44. पतरस अते यूहन्ना रा बिखारी जो ठीक करणा

इक्क दिन पतरस अते यूहन्ना मंदर जो गे। इक्क पंगु आदमी फाटक का बेई करी भीख थिया मंगदा।

पतरस ने उस पंगु मणू जो दिख्खेया अते बोल्लेया, "मेरका तिज्जो दैणे तांइ कोई पैसा नी है। पर मैं तिज्जो ओ दैणा जे मेरका है। यीशु रे नां कने उठ अते चल।"

तिस्सी बेल्ले परमेश्वर ने तिस पंगु आदमी जो ठीक करी दित्ता। सेह् चलणा अते छाला मारणा लगेया। मंदर रे अंगणा विच्च खड़ितेरे मणू हैरान होई गे।

इकदम मणुआं री भीड़ उस मणू जो दिख्खणे तांइ आई जे ठीक कित्तेया गेया थिया पतरस ने तिन्हा जो बोल्लेया, ए मणू ठीक होई गेया पर इस गाल्ल पर हैरान मत हो। असा ने अपणी सामर्थ कने इसजो ठीक नी कित्ता, असी परमेश्वर रा आदर करदे। बल्कि ए यीशु है जिसने अपणी सामर्थ कने इस मणू जो ठीक कित्ता, किजोकी असी तिस पर विश्वास करदे।"

तुसी ओ हिन जिन्हा ने रोम री सरकार जो यिशु जो मारणे तांइ बोल्लेया। तुसा ने उस जो मारेया जे हर इक्क जो जीवन दिंदा। पर परमेश्वर ने तिसजो जिन्दा कित्तेया। तुसा जो समज नी आई की तुसी कै हिन करदे, पर जिस बेल्ले तुसा ने सेह् काम्म कित्ते, जे भविष्यवक्ता ने बोलेया थिया सेह् पूरा होई गेया| तिन्हा ने बोलेया मसीह ने दुख सैह्णा अते मरी जाणा। परमेश्वर ने इयां होणा दित्ता। ता अवे , मन फिराओ अते परमेश्वर रे पास्से मुड़ो, ताकि सेह् तुसा रे पापां जो धोई दे।"

जिस बेल्ले मंदर रे अगुवेयां ने पतरस अते यूहन्ना जो इयां बोलदे सुणेया, सेह् बड़े नराज होई गे। तां तिन्हा ने उन्हा जो पकड़ी लित्ता अते कैद विच्च पाई दित्ता। पर मते सारे मणुआं ने विश्वास कित्ता जे पतरस ने बोलेया थिया| जिन्हा ने यीशु पर विश्वास कित्ता सेह् लगभग 5,000 होई गे थिये।

अगले दिन यहूदियां ने पतरस अते यूहन्ना जो बड्डे परोता अते दुज्जे धर्म रे अगुवेयां का लेई गे। सेह् तिस मणू जो भी लियाये जे पंगु थिया। तिन्हा ने पतरस अते यूहन्ना जो पुच्छेया," कुस अधिकार कने तुसा ने इस पंगु मणू जो ठीक कित्तेया?"

पतरस ने उत्तर दित्तेया, "ए मणू जे तुसा रे सामणे है खड़ीतेरा ए यीशु मसीह है तिसेरी सामर्थ कने ठीक होया। तुसा ने यीशु जो सूली चढ़ाया, पर परमेश्वर ने तिसजो फिरी का जिन्दा करी दित्ता। तुसा ने तिसजो नकारेया, पर होर कोई रस्ता नी है बचणे रा सिवाए यीशु री सामर्थ रे।"

अगुवे हैरान होई गे की पतरस अते यूहन्ना निडर होई करी बोल्ले। तिन्हा ने दिख्खेया की ए मणू आम आदमी हिन अते अनपढ हिन| पर तिन्हा जो याद आया की ए मणू यीशु कने हूंदे थिये। तां तिन्हा उन्हा जो बोलेया, "असा ने तुसा जो बड़ी सजा दैणी जे तुसी यीशु नां रे मणू रा प्रचार कित्तया।" इदेई मती गल्ला बोलणे रे बाद तिन्हा ने पतरस अते यूहन्ना जो जाणे दित्तया। प्रेरितों के काम 3:1-4:22 से एक बाइबल की कहानी प्रेरिता रे काम्म 3-4:22 का इक्क बाइबल री कहाणी