे का मन्हा करी दित्तेया।

इधेरे तांइ परमेश्वर ने उन्हेरे दुस्मणां जो सक्तिसली बणाया ताकि उन्हेरे जरिये उन्हा जो खत्म करी के दोन्नां देसां जो सजा दित्ती। अश्शूर इक्क होर देस थिया जे बड़ा सक्तिसली होई गेया थिया। सेह् दुज्जे दोन्नां देसां कने बड़ा निर्दयी भी थिया। उन्हा ने इस्राएल रे देसां जो खत्म करी दित्तेया। अश्शूरियां ने आई करी इस्राएल रे देस विच्च मते सारेयां जो मारी दित्तेया, जे चाह्या सेह् लुटी लित्तेया, अते देस रे केई हिस्सेयां जो फुक्की दित्तेया।

अश्शूरियां ने सब प्रधानां, अमीर मणुआं, अते इदेय मणुआं री मैंह्गी चिज्जाँ बणाई सकदे थिए, सबनां जो इकठ्ठा कित्तेया अते सेह् उन्हा जो अश्‍शूर देस लेई गे। इस्राएल विच्च सिर्फ किच्छ गरीब इस्राएली ही बची थिए।

फिरी अश्शूरी मणू उस देस विच्च रैह्णे तांइ विदेसियां जो लेई करी आए। उन्हा विदेसियां ने उन सैह्रां जो फिरी का बणाया। जे इस्राएली उत्ते बची गे थिए उन्हा ने बचे रे इस्राएली कने ब्याह कित्तेया। इन्हा मणुआं रे वंशज सामरी जाणे गे।

यहूदा रे देस रे मणुआं ने दिख्खेया कि कियां परमेश्वर ने उस पर भरोसा ना करणे अते उसेरी गल्लां जो ना मनणे रे वजह कने इस्राएल रे देस रे मणुआं जो सजा दित्ती थी। पर तां भी उन्हा ने कनानियां रे देवतेयाँ री मूर्तियाँ री पूजा कित्ती। परमेश्वर ने उन्हा जो चेतावनी दैणे तांइ भविष्यद्वक्तां जो भेज्जेया, पर उन्हा ने उन्हेरी सुनणे का मन्हा करी दित्तेया।

लगभग सौ सालां रे बाद अश्शूरियां ने इस्राएल रे देस जो खत्म करी दित्तेया। परमेश्वर ने बेबीलोन रे राज्जा, नबूकदनेस्सर जो यहूदा रे देस पर हमला करणे तांइ भेज्जेया। बेबीलोन इक्क सक्तिसाली देस थिया। यहूदा रा राज्जा नबूकदनेस्सर रा दास बणने अते हर साल उस्सो बड़े जादा पैसे रा भुगतान करणे तांइ राजी होई गेया।

पर किच्छ साल्लां रे बाद, यहूदा रे राज्जा ने बेबीलोन रे खिलाफ बलवा कित्तेया। इधेरे तांइ बेबीलोनियां ने वापस आई करी यहूदा रे देस पर हमला करी दित्तेया। उन्हा ने यरुशलेम सैह्र पर कब्जा करी लित्तेया, मंदिर जो तबाह करी दित्तेया, अते सैह्र अते मंदिर रे खजाने जो लुट्टी करी लेई गे।

बलवा करणे री वजह कने यहूदा रे राज्जा जो सजा दैणे तां, नबूकदनेस्सर रे सिपाहियां ने राज्जा रे पुत्तर जो उसेरे सामणे मारी दित्तेया अते फिरी उस्सो अह्न्ना करी दित्तेया। इसेरे बाद, सेह् राज्जे जो लेई गे ताकि सेह् बेबीलोन रे जेलखाने विच्च मरी जाए।

नबूकदनेस्सर अते उसेरी सेना यहूदा रे देस रे लगभग सारे ही मणुआं जो बेबीलोन लेई गे, सिर्फ सबका गरीब मणुआं जो पिच्छे छड्डी करी ताकि सेह् खेतां विच्च फसल उगाण। वक्त रे इस काल जो गुलामी बोल्लेया गेया है। जिस विच्च परमेश्वर रे मणुआं जो वादे रे देस का निकाली जाणे तांइ मजबूर कित्तेया गेया थिया।

भले ही परमेश्वर ने अपणे मणुआं जो उन्हेरे पाप तांइ गुलामी विच्च लेई जाणे रे जरिये सजा दित्ती, तां भी सेह् उन्हा जो या अपणे वादे जो नी भुल्लेया थिया। परमेश्वर ने अपणे मणुआं री निगरानी करणा नी छड्डेया अते अपणे भविष्यद्वक्तां रे जरिये उन्हा कने गल्लां कित्ती। उनिये वादा कित्तेया कि सत्तर सालां रे बाद, सेह् फिरी का वादे रे देस विच्च वापस आंगे।

लगभग सत्तर सालां रे बाद, फारस रे राज्जा कुस्रू ने बेबीलोन जो हराई दित्तेया, इधेरे तांइ बेबीलोन रे सम्राज्य रे बजाए फारस रे सम्राज्य ने केई देसां पर राज कित्तेया। इस्राएली मणू अवे यहूदा जाणे जांदे थिए। उन्हा विच्च का मत्तेयां ने अपणी पूरी जिंदगी बेबीलोन विच्च बिताई दित्ती थी। सिर्फ थोड़े यहूदियां जो ही यहूदा रा देस याद थिया।

फारसी मणू बड़े जादा ताकतवर थिए, पर उन्हा ने अपणे जिते रे मणुआं पर दया कित्ती थी। फारसी मणुआं रा राज्जा बणने रे किच्छ वक्त का बाद, कुस्रू ने इक्क आदेस दित्तेया कि कोई भी यहूदी जे यहूदा जो वापस जाणा चांह्दा थिया, सेह् फारस का निकली करी वापस यहूदा जो जाई सकदा है। इत्ते तांइ कि उनिये उन्हा जो मंदिर जो फिरी का बणाणे तांइ पैसे भी दित्ते। इधेरे तांइ गुलामी रे सत्तर सालां रे बाद, यहूदियां रा इक्क छोटा झुंड यहूदा विच्च यरूशलेम विच्च वापिस आया।

जां सेह् मणू यरूशलेम पुज्जे तां उन्हा ने मंदिर जो अते सैह्र रे चारों पास्से री दवार जो फिरी का बणाया। फारसी मणू हाल्ले भी उन्हा पर राज करदे थिए पर इक्क वरी फिरी का सेह् वादे रे देस विच्च रेह् थिए अते मंदिर विच्च आराधना कित्ती थी। 2 राजा अध्याय 17; 24-25; 2 इतिहास 36; एज़्रा 1-10; नहेम्याह 1-13 से एक बाइबल की कहानी 2 राजा अध्याय 17; 24-25; 2 इतिहास 36; एज़्रा 1-10; नहेम्याह 1-13 का बाइबल री इक्क कहाणी