45. स्तिफनुस अते फिलिप्पुस

पैल्ले मसीही अगुवां विच्च का का इक्क मणू जिसेरा नां स्तिफनुस थिया। सारे तिसेरी इज्जत करदे थिये पवित्र आत्मा ने तिसजो मती सामर्थ अते बुद्धी दित्ती। स्तिफनुस ने मते चमत्कार कित्ते। मते मणुआं ने तिस पर विश्वास करणे जो सिखाया।

इक्क दिन स्तिफनुस यीशु रे बारे विच्च सिखाया करदा थिया, किच्छ यहूदी जे यीशु पर विश्वास नी करदे थिये आए अते तिस कने बैहस करणा लगी पेह्। सेह् बड़े गुस्से होई गे अते सेह् धार्मिक अगुवेयां का गे अते तिन्हेरे बारे विच्च झूठ बोल्ले। तिन्हा ने बोल्लेया, "असा ने स्तिफनुस जो मूसा अते परमेश्वर रे बारे गलत गल्लां बोलदे सुणेया।" तां धार्मिक अगुवेयां ने स्तिफनुस जो पकड़ी लेया अते तिन्हा जो बड्डे परोतां का अते दुज्जे यहूदियां का लेई आये। मते झूठे गवाह आए अते स्तिफनुस रे बारे विच्च झूठ बोलेया।

बड्डे परोत ने स्तिफनुस का पुच्छेया, "कै ऐ मणू तेरे बारे विच्च सच्च हिन बोलदे?" स्तिफनुस मती गल्लां बोलणा लगेया, बड्डे परोत जो जवाब दैणे तांइ। तिसने बोलेया की परमेश्वर ने मते अदभुत काम्म हिन कित्ते रे इस्राइलियां तांइ, अब्राहम रे वक्त का लेई करी यीशु रे वक्त तक। पर मणुआं ने हमेशा ही परमेश्वर रा हुकम नी मन्नेया। स्तिफनुस ने बोल्लेया , "तुसी मणू परमेश्वर तांइ ढीट अते विरोधी हिन। तुसा ने हमेशा पवित्र आत्मा जो नकारेया, जियां असा रे पुरखेयां ने हमेशा परमेश्वर जो नकारेया अते तिसेरे भविष्यवक्ता जो मारेया। पर तुसा ने तिन्हा का भी बुरा काम्म कित्ता। तुसा ने मसीह जो मारेया।"

जिस बेल्ले धार्मिक अगुवेयां ने ए सुणेया, सेह् इतणे गुस्सा होए की तिन्हा ने अपणी कन्नां जो बांद्द करी लित्तेया अते तिसजो जोरे बकणा लगे। तिन्हा ने स्तिफनुस जो धरीड़ी करी सैह्र का बार लेई गे अते उसजो मारणे तांइ तिस पर बट्टे मारे।

स्तिफनुस मरणे वाला थिया, सेह् चिल्लाई उठया, "यीशु मेरी आत्मा जो लेई ले।" सेह् गोड्डेयां रे भारे बेई गेया अते फिरी का चिल्लाया, “मालक इन्हा जो तू माफ कर।" फिरी से मरी गेया।

तिस दिन यरुशलेम विच्च मते मणुआं ने यीशु रे पिच्छे चलणे वालेयां जो सताणा शुरू करी दित्ता, तां सेह् विश्वासी दुज्जी जगह जो नह्सी गे| पर बजाये इसेरे जित्ते भी सेह् गे तिन्हा ने यीशु रा प्रचार कित्तेया।

इक्क वरी इक्क यीशु रा विश्वासी थिया जिसेरा नां फिलिप्पुस थिया| सेह् यरुशलेम का नह्सी गेया जियां दुज्जे विश्वासी थिए नह्सदे। सेह् सामरियां रे इलाके विच्च गेया जित्ते तिसने मते मणुआं विच्च यीशु रा प्रचार कित्तेया अते बड़े जणेया ने विश्वास कित्तेया अते उद्धार पाया। इक्क दिन परमेश्वर ने इक्क स्वर्गदूत जो फिलिप्पुस का भेजेया अते जिसजो जंगल विच्च जाणे जो बोलेया अते इक्क रस्ते पर जाणे जो बोलेया| फिलिप्पुस तिते गेया। जियां सेह् तिस रस्ते पर चलेया करदा थिया, तिसने इक्क आदमी अपणे रथ पर जांदे दिख्खेया। ए मणू कुश देश रा बड्डा अधिकारी थिया। पवित्र आत्मा ने फिलिप्पुस जो बोलेया जा अते तिस मणू कने गाल्ल कर।

इधेरे तांइ फिलिप्पुस तिस रथ का गेया। तिसने तिस कुश देश रे मणू जो परमेश्वर रा वचन पड़दे दिख्खेया। सेह् भविष्यवक्ता यशायाह ने जे लिखेरा थिया सेह् पढ़दा थिया| मणू ने पढ़ेया, "सेह् उसजो वध कित्ते जाणी वाली भेड़ सांइ लेई गेया, अते जियां भेडू शांत रैंह्दा, तिसने भी इक्क शब्द नी बोलेया। तिन्हा ने तिसा कने अन्याय कित्ता अते तिसदा अनादर कित्तेया। तिन्हा ने तिसजो मारी दित्तेया।"

फिलिप्पुस ने तिस कुशी जो पुच्छेया, "तिज्जो समज आया जे तू पढ़दा है?" अते कुशी ने बोलेया ना।" मैं नी समजी सकदा जां तक मिंजो कोई ना समजाये। छंदे मेरे कने बेई जा। कै यशायाह अपणे बारे विच्च है लिखदा की कुस्की होर रे बारे?"

फिलिपुस रथ विच्च बेई गेया। फिरी तिसने तिस कुशी जो बोलेया यशायाह ने यीशु रे बारे विच्च लिखेया है। फिलिप्पुस ने परमेश्वर रे होर भी वचनां रे बारे विच्च तिसजो दस्सेया। इंया ही तिसने तिस मणु जो यीशु रे बारे सुब बसेख दस्सेया।

जियां ही फिलिप्पुस अते सेह् कुशी जाया करदे थिए, सेह् इक्क पाणी वाली जगह का आये। कुशी ने बोलेया, "दिख, इत्ते पाणी है। कै मैं बपतिस्मा लेई लेयां?" अते तिसने रथ चलाणे वाले जो रथ रोकणे जो बोलेया।

ता सेह् पाणी विच्च गेय अते फिलिप्पुस ने कुशी जो बपतिस्मा दित्ता। तिन्हेरे पाणी रे बार आणे का बाद, पवित्र आत्मा फिलिप्पुस जो कुस्की होर जगह लेई गेया। तित्ते फिलिप्पुस मणुआं जो यीशु रे बारे विच्च दसदा रेह्या।

कुशी अपणे घर रे सफर पर अग्गे बड़ी गेया। सेह् खुश थिया की तिसने यीशु जो जाणेया। प्रेरितों के काम 6:8-8:5; 8:26-40 से एक बाइबल की कहानी प्रेरितों रे काम्म 6:8-8:5; 8:26-40 का इक्क बाइबल री कहाणी