4. अब्राहमा सेईतै परमेश्वरेरा वायदा- कहानी

बाढ़ ऐईंणा किना मत्तै साल बाद, इस संसारा मझ बड़ै मैहणु रिहींथ्यै, जां सारै संसारा मझ अक्कै भाषा जां अक्कै बौली थी। जां फिरी तैन्हैं परमेश्वरेरै जां योकिया केरै खिलाफ पाप केया। ऐठणीरै तेईनी सैक्यै सारै योकिया सिंउ किट्ठै भुवै जां संसारा मझ खिलरी गांहणेरै परमेश्वरेरै आदेशेरै वजाय सैक्यै अक शहर बंणाणा लगै।

सै बड़ै घमन्डी थ्यै, जां तैन्हां केतिया जीवन जींणा चेहिंथा ऐस बारै मझ सै परमेश्वरेरै आदेशेरा पालन काना ना थ्यै चांहथै। यो तेईनी कि तैन्हैं अक ऐतैई ईमारत बंणाणी शुरू करि दित्ती जै स्वर्गा तेईनी पुजि गहिया। परमेश्वरै तकाउ कि अगर ऐक्यै योकिया सेईतै मिलिकरी बुराई कातै रैहलै, ता सै बड़ै भारी पापी कंम करि सकतै।

ऐठणीरै तेईनी परमेश्वरै तैन्हेरी भाषा जां बोली बदली दित्ती जां सैक्यै मैहणु सारै संसारा मझ फैलाय दित्तै। जै शहर तैन्हैं बंणाणा शुरू कियौरा थ्या तैस शहरैरू नाँ बेबीलोन रखु, जेसैरा मतलब आ “गड़बड़ी”।

मत्तै साला बाद, परमेश्वरै अब्राहम नाँईयेरै ऐकि मैहणु सेईतै गल्ल की। परमेश्वरै तैस सेईतै बोलु, “अपड़ै दैशा जां अपड़ै परिवारा छडि करी तैस दैशानि चलि गा जै मूं ताउनि लुहाना। आंउ ताउनि आशीष दैला जां ताउ किना अक बड़ी बडी जाति बंणाला। मूं तिंडु नाँ महांन कांनु। जै ताउनि आशीष दैला मूं तेसनी आशीष दींणी, जां जै ताउनि श्राप दैला मूं तेसनी श्राप दींणा। तिंडै जरियै संसारेरै सारै कुल आशीष पालै।“

परमेश्वरेरै वचनेरै मुताबिक अब्राहम सभ किछ छडि करी चलि गिया। अब्राहम अपड़ै सारा सेवका जां अपड़ी सारी धन-दौलती समैत जां अपड़ी लाड़ी साराय सेईतै कनान दैशानि चलि गिया जै परमेश्वरै तैसनी लुहाऔरा थ्या। अब्राहम तैठि मत्तै साल रिय्हा, फिरी परमेश्वरै अब्राहमा सेईतै वायदा किया।

जेख्णी अब्राहम कनान दैशा मझ पुज्जा तां परमेश्वरै तैस सेईतै बोलु, “अपड़ै चोउवो पासै नजर मार। मूं ताउनि ऐ सारा दैश दींणा जां तिंडा वंश हमेशा तेईनी ऐस दैशा पन अधिकार रखैला।” तां अब्राहम तैस दैशा मझ बसि गिया।

मलिकिसिदक नाँईयेरा अक मड़द थ्या जै सर्वशक्तिमान परमेश्वरैरा याजक थ्या। अक धियाड़ी जेख्णी अब्राहम युद्ध कांना किना बाद वापस ऐईंता थ्या तां सै जां अब्राहम मिल्लै। मिलिकिसिदके अब्रामनी आशीष दित्ती जां बोलु, "सर्वशक्तिमान परमेश्वर जै स्वर्गेरा जां धरतिरा मालिक आ सै ताउनि आशीष दैला।" फिरी अब्राहमै युद्धा मझ जितोरी सारिया चीजा केरा दशवांश यानि दशुवां हैसा मलिकिसिदकनी दित्ता।

मत्तै साल बिरती गियै, पण हालै तेईनी बि अब्राहमेरी जां सारेरी कोई आउलाद ना भुई। परमेश्वरै अब्राहमा सिंउ गल्ल की जां फिरी वायदा केया कि तैसेरी लाड़ी साराय किना अक पुत्र पेईदा भूंणा, जां जिहीं असमांणा मझ तारै अत्तै तिहींयें तिंडा वंश बि भूंणा। अब्राहमै परमेश्वरेरै वायदै पन विश्वास केया। परमेश्वरै घोषणा की कि अब्राहम अक धर्मी मैहणु आ केईनी कि तेनि परमेश्वरेरै वायदै पन विश्वास केईथ्या।

तां परमेश्वरै अब्राहमा सिंउ अक वायदा केया। शांत तरीकै सेईतै, अक वायदा दुवां गुट्टा केरै बिच योकिया केरै कंम कांनेरा अक समझौता भूंता। परमेश्वरै अब्राहमा सेईतै सै वायदा तेख्णी केईथ्या जेख्णी अब्राहम झुलौरा थ्या, पण सै तां बि परमेश्वरेरी गल्लै शुणी सकींथ्या। परमेश्वरै बोलु, “मूं तिंडै शरीरा किना पेईदा करि करी ताउनि अक पुत्र दींणा। आंउ तिंडै वंशानि ऐ कनान दैश दींता।” पण हालै तेईनी बि अब्राहमेरा कोई पुत्र ना भुआ।