21. परमेश्वर मसीह रा वादा करदा है

जां परमेश्वर ने दुनियां जो बणाया थिया, सेह् जाणदा थिया कि उस्सो बाद विच्च कुस्सी दिन मसीह जो भेज्जणा पैणा। उस विच्च आदम अते हवा कने वादा कित्तेया थिया कि सेह् इयां करगा। उनिये बोल्लेया कि हव्वा रा इक्क वंशज पैदा हूणा जे साँप रे सर जो कुचलगा। जिस साँप ने हव्वा जो धोख्खा दित्तेया सेह् पक्का ही शैतान थिया। परमेश्वर रा मतलब थिया कि मसीह पूरे तरिक्के कने शैतान जो हराई दिंगा।

परमेश्वर ने अब्राहम कने वादा कित्तेया थिया कि उसेरे जरिये दुनियां री सारी जातियां असीस पांगी। परमेश्वर बाद विच्च कुस्सी वक्त मसीह जो भेजणे रे जरिये इस वादे जो पूरा करगा। सेह् मसीह दुनियां री हर इक्क जाति विच्च का मणुआं जो उन्हेरे पाप का छुड़ांगा।

परमेश्वर ने मूसा कने वादा कित्तेया थिया कि भविष्य विच्च सेह मूसा सांइ इक्क होर भविष्यद्वक्ता जो भेजगा। ए भविष्यद्वक्ता मसीह हूंगा। इस तरिक्के कने, परमेश्वर ने फिरी का वादा कित्तेया कि सेह् मसीह जो भेजगा।

परमेश्वर ने राज्जा दाऊद कने वादा कित्तेया थिया कि उसेरा इक्क वंशज मसीह हूणा। सेह् राज्जा हूंगा अते परमेश्वर रे मणुआं पर हमेसा तांइ राज करगा।

परमेश्वर ने यिर्मयाह भविष्यद्वक्ता कने गाल्ल कित्ती अते बोल्लेया कि इक्क दिन सेह् इक्क नौआ वादा करगा। सेह् नौआ वादा इस्राएल कने सीनै पहाड़ पर कित्ते रे पुराणे वादे सांइ नी हूंगा। जां मणुआं कने सेह् अपणे नौआ वादे जो करगा, तां सेह् उन्हा पर अपणे आप जो व्यक्तिगत रुप कने प्रगट करगा। हर इक्क मणू उस कने प्यार रख्खगा अते उसेरे नियम जो मनणे री इच्छा रख्खगा। परमेश्वर ने बोल्लेया कि ए उसेरे नियम रा उन्हेरे दिलां पर लिख्खी दैणे सांइ हूंणा। सेह् उसेरे मणू हूणे, अते परमेश्वर उन्हेरे पाप्पां जो माफ करगा। सेह् मसीह हूणा जे उन्हा कने नौए वादे जो करगा।

परमेश्वर रे भविष्यद्वक्तां ने ए भी बोल्लेया कि मसीह इक्क भविष्यद्वक्ता हूणा। इक्क भविष्यद्वक्तां सेह् मणू है जे परमेश्वर रे वचनां जो सुणदा है अते फिरी मणुआं जो परमेश्वर रे बसेख दस्सदा है। जिस्सो भेजणे रा वादा परमेश्वर ने कित्तेया थिया सेह् मसीह इक्क भविष्यद्वक्ता हूणा। मतलब सेह् मसीह परमेश्वर रे बसेख जो खरे तरिक्के कने सुणांगा, अते सेह् मणुआं जो उन्हा बसेखां जो खरे तरिक्के सिख्खांगा।

इस्राएली परोतां ने मणुआं तांइ परमेश्वर रे अग्गे बलिदान चढ़ाणा बांद्द नी कित्ते। ए बलिदान मणुआं रे पाप्पां तांइ उन्हा जो परमेश्वर रे जरिये सजा दैणे री जगह पर चढ़ाए गे थिए। परोतां ने मणुआं तांइ प्रार्थना भी कित्ती। पर, सेह् मसीह सिद्ध बड़ा परोत हूणा जे परमेश्वर जो दैणे वाली बलि तांइ इक्क सिद्ध बलि रे रुप विच्च अपणे आप जो चढ़ाई दिंगा। अते, सेह् कदी पाप नी करगा, अते जां सेह अपणे आप जो बलि होणे तांइ दिंगा, तां दुनियां जो होर कोई भी बलि दैणे री जरूरत नी पैणी।

मणुआं रे झुंड पर राज्जा अते प्रधान राज करदे हिन, अते कदी-कदी सेह् गलतियां करदे हिन। राज्जा दाऊद ने सिर्फ इस्राएलियां पर राज कित्तेया, पर राज्जा दाऊद रा वंशज पूरी दुनियां पर राज करगा, अते सेह् हमेसा तांइ राज करगा। इसेरे अलावा, सेह् हमेसा न्याय कने राज करगा, अते सही फैसले जो लिंगा।

परमेश्वर रे भविष्यद्वक्तां ने मसीह रे बारे विच्च बड़ी सारी गल्लां बोल्ली। उदाहरण तांइ, मलाकी ने बोल्लेया कि मसीह रे आणे का पैल्ले इक्क होर भविष्यद्वक्ता आणा। सेह् भविष्यद्वक्ता बड़ा खास हूणा। इसेरे अलावा, यशायाह भविष्यद्वक्ता ने लिख्खेया कि मसीह इक्क कुँआरी का पैदा हूणा। अते मीका भविष्यद्वक्ता ने बोल्लेया कि मसीह बैतलहम सैह्र विच्च पैदा हूणा।

यशायाह भविष्यद्वक्ता ने बोल्लेया कि मसीह गलील नां री जगह विच्च वास करगा। जे मणू बड़े दुखी हिन मसीह उन्हा जो सांति दिंगा। सेह् कैदियां जो भी आजाद करगा। मसीह बमारां जो अते जे सुणी नी सकदे, दिख्खी नी सकदे, बोल्ली नी सकदे, या चली नी सकदे उन्हा जो भी ठीक करगा।

यशायाह भविष्यद्वक्ता ने ए भी बोल्लेया कि मणू मसीह का नफरत करगे अते उस्सो अपनाणे का मन्हा करी दिंगे। होर भविष्यद्वक्ता ने बोल्लेया कि मसीह रा इक्क साथी उसेरे खिलाफ होई जाणा। जकर्याह भविष्यद्वक्ता ने बोल्लेया कि उसेरा ए साथी इयां करणे तांइ दुज्जे मणुआं का चांदी रे तीह् सिक्के लिंगा। इसेरे अलावा, किच्छ भविष्यद्वक्ता ने बोल्लेया कि मणू मसीह जो मारी रख्खगे, अते ए कि सेह् उसेरे कपड़ेयां तांइ जुआ खेलगे।

भविष्यद्वक्तां ने ए भी बताया कि मसीह कियां मरगा। यशायाह ने भविष्यद्वाणी कित्ती कि मणू मसीह पर थुकगे, उसेरा मजाक उड़ांगे, अते उस्सो मारगे। सेह् उस्सो छेदी दिंगे अते सेह् बड़ी पीड़ा अते यातना विच्च मरी जांगा, जां कि उनिये किच्छ भी गलत नी कित्तेया हूणा।

भविष्यद्वक्तां ने ए भी द्स्सेया कि मसीह पाप नी करगा। सेह् सिद्ध हूणा। पर सेह् इधेरे तांइ मरगा परमेश्वर उस्सो होर मणुआं रे पाप री वजह कने सजा दिंगा। उसेरे मरणे री वजह कने मणू परमेश्वर रे कने मेल मिलाप करणे विच्च सक्षम हूंगे। इधेरे तांइ परमेश्वर चांह्दा कि मसीह मरे।

भविष्यद्वक्तां ने ए भी बोल्लेया कि परमेश्वर मसीह जो मरेयां विच्च का जिंदा करगा। ए दस्सदा कि ए सब नौए वादे परमेश्वर री योजना थी, ताकि सेह् उन्हा मणुआं जो बचाई सके जिन्हा ने उसेरे खिलाफ पाप्प कित्तेया है।

परमेश्वर ने भविष्यद्वक्तां पर मसीह रे बारे विच्च बड़ी सारी गल्लां जो प्रकट कित्तेया, पर मसीह जां सेह् भविष्यद्वक्तां जिंदे थिए तिस वक्त नी आया थिया। इन्हा भविष्यद्ववाणी रे होणे रे 400 साल्लां का बाद, सही वक्त पर, परमेश्वर मसीह जो दुनियां विच्च भेजगा। उत्पत्ति 3:15; 12:1-3; व्यवस्थाविवरण 18:15; 2 शमूएल 7; यिर्मयाह 31; यशायाह 59:16; दानिय्येल 7; मलाकी 4:5; यशायाह 7:14; मीका 5:2; यशायाह 9:1-7; 35:3-5; 61; 53; भजन संहिता 22:18; 35:19; 69:4; 41:9; जकर्याह 11:12-13; यशायाह 50:6; भजन संहिता 16:10-11 से एक बाइबल की कहानी उत्पत्ति 3:15; 12:1-3; व्यवस्थाविवरण 18:15; 2 शमूएल 7; यिर्मयाह 31; यशायाह 59:16; दानिय्येल 7; मलाकी 4:5; यशायाह 7:14; मीका 5:2; यशायाह 9:1-7; 35:3-5; 61; 53; भजन संहिता 22:18; 35:19; 69:4; 41:9; जकर्याह 11:12-13; यशायाह 50:6; भजन संहिता 16:10-11 का बाइबल री इक्क कहाणी