46. शाऊल रा यीशु रा चेल्ला बनणा

इक्क वरी इक्क आदमी थिया जिसेरा नां शाऊल थिया सेह् यीशु पर विश्वास नी करदा थिया। जिस बेल्ले सेह् जुआन आदमी थिया तिसने उन्हा आदमियां रे कपड़ेयां री निगरानी कित्ती जिन्हा ने स्तिफनुस जो मारेया थिया। बाद विच्च तिसने विश्वासियां जो परेसान कित्तेया। सेह् यरूशलेम विच्च घरे-घरे जाई करी जनानी अते मरद दोन्नों जो कैद विच्च पाणे तांइ पकड़ी लिंदा थिया। फिरी बड्डे परोत ने शाऊल जो यीशु रे पिच्छे चलणे वालेयां जो पकड़ने जो बोल्लेया अते तिन्हा जो यरूशलेम विच्च वापस लियाणे जो बोलेया।

ता शाऊल ने दमिश्क जाणे रा सफर शुरू कित्ती। सैह्र पुज्जणे का थोड़े पेल्ले, आसमान विच्च इक्क तेज रौसनी तिसेरे चारों पास्से फैली गेई, अते सेह् जमीन पर भुइयां पेई गेया। शाऊल ने कुस्की जो ए बोलदे सुणेया, "शाऊल! शाऊल! तू मिंजो किजो परेसान है करदा?" शाऊल ने पुच्छेया, “ओ प्रभु, तुसी कुण हिन, यीशु ने उसजो जवाब दित्ता, "मैं यीशु है। तू मिंजो किजो परेसान करेया करदा है।"

जिस बेल्ले शाऊल उठेया, तिसजो किच्छ बी नी थिया लिब्बेया करदा। तिसेरे मित्र तिसजो दमिश्क जो लेई गे। शाऊल ने त्रै दिनां तांइ किच्छ बी नी खाया पीत्ता।

दमिश्क विच्च हनन्याह नां रा इक्क चेल्ला थिया। परमेश्वर ने तिसजो बोल्लेया, "उस घरे जा जीत्ते शाऊल रेह्या करदा है। अपणा हात्थ तिस पर रख्ख ताकि सेह् फिरी का दिख्खी सके।" पर हनन्याह ने बोलेया, "स्वामी मैं सुणे रा है की इस्स आदमी ने कियां विश्वासियां जो परेसान कित्तेया। परमेश्वर ने तिसजो उत्तर दित्ता ,"जा| मै तिसजो यहूदियां विच्च अपणा नां दसणे जो अते जे मणू दुज्जी जाति रे हिन तिन्हा जो अपणा नां दसणे तांइ तिसजो चुणे रा है। तिसने मेरे नां पर मती गल्लां पर सताव सैहणा है।"

तां हनन्याह शाऊल का गेया, अपणे हात्थ तिस पर रख्खे, अते बोलेया, यीशु ने, जिन्ने इत्ते आंदे बेल्ले रस्ते विच्च तेरे पर प्रकट होया, मिंजो तेरे का भेज्जेया की तू फिरी का दिख्खी सके, अते तिज्जो पवित्र आत्मा कने भरी दे।" तिस्सी बेल्ले शाऊल फिरी का दिख्खणा लगेया, अते हनन्याह ने तिसजो बपतिस्मा दित्ता। फिरी शाऊल ने रोटी खायी अते सामर्थ पाई।

तिसका बाद ही दमिश्क रे यहूदियां विच्च शाऊल ने प्रचार करणा शुरू करी दित्ता। तिसने बोलेया ,"यीशु परमेश्वर रा पुत्र है।" यहूदी हैरान रेह्ई गे किजोकी शाऊल विश्वासियां जो मारदा थिया अते अवे सेह् यीशु पर विश्वास करणा लगे। शाऊल ने यहूदियां कने बैहस कित्ती तिसने दस्सेया की यीशु ही मसीह थिया।

मते दिनां बाद यहूदियां ने शाऊल जो मारणे री तरकीब सोची। तिन्हा ने किच्छ मणू सैह्र रे फाटक का भेज्जे शाऊल पर नजर रख्खणे तांइ ताकि सेह् तिसजो मारी सकण। पर शाऊल ने तिन्हेरी तरकीब रे बारे सुणी लेया थिया अते तिसेरे मित्रां ने तिसजो तित्ते का नह्सणे तांइ मदत कित्ती। इक्क रात तिसेरे मित्रां ने तिसजो टोकरी विच्च पाई करी सैह्र री दुआल का थल्ले लटकाई दित्ता। शाऊल रे दमिश्क का नह्सणे का बाद, सेह् यीशु रे बारे विच्च प्रचार करदा रेह्या।

शाऊल प्रेरितां का मिलणे तांइ यरूशलेम गेया, पर सेह् उसका डरदे थिये। तां बरनबास नां रा इक्क विश्वासी शाऊल जो प्रेरितां का लेई गेया। उनिये उन्हा जो दस्सेया कि शाऊल ने कियां हिम्मत दस्सी करी दमिश्क विच्च प्रचार कित्तेया थिया। उसेरे बाद, प्रेरितां ने शाऊल जो अपनाई लित्तेया।

किच्छ विश्वासी जे यरुशलेम विच्च थिये अते सताव का नह्सी करी बड़ी दूर अन्ताकिया रे सैह्र जो चली गे अते यीशु रा प्रचार कित्ता। अन्ताकिया रे जादातर मणू यहूदी नी थिये, पर पैल्ली वरी जे यहूदी नी थिये सेह् विश्वासी बणी गे। बरनबास अते शाऊल तित्ते गे अते नौए विश्वासियां जो यीशु रे बारे विच्च होर बी सिखाणे लगे, कलीसिया जो मजबूत बणाणे तांइ। ए अन्ताकिया विच्च थिया जे तित्ते रे विश्वासी पैल्ली वरी “ईसाई" बोले गे।

इक्क दिन अन्ताकिया विच्च यीशु जो मनणे वालेयां ने ब्रत थिया रख्खेरा, अते प्रार्थना थिये करदे। पवित्र आत्मा ने तिन्हा जो बोल्लेया, "बरनबास अते शाऊल जो मेरे काम्म करणे तांइ अलग करी देयो जे काम्म मैं तिन्हा जो करणे तांइ सद्दे रा है।" इधेरे तांइ अन्ताकिया विच्च कलीसिया ने बरनबास अते शाऊल पर अपणे हात्थ रख्खी करी प्रार्थना कित्ती। फिरी तिन्हा ने तिन्हा जो होर दुज्ज जगह विच्च प्रचार करणे तांइ अते यीशु रे बारे खुशखबरी सुणाणे जो भेजी दित्ता। बरनबास अते शाऊल ने मते मणुआं जो सिखाया अते मतेयां ने यीशु पर विश्वास कित्ता। प्रेरितों के काम 8:3; 9:1-31; 11:19-26; 13:1-3 से एक बाइबल की कहानी प्रेरितां रे काम्म 8:3; 9:1-31, 11:19-26; 13-14 विच्च इक्क बाइबल री कहाणी