7. परमेश्वर याकूबनी आशीष दींता

जेख्णी सैक्यै बच्चै बड्डै भौ गियै ता याकूबा घरै बेशणु खरू लगु, पण एसावा जानवरा केरा शिकार कांना खरा लगा। रिबका याकूबा सिंउ बड़ा लाड़ प्यार करींथी, पण इसहाक एसावा सिंउ बड़ा लाड़ प्यार करींथ्या।

अक धियड़ी, जेख्णी एसाव शिकार करी वापिस या ता तैस बड़ी भ्रुख थी लगौरी। एसावै याकूबा सेईतै बोलु, “जै तीं खांणा बंणाउरा तैत मझां थोड़ा तिया मूंनि दै।” याकूबै जवाब दित्ता, “ पेहिलै तु मूं सिंउ वायदा कर कि जैठा पुत्र भूंणेरी वजहि सिंउ हर चीज जै ताउनि मेईंणी चेहिंथी, तैस सारूरा हक तु मूंनि दैला।” तेसै टैंमा एसावै अपड़ा जैठा भूंणैरा सारा हक याकूबानि दींणैरा वायदा करी दित्ता। तैठां बाद याकूबै एसावनी थौड़ा खांणा दित्ता।

इसहाक एसावनी आशीष दींणा चांहथा थ्या। पण ऐहीं कांना किना पेहिलै रिबकाय जां याकूबै एसाव पीछै करि-करी तैसनी धौखा दी करी याकूब ऐपु इसहाकेरै आघै चलि गिया। इसहाक बुढा भौ थ्या गियौरा जां तेसैरी नजर बड़ी घट थी। ऐठणीरै तेईनी याकूबै एसावेरै लिकड़ै लाय जां बकरिरी खल अपड़े गआ जां हत्था पन लपैटी लैई।

याकूब इसहाका किनी या जां बोलु, “आंउ एसाव आ। आंउ ऐठणीरै तेईनी या कि तु मूंनि आशीष दिया।’ जेख्णी इसहाकै बकरिरै शिरवा महसूस कियै जां लिकड़ा केरी मुसक सुंघी, ता तेनि सौचु कि ऐ ता एसाव ऐ आ जां तैसनी आशीष दित्ती।

एसाव याकुबेरी ऐस हरकति हैरी करी बड़ा दुखी भौ गिया, केईनी कि याकुबे एसावेरा जैठा भूंणैरा हक जां तैसेरी सारी आशीषै पा लेई। फिरी एसावै सौचु कि बबा मरना किना बाद मूं याकूब जांनी किना खत्म करी दींणा।

पण रिबकाय एसावेरी योजना शुणी लैई। तां तेनि जां इसहाकै याकूब तेसैरै रिश्तैदारा सेईतै रींहणेरै तेईनी बड़ा दूर भेईजी दित्ता।

याकूब केही साल अपड़ै रिश्तैदारा सेईतै रिय्हा। तेसै टैंमा तेनि ब्याह करि ल्या जां बाराह पुत्र जां अक छोकरी पेईदा कराय। परमेश्वरै सैक्या बड़ा शैठ बंणा छडा।

20 साला तेईनी कनान मझ अपड़ै घरा किना दूर रींहणा किना बाद, याकूब अपड़ै परिवारा सेईतै, अपड़ा दासा सेईतै जां अपड़ा जानवरा केरै सारा झुंडा समैत वापिस अपड़ै घरेनि चलि या।

याकूब हालै बि बड़ा थ्या डरौरा, केईनी कि तेनि सौचु कि एसाव हालै बि मूं खत्म काना चांहथा। एठणीरै तेईनी तेनि अपड़ै मतै जानवरा केरा झुंड एसावा किनि भेईजा। जै दास तैन्हां झुंडा लै करी गियौरै थ्यै तैन्हैं बोलु, “तिंडा दास याकूब, ऐन्हां जानवरा केरै झुंडा ताउनि दींता। सै बड़ा जल्दी वापिस ऐईंता आ।

पण एसाव अबै याकूबनी माफ करी थ्या बेठौरा, सै तैस अक बारी फिरी तका करी बड़ा खुश भुईथ्या। तैठां किना बाद याकूब कनान दैशा मझ शांति सेईतै रिय्हा। फिरी इसहाक मरी गिया जां याकुबै जां एसावै सै दबा। वायदै जै परमेश्वरै अब्राहमा सेईतै कियौरै थ्यै सै अबै इसहाका किना याकूबा किनि आईछी थ्यै गियौरै।