50. यीशु रा वापस आणा

लगभग 2,000 सालां का, पूरे संसार विच्च जादा का जादा मणू, यीशु जे मसीह है तिसेरे बारे विच्च खुशखबरी हिन सुणदे। कलीसिया बढ़ेया करदी है। यीशु ने वादा कित्ता की तिसने संसार रे अंत तक वापस आणा। फिरी भी सेह् हल्ले तक नी आया, पर तिसने अपणा वादा पूरा करणा।

जियां असि यीशु जो भालदे हिन, परमेश्वर चांह्दा की असी इक्क पवित्र जीवन जीण जे तिसजो आदर दिंदा हो| सेह् भी चांह्दा की असी दुज्जेयां जो तिसेरे राज्य रे बारे विच्च दसण। जिस बेल्ले यीशु जमीन पर रैंह्दा थिया, तिसने बोल्लेया, "मेरे चेल्लेयां ने परमेश्वर रे राज्य री खुशखबरी रे बारे विच्च मणुआं जो संसार विच्च हर जगह प्रचार करणा, अते तिस बेल्ले अन्त हूणा।

मते मणुआं ने हल्ले तांइ यीशु रे बारे नी है सुणे रा। स्वर्ग वापस जाणे का पैल्ले यीशु ने अपणे पिच्छे चलणे वालेयां जो बोल्लेया की जिन्हा ने खुशखबरी जो कदी नी सुणया तिन्हा जो दस्सो। तिसने बोलेया, "जाओ अते सब जाति चिच्च चेले बणाओ!" अते “खेतर पक्की गेय रे हिन कटणी तांइ।"

यीशु ने ए भी बोल्लेया, "इक्क आदमी रा दास अपणे मालक का बड्डा नी हूंदा। इस्स संसार रे बड्डे मणुआं ने मेरे कने नफरत कित्ती, अते तिन्हा ने तुसा जो भी मेरी वजह कने सताणा अते मारी दैणा। इस्स संसार विच्च तुसा परशानी झेलणी, पर हिम्मत मत हारो, किजोकी मैं शैतान जो हराई बैठ्ठे रा है जे इस्स संसार पर राज करदा। जे तुसी मेरे तांइ अन्त तांइ ईमानदार हूंगे, ता परमेश्वर ने तुसा जो बचाणा>"

यीशु ने अपणे चेल्लेयां जो इक्क कहाणी सुणाई ए समजाणे तांइ की मणुआं जो कै हूणा जिस बेल्ले संसार रा अन्त हूणा। तिसने बोल्लेया इक्क आदमी ने अपणे खेतर विच्च खरे बीज बोय। जिस बेल्ले सेह् सोया थिया करदा, तिसेरा दुस्मण आया अते तिसने कणक रे बीज रे विच्च जंगली घा रे बीज बोई करी चली गेया।

जिस बेल्ले पौधे उगे, ता तिस आदमी रे नौकर ने बोल्लेया, “मालक तैं खरे बीज थिये बोये रे खेत्तर विच्च। ता फिरी जंगली घा किजो है इत्ते?" आदमी ने जवाब दित्ता, सिर्फ मेरे दुस्मण ए बीज बोई सकदे। मेरे दुस्मणां विच्च का इक्क ने इयां कित्ता।"

"नौकरां ने अपणे मालक जो बोलेया, "असी जंगली घा पुट्टी दैण?" मालक ने बोलेया, "ना"। जे तुसी इयां कित्ता, ता तुसी कणक भी पुट्टी दैणी। कटणी रे बेल्ले तक भालो। फिरी जंगली घा जो इक्क ढेर लाई करी इकठ्ठी करी लेयो ताकी तुसी तिसजो फुक्की सको। पर कणक मेरे का लेई आओ अते खत्ते विच्च रख्खो।"

चेल्ले कहाणी रा मतलब नी समजे, तां तिन्हा यीशु जो बोल्लेया तिन्हा जो समझाणे री दरखावास कित्ती। यीशु ने बोल्लेया, "अच्छा बीज बोणे वाला मणू मसीह जो बतांदा। खेत्तर संसार जो बतांदा। अते खरा बीज परमेश्वर रे राज्य रे मणुआं जो बतांदा।"

" जंगली घा उन्हा मणुआं जो बतांदा जे शैतान रे मणुआं प्रतिनिधित्व करदे हिन। उस मणू रा दुस्मण शैतान रा प्रतिनिधित्व करदा, जिसने जंगली घा बोया थिया। कटणी दुनियां रा अन्त बतांदी, अते कटणे वाले परमेश्वर रे स्वर्गदूत जो बतांदे हिन।"

जिस बेल्ले दुनियाम रा अन्त हूणा, स्वर्गदुतां ने उन्हा सारे मणुआं जो इकठ्ठे करणा जे शैतान रे हिन। स्वर्गदुतां ने तिन्हा जो धधकती आग्ग विच्च सुट्टी दैणा। तित्ते तिन्हा मणुआं ने रोणा, अते अपणे दुख पीड़ा विच्च उन्हा ने अपणे दंद्दा जो पीह्णा। पर जे मणू नेक हिन, जे यीशु रे पिच्छे चले, तिन्हा ने उन्हेरे परमेश्वर पिता रे राज्य विच्च सूरज सांइ चमकणा।"

यीशु ने ए भी बोल्लेया कि तिसने दुनियां रे खत्म हूणे का पैल्ले धरती जो वापस हटणा। तिसने तियां ही वापस हटणा जियां सेह् गेया थिया। मतलब तिसेरा असली शरीर हूणा, अते तिसने आसमान विच्च बद्दलां पर आणा। जिस बेल्ले यीशु ने वापस आणा, यीशु रे पिच्छे चलणे वाला हर मणू जे मरी गेया तिसने मुर्देयां का जी उठणा अते तिसजो आसमान विच्च मिलणा।

यीशु रे पिच्छे चलणे वाले जे हल्ले भी जिन्दे हिन सेह् आसमान विच्च उठाई लित्ते जाणे अते तिन्हा दुज्जे मसीहियां कने जाई मिलणा जे मुर्दे का जिन्दा होये। सेह् सारे यीशु कने तित्ते हूणे। जियां तिन्हा इकठ्ठे रैह्णा तिन्हा जो हमेशा तांइ पूरी शान्ति मिलणी।

यीशु ने हर इक्क जो मुकुट दैणे रा वादा कित्ता जिन्हा ने तिस पर विश्वास कित्तेया। तिन्हा ने परमेश्वर कने हरेक चीज पर हमेशा तांइ राज करणा। तिन्हा जो सिद्ध शान्ति मिलणी।

पर परमेश्वर ने उन्हा सारेयां रा न्याय करणा जिन्हा ने यीशु पर विश्वास नी कित्तेया तिसने तिन्हा जो नरक विच्च सुट्टी दैणा। तित्ते तिन्हा ने रोणा अते अपणे दांद्द पीह्णे, अते हमेशा तांइ दुख सैह्णा। आग्ग जे कदी भी नी बुझणी, तिन्हा जो लगातार फुकदे रैह्णा, अते कीड़ेयां ने तिन्हा जो कदी भी खाणा बांद्द नी करणा।

जिस बेल्ले यीशु ने वापस आणा, तिसने शैतान अते तिसेरे राज्य जो पूरी तरह नष्ट करी दैणा। तिसने शैतान जो नरक विच्च सुट्टी दैणा। शैतान ने हमेशा तांइ उन्हा मणुआं कने फुकीणा जिन्हा परमेश्वर जो मनणे रे बजाये तिसेरे पिच्छे चलणा चुणेया।

किजोकी आदम अते हव्वा ने परमेश्वर रा हुकम नी मन्नेया अते पाप जो दुनियां विच्च लियाए। परमेश्वर ने इसजो श्राप दित्ता अते इसजो नष्ट करणे रा फैसला लेया। पर इक्क दिन परमेश्वर ने नौया स्वर्ग अते नौई धरती रचणी जे सिद्ध होणी।

यीशु अते तिसेरे मणुआं ने नौई धरती पर रैह्णा, अते तिसने हमेशा तांइ सब चिज्जां पर राज करणा। तिसने मणुआं री हाख्खियां का हर इक्क आंसू पुंज्जी दैणा। कुस्की ने भी कदी कोई दुख नी सैह्णा अते ना उदास हूणा तिन्हा ने रोणा नी। तिन्हा ने बमार नी होणा ना मरणा। अते तित्ते कोई बुराई नी हूणी। यीशु ने अपणे राज्य विच्च न्याय अते शान्ति कने राज करणा। तिसने अपणे मणुआं कने हमेशा तांइ रैह्णा। मत्ती 24:14; 28:18; यूहन्ना 15:20, 16:33; प्रकाशितवाक्य 2:10; मत्ती 13:24-30, 36-42; 1 थिस्सलुनीकियों 4:13-5:11; याकूब 1:12; मत्ती 22:13; प्रकाशितवाक्य 20:10, 21:1-22:21 से एक बाइबल की कहानी मत्ती 24:14; 28:18; यूहन्ना 15:20, 16:33; प्रकाशितवाक्य 2:10; मत्ती 13:24-30, 36-42; 1 थिस्सलुनीकियों 4:13-5:11; याकूब 1:12; मत्ती 22:13; प्रकाशितवाक्य 20:10, 21:1-22:21 विच्च का बाइबल री इक्क कहानी