48. यीशु ही वादा कितेरा मसीह है

जिस बेल्ले परमेश्वर ने दुनियां बणाई, तां सब किच्छ अच्छा थिया। आदम अते हव्वा इक्क दुज्जे कने प्यार करदे थिये अते परमेश्वर कने प्यार करदे थिये। कोई बमारी अते मौत नी थी। परमेश्वर इदेया संसार चांह्दा थिया।

शैतान ने हव्वा कने बग्गीचे विच्च साँप रे जरिये गाल्ल कित्ती किजोकी सेह् तिसजो धोख्खा दैणा चांह्दा थिया। फिरी तिसने अते आदम ने परमेश्वर रे खिलाफ पाप कित्ता। किजोकी तिन्हा ने पाप कित्ता, तां हर कोई धरती पर मरणा लगेया।

किजोकी आदम अते हव्वा ने पाप कित्तेया थिया, इधेरे तांइ किच्छ होर भी बुरा होया। सेह् परमेश्वर रे दुस्मण बणी गे। तिसेरा ए परिणाम होया, तां का हर कोई पाप करणा लगेया। हर इक्क मणू जन्म का परमेश्वर रा दुस्मण है। परमेश्वर अते मणुआं विच्च शान्ति नी थी। पर परमेश्वर शान्ति चांह्दा थिया।

परमेश्वर ने वादा कित्ता की हव्वा रे इक्क वंशज ने शैतान रा सिर कुचली दैणा, उनिये ए भी बोल्लेया कि शैतान उसेरी एड़ी जो डस्से। दुज्जे शब्दां विच्च शैतान ने मसीह जो मारी दैणा, पर परमेश्वर ने तिसजो फिरी का जिन्दा करी दैणा। मसीह ने शैतान री शक्ति हमेशा तांइ लेई जाणी। मत्ते सालां बाद परमेश्वर ने ए दस्सेया की मसीह ही यीशु है।

परमेश्वर ने नूह जो किस्ती बनाणे जो बोलेया की तिसेरे परिवार जो बाड़ का बचाई ले जे सेह् भेजणे वाला थिया। इयां परमेश्वर ने उन्हा मणुआं जो बचाया जे तिस पर विश्वास करदे थिये। तियां ही हर कोई परमेश्वर रे पास्से का मौत रा भागीदार है किजोकी तिन्हा ने पाप कित्तेया। पर परमेश्वर ने यीशु जो सबणा जो बचाणे तांइ भेज्जेया जे तिस पर विश्वास करदे।

सौ सालां तक परोत परमेश्वर तांइ बली चढ़ांदे रेह्। इस कने ए पता चलदा की मणुआं ने पाप कित्ता अते सेह् परमेश्वर री सजा रे भागीदार हिन। पर सेह् बलियां तिन्हेरे पाप माफ नी करी सकदी। यीशु ने ओ कित्तेया जे परोत नी करी सकदे थिये। तिसने अपणे आप जो बलि तांइ देई दित्ता जे सबणा रे पाप दूर करी सकदा थिया। तिसने सेह् सजा अपणे उप्पर लेई लित्ती जे असा जो असा रे पाप्पां तांइ मिलणी थी। इस वजह कने यीशु सबका बड्डा परोत थिया।

परमेश्वर ने अब्राहम जो बोलेया ,"मैं तेरे जरिए धरती रे सारे मणुआं जो असीस दैणी। “यीशु इस्सी आब्राहम रा वंशज थिया। परमेश्वर अब्राहम रे जरिये सारे कुलां जो असीस दिंदा है, किजोकी परमेश्वर हर इक्क जो बचान्दा जे यीशु पर विश्वास करदा। जिस बेल्ले कोई मणू यीशु पर विश्वास करदा ता परमेश्वर तिसजो अब्राहम रा वंशज मंदा।

परमेश्वर ने अब्राहम जो अपणे मुंडे जो, उसेरे तांइ बलि करणे तांइ बोलेया। पर फिरी परमेश्वर ने इसहाक रे बदले विच्च बलि करणे तांइ इक्क छेलु दित्ता। असी सारे अपणे पाप्पां री वजह कने मरणे रे लायक हिन। पर परमेश्वर ने यीशु जो असा री जगह बलि तांइ मरणे जो देई दित्ता। इस्स तांइ असी यीशु जो परमेश्वर रा छेलु बोलदे हिन।

जिस बेल्ले परमेश्वर ने मिस्र पर आखरी बिपत्ता भेजी थी, तिसने इस्राइली परिवारां जो इक्क छेलु मारणे जो बोलेया। सेह् छेलु बिल्कुल ठीक-ठाक हूणा चंहिदा। फिरी तिन्हा जो तिसेरा खुन अपणे दरवज्जे रे आस्से-पास्से अते उप्पर लगाणा थिया। जिस बेल्ले परमेश्वर ने सेह् खुन दिख्खेया सेह् तिन्हेरे घरां रे उप्पर का चली गेया अते तिन्हेरे पैहलौठेयां जो नी मारेया। जिस बेल्ले इयां होया, ता परमेश्वर ने इसजो फसह रा पर्व बोलेया।

यीशु फसह रे पर्व रे छेलु सांइ है| तिसने कदी भी पाप नी कित्ता, इधेरे तांइ तिस विच्च किच्छ भी गलत नी थिया। सेह् फसह रे पर्व रे बेल्ले मारेया गेया थिया। जिस बेल्ले कोई यीशु पर विश्वास करदा, यीशु रा खून तिस मणू रे पाप्पां जो लेई लिंदा अते मिटाई दिंदा। ए तियां है जियां की परमेश्वर तिस मणू रे करीब का होई करी चली गेया, किजोकी सेह् तिसजो सजा नी दिंदा।

परमेश्वर ने इस्राएलियां कने वादा थिया कित्ते रा किजोकी सेह् ओ मणू थिये जे परमेश्वर ने अपणे तांइ चुणे रे थिये। पर परमेश्वर ने नौआ वादा कित्ते रा है जे हर इक्क तांइ है। चाए कोई भी है जे, सेह् इस्स नौए वादे जो अपनांदा ता सेह् परमेश्वर रे मणुआं विच्च जुड़ी जांदा सेह् इयां इस्स तांइ करदा किजोकी सेह् यीशु पर विश्वास करदा।

मूसा इक्क भविष्यवक्ता थिया जिसने परमेश्वर रा वचन बड़ी सामर्थ कने सुणाया। पर यीशु सबनां का बड्डा भविष्यवक्ता है। सेह् परमेश्वर है, अते सारी चिज्जाँ जे तिसने कित्तियां अते बोली सेह् परमेश्वर रे काम्म अते वचन थिये। इस्स तांइ पवित्र शास्त्र यीशु जो परमेश्वर रा वचन बोलदा।

परमेश्वर ने दाऊद कने वादा कित्ता की तिसेरे वंशज विच्च का इक्क हूणा, जिसने परमेश्वर रे मणुआं पर राज्जा बणी करी हमेशा तांइ राज करणा। यीशु परमेश्वर रा पुत्र है अते मसीह है, इधेरे तांइ सेह् दाऊद रा वंशज है जे हमेशा तांइ राज करी सकदा।

दाऊद इस्रायल रा राज्जा थिया। पर यीशु पूरी सृष्टि रा राज्जा है। तिसने फिरी आणा अते अपणे राज्य पर न्याय अते शान्ति कने हमेशा तांइ राज करणा। उत्पत्ति 1-3, 6, 14, 22; निर्गमन 12, 20; 2 शमूएल 7; इब्रानियों 3:1-6, 4:14-5:10, 7:1-8:13, 9:11-10:18; प्रकाशितवाक्य 21 से एक बाइबल की कहानी उत्पत्ति 1-3,6,14,22; निर्गमन 12,20; 2शमुएल 7; इब्रानियों 3:1-6, 4:14-5:10, 7:1-8:13, 9:11-10:18; प्रकाशितवाक्य 21 विच्च का बाइबल री कहाणी