47. पौलुस अते सीलास फिलिप्पी बिच्च

जां शाऊल रोम रे साम्राज्य का होई करी थिया जाया करदा, ता तिसने अपणा रोम वाला नां, पौलुस चलाणा शुरु कित्ता। इक्क दिन पौलुस अते तिसेरा मित्र सीलास फिलिप्पी रे सैह्र जो गे, यीशु मसीह रे बारे खुशखबरी सुणाणे जो। सेह् सैह्र रे बार नदी रे कनारे का गे जित्ते मणू प्रार्थना करणे जो थिये कठितेरे। तित्ते सेह् इक्क जनानी कने मिले जिसेरा नां लुदिया थिया कने सेह् इक्क व्यापारी थी। सेह् परमेश्वर जो प्यार करदी थी अते आराधना करदी थी।

परमेश्वर ने लुदिया जो यीशु रे बारे बसेख पर विश्वास करणे तांइ सक्षम कित्ता। पौलुस अते सीलास ने तिसजो अते तिसेरे परिवार जो बपतिस्मा दित्ता। तिसने पौलुस अते सीलास जो अपणे घरे रैह्णे तांइ सद्देया, तां सेह् तित्ते रेह्।

पौलुस अते सीलास अकसर मणुआं कने उन्हा जगह पर मिलदे थिये जित्ते यहूदी प्रार्थना करदे थिये। हर रोज सेह् तित्ते चलदे थिये अते इक्क' दासी जिस विच्च दुष्ट आत्मा थी अते सेह् तिन्हेरा पिच्छा करदी थी। दुष्ट आत्मा रे जरिए सेह् मणुआं रा भविष्य दसदी थी, तां तिसने अपणे मालक अते भविष्य दसणे वाले तांइ बड़ा पैसा कमाया।

उन्हेरे जांदे बेल्ले ए दासी कुड़ी चिलांदी रैंह्दी थी, " ए मणू परमप्रधान परमेश्वर रे दास हिन। ए तुसा जो बचणे रे रस्ते रे बारे विच्च हिन दसदे।" सेह् हर रोज इयां करदी थी जिस कने पौलुस नराज होई गेया।

आखर विच्च, इक्क दिन उस दासी कुड़ी ने चिलाणा सुरु कित्ता, ता पौलुस तिस पास्से मुड़ेया अते तिस दुष्ट आत्मा जे तिस विच्च थी बोलेया, "यीशु रे नां का इस्स विच्च का निकली जा।" तिस्सी बेल्ले सेह् दुष्ट आत्मा तिस अंदर का चली गेई।

जे आदमी तिस दासी रे मालक थिये सेह् बड़े गुस्से होई गे| तिन्हा जो ए महसूस होया की बिना दुष्ट आत्मा रे सेह् दासी मणुआं रा भविष्य नी दस्सी सकदी। इसदा मतलब ए थिया अवे मणुआं ने तिसेरे मालकां जो भविष्य दसणे तांइ कोई पैसे नी दैणे।

तां सेह् तिस दासी रे मालक पौलुस अते सीलास जो रोमी अधिकारियां का लेई गेई , तिन्हा ने पौलुस अते सीलास जो कुट्टेया अते तिन्हा जो कैद खाने विच्च सुट्टी दित्ता।

तिन्हा ने पौलुस अते सीलास जो कैद खान्ने रे उस हिस्से विच्च पाया जित्ते मते सिपाई थिये। तिन्हा ने तिन्हेरी जंगा कने लकड़ी रे बड्डे टुकड़े बन्नी दित्ते। पर अध्धी रात्ती पौलुस अते सीलास परमेश्वर री महिमा रे भजन गांदे थिये।

इकदम, तित्ते बड्डे जोर रा हिल्लण होया। कैद खान्ने रे सारे दरवाज्जे खुल्ली गे अते सारे कैदियां रे संगल खुल्ली करी पेई गे।

फिरी दरोगा उठी गेया। तिसने दिख्खेया की कैद खान्ने रे सारे दरवज्जे खुल्ले थिये। तिसने सोच्चेया की सारे कैदी नह्सी गे। सेह् डरी गेया की रोम रे अधिकारियां ने तिसजो मारी दैणा किजोकी तिसने तिन्हा जो नह्साई दित्ता, तां सेह् अपणे आप जो मारणा लगी पेया। पौलुस ने तिसजो दिख्खी लेया अते चिल्लाया, "रुकी जा। अपणे आप जो मत मार, असी सारे इत्ते ही हिन।"

दरोगा कम्मणा लगेया अते सेह् पौलुस अते सीलास का आया अते पुच्छेया ,"मिंजो बचणे तांइ कै करणा चंहिदा?" पौलुस ने जवाब दित्ता, "यीशु पर विश्वास कर, तां तू अते तेरा परिवार बची जाणे।" फिरी सेह् दरोगा पौलुस अते सीलास जो अपणे घरे लेई गेया अते तिन्हेरे पैर धुआए। पौलुस ने यीशु रे बारे खुशखबरी घरे विच्च सबणा जो सुणाई।

दरोगा अते तिसेरे परिवार ने यीशु पर विश्वास कित्ता, तां पौलुस अते सीलास ने तिन्हा जो बपतिस्मा दित्ता। फिरी तिस दरोगा ने पौलुस अते सीलास जो रोट्टी खुआई अते सेह् इकठ्ठे बड़े खुश होए।

अगले दिन सैह्र रे अगुवेयां ने पौलुस अते सीलास जो छड्डी दित्ता अते तिन्हा जो फिलिप्पी सैह्र छडणे तांइ बोलेया। पौलुस अते सीलास, लुदिया अते होर मित्रां जो मिल्ले अते सैह्र छड्डी करी चली गे। यीशु रे बारे विच्च खुशखबरी फैलदी गेई अते कलीसिया बदधी गेई।

पौलुस अते दुज्जे अगुवे मते सैह्रां जो सफर करदे गे। तिन्हा ने यीशु रे बारे री खुशखबरी रा प्रचार कित्ता अते मणुआं जो सिखाया। तिन्हा ने मती सारी चिठ्ठियां भी लिख्खियां, कलिसियां विच्च विश्वासियां जो होंसला दैणे तांइ। किच्छ चिठ्ठियां बाईबल री कताबां बणी गेइयां। प्रेरितों के काम 16:11-40 से एक बाइबल की कहानी प्रेरितां रे काम्म 16:11-40विच्च का बाइबल री कहाणी