6. परमेश्वररैरा इसहाकेरै तेईनी इन्तजाम- कहानी

जेख्णी अब्राहम बड़ा बुढा भौ थ्या गियौरा तेख्णी तेसैरा पुत्र, इसहाक जुवान भौ थ्या गियौरा। ऐठणीरै तेईनी अब्राहमै अपड़ा अक दास अपड़ै पुत्रा इसहाकनी लाड़ी अणनेरै तेईनी तैस दैशानि भेईजा जेठि तेसैरै रिश्तैदार रिहींथ्यै।

अक लम्मा सफर कांना किना बाद, अब्राहमेरा दास तैस शहरा मझ पुजि गिया जेठि अब्राहमेरै रिश्तैदार रिहींथ्यै, तां परमेश्वरै तैस दासेरा सामना रिबकाय सिंउ करा। सै अब्राहमेरै भाईरी पौत्री थी।

रिबका अपड़ै परिवारा छडि करी,अब्राहमेरै दासा सेईतै इसहाकेरै घरै गांहणनी तेयार भौ गैई। रिबका तैठि पुज्जी ता इसहाकै तैस सेईतै ब्याह करी लिया।

अक लम्मै टैंम बाद, अब्राहम मरी गिया। तां परमेश्वरै अब्राहमा सेईतै जै वायदा कियौरा थ्या तेठणीरै मुताबिक, परमेश्वरै इसहाकनी आशीष दित्ती। पण इसहाकेरी लाड़ी रिबकैनी कोई आउलाद ना भुई। इसहाक मतिया जातिया केरा पिता ना बंणी सकींथ्या अगर तैस किनि अक बि बच्चा ना भूंता।

इसहाकै रिबकेरै तेईनी प्रार्थना की, परमेश्वरै तेसैरी प्रार्थना शुणी जां तेसनी तैसै टैंमा जुड़वा बच्चा केरी आशीष दित्ती। जैस टैंमा सै बच्चै रिबकेरै पैटा ऐ मझ थ्यै, सै योकिया मझ भिड़ियूंणा लगै, ऐठणीरै तेईनी जै किछ बि भूंतु थ्यि रिबकै सै सभ किछ परमेश्वरा सिंउ बौलि दितु।

परमेश्वरै रिबकै सिंउ बौलु, “ताउ दुवां पुत्रानि जन्म दींणा। तैन्हेरै वंश दो अलग-अलग जाति बंणेलै। तैन्हां योकिया सिंउ भिड़ियूंणु। पण बड्डै पुत्रा किना पेईदा भूंणारी जाति, हल्कै पुत्रा किना भूंणारी जातिरी आज्ञा मंनणी पूंणी।”

जेख्णी रिबकेरै बच्चा केरा जन्म भुवा, ता बड्डा पुत्र लाल जां शिरवाऐशा थ्या, जां तैन्हैं तेसैरू नाँ एसाव रखु। तां हल्का पुत्र एसावेरी पेहिंण पकड़ी करी जम्मा, जां तैन्हैं तेसैरू नाँ याकूब रखु।