49. परमेश्वर रा नौआ वादा

इक्क स्वर्गदूत ने इक्क जुआन जनानी मरियम जो बोलेया, की तिसने परमेश्वर रे पुत्र जो जन्म दैणा। सेह् तिस बेल्ले कुवांरी थी, पर पवित्र आत्मा उसका आया अते सेह् दुप्राणी होई गेई। तिसने इक्क मुंडा जम्मेया अते तिसेरा नां यीशु रख्खेया। इस्स तांइ यीशु परमेश्वर अते मणू दोन्नों ही है।

यीशु ने मते चमत्कार कित्ते जे ए दसदा की सेह् परमेश्वर है। सेह् पाणी पर चलेया अते आंधी जो रोक्केया। तिसने मते बमार मणू ठीक कित्ते अते मतेयां का दुष्ट आत्मा निकाली। तिसने मुर्दे जिन्दा कित्ते अते तिसने पांज्ज रोटियां अते दो छोट्टी मच्छियां का 5,000 मणुआं जो रोटी खुआई।

यीशु इक्क बड्डा गुरु भी थिया। जे किच्छ भी तिसने सिखाया सेह् बिल्कुल सही सिखाया। मणुआं जो ओ करणा चंहिदा थिया जे सेह् बोलदा थिया किजोकी सेह् परमेश्वर रा पुत्र है। जियां की तिसने सिखाया की तुसा जो दुज्जेयां जो भी प्यार करणा चंहिदा जियां असी अपु जो प्यार करदे।

तिसने ए भी सिखाया की तुसा जो परमेश्वर जो कुस्की भी चीज का जादा प्यार करणा चंहिदा। अपणी जमीन जायेदाद का भी जादा।

यीशु ने बोल्लेया की संसार विच्च असा का सब किच्छ होणे का अच्छा है की असी परमेश्वर रे राज्य विच्च होण। परमेश्वर ने तुसा जो पाप का जरुर बचाणा की तुसी तिसेरे राज्ये विच्च आई सकण।

यीशु ने बोल्लेया किच्छ मणुआं ने तिसजो अपनाणा। परमेश्वर ने इन्हा मणुआं जो बचाणा। तां भी किच्छ मणुआं ने तिसजो नी अपनाणा। तिसने ए भी बोल्लेया की किच्छ मणू अच्छी मिट्टी सांइ हूंदे। किजोकी सेह् यीशु रे बारे खुशखबरी जो अपनांदे, परमेश्वर तिन्हा जो बचांदा। जदकी बाकि मणू रस्ते री सख्त मिट्टी सांइ हूंदे। परमेश्वर रा वचन उस सांइ भी है जे रस्ते पर पैंदा, पर तित्ते किच्छ नी उगदा। इदेये मणू यीशु रे बारे विच्च बसेख जो नी अपनांदे। सेह् तिसेरे राज्य विच्च आणे जो ना करी दिंदे।

यीशु ने ए सिखाया की परमेश्वर पाप्पियां जो बड़ा प्यार करदा। सेह् तिन्हा जो माफ करणा चांह्दा अते अपणे बच्चे बणाणा चांह्दा।

यीशु ने असा जो ए भी दस्सेया की परमेश्वर पाप जो नफरत करदा। किजोकी आदम अते हव्वा ने पाप कित्ता, अते तिन्हेरे सारे वंशजां ने भी पाप कित्तेया। संसार विच्च हर इक्क मणू पाप करदा अते परमेश्वर का दूर है। हर इक्क परमेश्वर रा दुस्मण है।

पर परमेश्वर ने इस्स दुनियां विच्च हर इक्क जो इयां प्यार कित्तेया। तिसने अपणा इकलौता पुत्र देई दित्ता, ता की परमेश्वर उन्हा जो सजा ना दे जिन्हा ने यीशु पर विश्वास कित्तेया। इसेरे बजाये विश्वासियां ने तिस कने हमेशा तांइ रैणा।

तुसी मरणे रे हकदार हिन किजोकी तुसा ने पाप कित्तेया। तुसा परमेश्वर रा गुस्सा हूणा ठीक थिया, पर इसेरे बजाए, सेह् यीशु पर गुस्सा होया। उसने यीशु जो सूली पर मौत देई करी सजा दित्ती।

यीशु ने कदी भी पाप्प नी कित्तेया। उसने पाप री सजा जो अते सबका भयंकर मौत जो स्वीकारेया। इयां करी के, सेह् इक्क सिद्ध बलिदान होया तुसा रे पाप्पां जो अते संसार विच्च हर इक्क मणू रे पाप्पां जो दूर करणे तांइ। यीशु ने परमेश्वर जो अपणा बलिदान देई दित्तया, इधेरे तांइ परमेश्वर कोई भी पाप जो, इत्ते तक भयंकर पाप्पां जो माफ करदा।

चाए तुसी मते खरे काम्म करण, इस्स कन्ने परमेश्वर ने तुसा जो नी बचाणा। इदेया किच्छ भी नी है जे तुसी अपणे आप करी सकण यीशु रे मित्र बणने तांइ। इसेरे बजाये तुसा जो विश्वास करणा चंहिदा यीशु परमेश्वर रा पुत्र है, अते सेह् तुसा री जगह सूली पर मरी गेया, अते परमेश्वर ने तिसजो फिरी का जीवन दित्ता। जे तुसी ए विश्वास करगे ता परमेश्वर ने तुसा जो पाप्प करणे तांइ माफ करी दैणा।

परमेश्वर ने हर इक्क जो बचाणा जिसने यीशु पर विश्वास करणा अते तिसजो अपणा प्रभु मन्नेया। पर तिसने तिन्हा जो नी बचाणा जिन्हा ने तिस पर विश्वास नी कित्तेया। ए कोई माइने नी रख्खदा की तुसी पैसे वाले हिन, गरीब हिन, आदमी या जनानी, सियाणे या जुआन, या तुसी कुते रैंह्दे हिन। परमेश्वर तुसा कने प्यार करदा अते चांह्दा की तुसी यीशु पर विश्वास करण ताकि सेह् तुसा रा मित्र बणी सके।

यीशु तुसा जो सददा है तिस पर विश्वास करणे तांइ अते बपतिस्मा दैणे तांइ। कै तुसी ए विश्वास करदे की यीशु ही मसीह है, अते परमेश्वर रा इकलौता पुत्र है? कै तुसी ए विश्वास करदे की तुसी इक्क पाप्पी हिन अते परमेश्वर री सजा तुसा रे पाप्पां तांइ मिलणी चंहिदी? कै तुसी ए विश्वास करदे की यीशु सूली पर मरेया तुसा रे पाप्प दूर करणे तांइ?

जे तुसी यीशु पर अते जे तिसने तुसा तांइ कित्तेया उस पर विश्वास करदे हिन, अते तुसी इक्क मसीही हिन। शैतान तुसा पर अवे कोई राज नी करदा अपणे अंधकार रे राज्य विच्च। अवे परमेश्वर तुसा पर राज करदा है अपणे रौशनी रे राज्य विच्च। परमेश्वर ने तुसा जो इदेया बणाई दित्ता की अवे तुसी फिरी का पाप नी करण जियां तुसी पैल्ले करदे थिये। तिसने तुसा जो जिन्दगी जीणे रा इक्क नौआ अते सही रस्ता देई दित्ता।

जे तुसी यीशु रे पिच्छे चलणे वाले हिन, ता परमेश्वर तुसा रे पाप्प माफ करी दित्तेया है, किजोकी यीशु ने जे कित्ता। अवे परमेश्वर तुसा जो अपणा दुस्मण समजणे रे बजाये अपणा मित्र समजदा।

जे तुसी परमेश्वर रे मित्र हिन, अते यीशु रे सेवक हिन, ता तुसा ने ओ सारी गल्लांमनणे री इच्छा रख्खणी जे यीशु ने तुसा जो सिखाई। भले ही तुसी इक्क मसीही हिन, शैतान ने तुसा जो पाप्प करणे तांइ ललचाणा। पर परमेश्वर हमेशा ओ करदा जे से बोलदा की तिसने करणा है। सेह् बोलदा जे तुसी अपणे पाप्पां जो मन्नी लिंगे ता तिसने तुसा जो माफ करी दैणा। तिसने तुसा जो पाप कने लड़ने री सामर्थ दैणी।

परमेश्वर तुसांजो प्रार्थना करणे तांइ ते तिसेरे वचनां जो पड़णे तांइ बोलदा। से तुसांजो ऐ बी बोलदा की तिसेरी अराधना करो , यीशु रे दुज्जे मनणे वालेयां कने इकठ्ठे मिली करी। तुसांजो दुज्जे लोक्कां जो बी दसणा चायिदा की तिसने तुसां तांइ क्या कित्तेया। जे तुस्सी ऐ सारी चीज्जां करगे तां तुस्सी तिसेरे पक्के मित्र बणी जाणा। रोमियों 3:21-26, 5:1-11; यूहन्ना 3:16; मरकुस 16:16; कुलुस्सियों 1:13-14; 2 कुरिन्थियों 5:17-21; 1 यूहन्ना 1:5-10 से एक बाइबल की कहानी बाइबिल री कहाणी : उत्पत्ति 3; मत्ती 13:4, मरकुस 10:17-31; लुका 2; 10:25-37; 15, यहुन्ना 3:16; रोमियों 3:21-26, 5:1-11; 2 कुरिन्थियों 5:17-21; कुलुस्सियों 1:13-14; 1यूहन्ना 1:5-10