5. वायदेरा पुत्र- कहानी

अब्राहम जां सारा कनान दैशा मझ पुजणा किना दस साल बाद, हालै तेईनी बि तैन्हैरी कोई आउलाद ना भुई। ऐठणीरै तेईनी अब्राहमेरी लाड़ी साराय तैस सिंउ बोलु, “यानि कि परमेश्वरै हालै तेईनी बि मूंनी आउलादिरा सुख ना दित्ता अबै आंउ बच्चा जंमणैरै तेईनी बड़ि बुढी आ, तका, मिंडी दासी हाजिरा ऐठी आ। तैस सिंउ बि ब्याह करी लै कि सै मिंडै तेईनी आउलाद पेईदा करी सकिया।

फिरी अब्राहमै हाजिराय सिंउ ब्याह करी लिया। हाजिराय अक पुत्र जम्मा, जां अब्राहमै तेसैरू नाँ इश्माएल रखु। पण सारा हाजिराय किना जलन कांना लगी। जेख्णी इश्माएल तैराह सालेरा थ्या, तां परमेश्वरै अब्राहमा सेईतै फिरी गल्ल की।

परमेश्वरै बोलु, “आंउ सर्वशक्तमान परमेश्वर आ। मूं ताउ सिंउ अक वायदा कांना।” तां अब्राहमै धरती पन पैई करी परमेश्वरानि प्रणाम किया। परमेश्वरै अब्राहमा सिंउ ऐ बि बोलु, “तु बड़ि सारी जातिया केरा पिता भूंणा। आंउ ताउनि जां तिंडै वंशानि तैन्हैरी जमीन भूंणेरै तैईनी कनान दैश दैला जां आंउ हमेशा तेईनी तैन्हैरा परमेश्वर भूंणा। तांउ अपड़ै घरानेरै हर मड़देरा खतना काना।"

"तिंडि लाड़ी साराय ऐकि पुत्रानि जन्म दींणा, सै वायदेरा पुत्र भूंणा। तेसैरू नाँ इसहाक रखै। मिंडा वायदा तैस सेईतै बि बंणी रैहला, जां तैस किना अक बड़ि बडी जाति बंणी गाहली। मूं इश्माएला किना बि अक बड़ि बडी जाति बंणाणी, पण मिंडा वायदा इसहाका सेईतै बंणी रैहला।” तां परमेश्वरै अब्रामेरू नाँ बदली करी अब्राहम रखी दित्तु, जेसैरा मतलब आ “मूलपिता” यानि बड़ा सारा केरा पिता। परमेश्वरै सारैरू नाँ बदली करी सारा करि दित्तु, जेसैरा मतलब आ “मूलमाता”।

तैस धियाड़ी अब्राहमै अपड़ै सारै घरानेरै मड़दा केरा खतना केया। लगभग अक साल बाद, जेख्णी अब्राहम 100 सालेरी उम्रिरा थ्या जां सारा 90 सालेरी थी, तेख्णी साराय अब्राहमेरै पुत्रानि जन्म दित्ता। जिहीं परमेश्वरै तैन्हांनि बोलौरू थियु तैन्हैं तेसैरू नाँ इसहाक रखु।

जेख्णी इसहाक जुवान भुवा ता परमेश्वरै ऐ बोलि करी अब्राहमेरै विश्वासैरी परख की, कि “अपड़ै इकलौतै पुत्रा लै जां तैस मिंडै तेईनी बलिदानेरै रूपा मझ मारी दै। ”फिरी अब्राहमै परमेश्वरेरै ऐस आदेश पालन केया, जां अपड़ै पुत्र इसहाकेरा बलिदान कांनेरै तेईनी तियार भौ गिया।

जेख्णी अब्राहम जां इसहाक बलिदान चाढ़नेरी जगाय धेरै गांहणा लगै तां इसहाकै पुच्छु, ”हे पिता, असुवां किनि बलिरै तेईनी छिड़ी ता अत्ती, पण बलिदान कांनेरै तेईनी भेडैरा बच्चा कोठि आ?” अब्राहमै जवाब दित्ता, “हे मिंडै पुत्र, परमेश्वर बलिदान कांनेरै तेईनी भ्रेडैरै बच्चैरा इन्तजाम करैला।”

जेख्णी अब्राहम जां इसहाक बलिदान चाढ़नेरी जगाय पुजि गियै, तां अब्राहमै वेदी बंणाय जां छिड़ी चिणीं करी इसहाकेरै हत्थ पैयिड़ बन्हीं करी वेदी पनि लमैरी दित्ता। सै अपड़ै पुत्रा मांनै बाऐ थ्या तां परमेश्वरै तेसनी बोलु, “रुकि गा! पुत्रानि किछ मेयिं करै! अबै आंउ बुझि गिया कि तु मिंडा डर मंनता, केईनी कि तीं अपड़ा इकलौता पुत्र बि मूं किना बचा करी ना रखा।”

तां फिरी अब्राहमै तैठि अक भ्रेडैरा बच्चा झिल्हा मझ फसौरा लधा। अब्राहमै गहि करी सै भ्रेडैरा बच्चा अंणा, जां परमेश्वरेरै तेईनी खुश भौ करी बलिदान करी दित्ता। इसहाकेरै बदलै परमेश्वरै तैठि तैन्हैरै तेईनी भ्रेडैरै बच्चैरा इन्तजाम केईथ्या। परमेश्वर सिर्फ अब्राहमेरी परख कांना चांहथा थ्या।

तेख्णी परमेश्वरै अब्राहमा सेईतै बोलु, “तु मिंडै तेईनी सभ किछ दींणानि तियार भौ गिया, यो तेईनी कि अपड़ा इकलौता पुत्र बि ना छडा, ऐठणीरै तेईनी आंउ ताउनि आशीष दींणैरा वायदा काता। तिंडा वंश असमांणेरै तारा किना बि जादा भूंणा। केईनी कि तीं मिंडै आदेशैरा पालन केया ऐठणीरै तेईनी मूं तिंडै परिवारेरै जरियै संसारेरी सारी जातियानि आशीष दींणी।”