3. बाढ़िरी कहानी

अक टैंम ऐतिया या कि संसारा मझ बड़ै सारै मैहणु रिहींथ्यै। सै बड़ै बुरै जां खून-खराबा कांनार भौ थ्यै गियौरै। ऐस टैंमा मैहणु यौउतै बुरै भौ थ्यै गियौरै कि सै कौस हैरी बिना डरींथ्यै। ऐन्हां मैहणुवां तका करी परमेश्वरै अक फैसला लिया कि ऐ पूरा संसार खततनाक बाढ़ी ला खत्म करी दींणा।

पण परमेश्वरेरी नजर नूह पन पैई। सै बुरै मैहणुवां मझ रींहणार अक धर्मी मैहणु थ्या। तां परमेश्वरै तैस बाढ़िरै बारै मझ नूहा सिंउ बोलु, कि मूं खतरनाक बाढ़िरै जरियै ऐ धरती खत्म करी दींणी। ऐठणीरी वजही सिंउ परमेश्वरै नूहानि अक बड़ा बडा जहाज बंणाणैरै तेईनी बोलु।

परमेश्वरै नूहानि बोलु, कि तु ऐस नापेरै जरियै लकड़िरा समुंद्री जहाज बंणाय, तैस जहाजेरी लम्बाई 140 मीटर, चौड़ाई 23 मीटर जां ऊंचाई 13.5 मीटर भूंणी चेहिंथी। फिरी परमेश्वरै नूहा सेईतै बोलु, जहाजा मझ अक्कै खिड़की अक्कै दुवार जां अक्कै छत बंणाय, जां जहाजा अंदर त्रा कमरै बंणाय। फिरी परमेश्वरै नूहानि बोलु, जेख्णी मूं ऐस धरती पन झड़ी बरसांणी, ता तु अपड़ै परिवारा सेईतै जहाजा मझ चलि गहि, जां सारा जींता प्राणियां जां पंछिया जां जानवरा केरा अक-अक जौढ़ा जहाजा मझ रखै।

नूहैं परमेश्वरैरी आज्ञा मंनी। नूहै जां तेसैरै पुत्रै तेतिया ऐ जहाज बंणा जेतिया परमेश्वरै बोलौरा थ्या। केईनी कि सै जहाज बड़ा बडा थ्या ऐठणीरै तेईनी तैस जहाजा बणांणनी बड़ै साल लग्गै। नुहैं मैहणुवंनी ऐईंणै बाई बाढ़िरै बारै मझ चेतावनी दित्ती, जां बोलु, कि परमेश्वरा पन विश्वास करा जां तेसैरै सामणै अपड़ै पापा केरा पश्चाताप करा, पण तैन्हैं नूहेरी गल्लै पन कोई ध्यान ना दित्ता, जां बुरा कंमा मझ ऐ जीवन जींतै रिय्है।

परमेश्वरै नूहानि जां तेसैरै परिवारानि अपड़ै तेईनी जां सारा जानवरा केरै तेईनी खांणा किट्ठा कांनेरा आदेश दित्ता। जेख्णी सभ किछ तियार भौ गियु, तेख्णी परमेश्वरै नूहानि बोलु, कि अबै तु अपड़ी लाड़ी, त्रियां पुत्रा जां तैन्हेरिया लाड़िया समैत जहाजा मझ चलि गा। सैक्यै सारै मिलाकरी अट्ठ जंणै थ्यै।

परमेश्वरै सारै जानवर, जीव जन्तु जां पक्षिया केरै नर जां मादा नूहा सेईतै जहाजा मझ अंदर कियै, ताकि सै नूहा सेईतै जहाजा मझ बाढ़ी किना बचि सकिया। परमेश्वरै हर किस्मेरै जानवरा केरै सत्त मादाय जां सत्त नर जहाजा मझ अंतरैरी दित्तै, जैन्हां केरा इस्तेमाल बलिदान कांनेरै तेईनी करी सकिया। जेख्णी सै सारै जहाजा अंदर चलि गियै, तेख्णी परमेश्वरै जहाजेरू दुवार बंद करी दित्तु।

तां झड़ी लगि पैई, जां झड़ी बिना रूकणै चाही धियाड़ि चाही राती लगौरी रैय्ही, धरती पन यौउती झड़ी पैई कि पांणी ऐ पांणी भरी गियु जां सभ किछ पांणी मझ डुबि गियु।

बाकी धरती पन रींहणार सारै पक्षी जां जानवर जां सारै मैहणु मरि गियै, सिर्फ जै जहाजा मझ थ्यै सेहै जींतै बचै। जां जहाज पांणी प्रंना तैरना लगि पिया।

झड़ी रुकणा किना बाद, जहाज पंज महीनै पांणीऐ मझ तैरता रिय्हा, जां जेख्णी पांणी घटणा लगि पियु, तेख्णी अक धियाड़ी जहाज पहाड़ा पन टिकि गिया। पण संसार हालै तेईनी बि पांणी मझ ढकियोरा थ्या। त्रियैं महीनै बाद, पहाड़ा केरी चोट्टी लाधी लगि पेई ऐईंणा।

फिरी चाहिया धियाड़िया किना बाद, नुहैं अक का ऐ तकांणैरै तेईनी जहाजा किना भेईर उडारा कि क्या पांणी शुकि गियौरू आ। का शुक्की जमीन तोपता-तोपता ओरि-परि उडरता रिय्हा, पण तैसनी कोट्ठी बि शुक्की जमीन ना मैयि।

फिरी नूहैं बाद मझ अक कबूतरी जहाजा मझां भेईर उडारी। पण तैसनी बि कोई शुक्की जमीन ना मैयि, ऐठणीरै तेईनी सै वापस जहाजा मझ नूहा किनी अईछी गैई। ऐकि हफ्तै बाद तेनि सै कबूतरी फिरी जहाजा मझां भेईर उडारी, जां तेनि अपड़ु मुँहा मझ जैतूनेरी अक डाई पकड़ी करी लै अंणी। ऐनि ला नूहा पता चलि गिया कि धरती पनि पांणी घटतु आ। जां बुट्टै फिरी जंमणा लगि थ्यै पियौरै।

नूहै सत्त धियाड़ी हौरा इन्तजार केया, जां त्रीं बारी फिरी सै कबूतरी जहाजा किना भेईर उडारी, इस बारी तैसनी भेईर बेशणनी जगा मैई गैई जां सै वापस ना यैई। केईनी कि सारी धरती पनि पांणी शुकतु थ्यु।

दो महीने बाद परमेश्वरै नूह सिंउ बोलु, "अबै तु जां तिंडा परिवार जां सारै जानवर जहाजा मझां भेईर निकोहि अईछा। बड़ी सारी आउलाद जां पौत्रै-पड़पौत्रै पेईदा करा जां धरती पन खिलरी गहा।” तां नूह जां तेसैरा परिवार जहाजा किना भेईर निकोही या।

नूहै जहाजा भेईर अईछी करी, सभनियां पेहिलै अक वेदी बंणाय जां तैन्हां जानवरा मझां किछ जानवर परमेश्वरेरै तेईनी बलिदान कांनेरै तेईनी बलि करि दित्तै। परमेश्वर ऐनि बलिदानै ला बड़ा खुश भुवा जां नूहानि जां तेसैरै परिवारानि आशीष दित्ती।

फिरी परमेश्वरै बोलु, "आंउ तुहां सिंउ वायदा काता कि मैहणुरै जरियै भूंणारै बुरै कंमा केरै कारण मूं फिरी कदि धरतिनी श्राप ना दींणा जां बाढ़ी ला संसार खत्म ना कांना, हालांकि मैहणु अपड़ै बचपणेरै टैंमा किना ऐ पापी आ।

फिरी परमेश्वरै बोलु, मीं अपड़ै वायदेरै चिन्हेरै रूपा मझ पेहिला मेघ धनुष बंणा। जेख्णी बि असमांणा मझ मेघ धनुष लाधी ऐईंता, ता परमेश्वर याद करेला कि तेनि कितु वायदा कियौरा, जां तिहीयें तेसेरै मैहणु बि याद करेलै।