8. परमेश्वर यूसुफा जां तेसैरै परिवारा बचांता- कहानी
केहिया साला बाद, याकूब बुढा भौ थ्या गियौरा, ता तेनि अपड़ा प्यारा पुत्र यूसुफ तेसैरै भाईया केरी जांच पड़ताल कांनेरै तेईनी भेईजा जै जानवरा केरै झुंडा केरी देखभाल थ्यै कातै।
यूसुफेरै भया तैस सिंउ बैर रखींथ्यै केईनी कि तेन्हैरा बब यूसुफा सिंउ बड़ा प्यार करींथ्या, ऐठणीरै तेईनी बि कि यूसुफै सुपना हैरा कि सै तैन्हां पन राज करैला। जेख्णी यूसुफ अपड़ै भाईया किनि या ता तैन्हैं सै बंदी बंणा करी दासा केरा व्यापार कांनारानि बैची दिता।
घरै वापिस ऐईंणा किना पेहिलै यूसुफेरै भाईयै यूसुफेरै लिकड़ै फाड़ी करी बकरिरै खूना मझ मिला दित्तै। फिरी तैन्हैं सै लिकड़ै अपड़ै बाबेनि लुहाई करी बोलु कि जंगली जानवरै तिंडा छौकरा यूसुफ खा छडा। ऐस गल्लै शुणी करी याकूब बड़ा उदास भौ गिया।
दासा केरा व्यापार कांनारै मैहणुवें यूसुफ मिस्र दैशानि लै नियां। नील नदिरै किनारै बसौरा मिस्र दैश बड़ा बडा जां ताकतवर थ्या। तैन्हैं व्यापारियै यूसुफ एकि अमीर सरकारी अधिकारिनी गुलामेरै रूपा मझ बैचि दित्ता। यूसुफै अपड़ै मालिकेरी बड़ै प्यार सिंउ सेवा की, जां परमेश्वरै यूसुफनी आशीष दित्ती।
तैठां किना बाद ऐहीं भू कि तेसैरै मालिकेरी लाड़ी यूसुफनी बोलु, “मूं सेईतै झुल, पण यूसुफ मुकरि गिया जां बोलु, आंउ परमेश्वरेरै खिलाफ यौउता बड्डा पाप ना करि सकता।” ऐठणीरै तेईनी सै गुस्सै भौ गैई जां तेनि यूसुफा पनि झूठा आरोप ला दित्ता, ऐठणीरै तेईनी सै पकड़ी करी जैल्ही मझ बंद करी दित्ता। यो तेईनी कि जेलखाने मझ बि, यूसुफ परमेश्वरेरै प्रति सच्चा रिय्हा, जां परमेश्वरै तैसनि आशीष दित्ती।
दुवां साला तेईनी यूसुफ बेकसूर भूंणेरै बावजूद बि जैल्ही मझ थ्या। अक रात मिस्र देशेरै राजै, जेसैरू नाँ फिरौन थियु, तेनि राती दो सुपनै तकाय जैन्हैं सै बड़ा भारी परैशान करी छडा। जै तेनि सुपनै तकाय तेठणीरा मतलब शुणांणार कौ बि ना थ्या।
परमेश्वरै यूसुफनी सुपना केरा मतलब शुणांणेरी काबलियत दितौरी थी, ऐठणीरै तेईनी फिरौने यूसुफ जैल्ही मझां ऐपु किनि शदा। यूसुफै तैसनी तैन्हां सुपना केरा मतलब शुणा जां बोलु, “सारै मिस्र दैशा मझ सत्त साल बड़ि फसल भूंणी, जां फिरी अगलै सत्त साल अकाल पूंणा।”
फिरौन यूसुफा किना बड़ा खुश भुवा कि तेनि सैक्या मिस्र देशैरा दुवां ताकतवर मैहणु चुणां।
यूसुफै मैहणुवंनी सत्ता सालानि बड़ि जादी फसल जां खांणै बाई चीजै किट्ठी कांननी बोलु, सत्त साल अकाल पेया तेख्णी यूसुफै मैहणुवंनी सै अनाज बैचु ताकि तैन्हां किनि खांणुनि पूरू भौ गहिया।
सै अकाल सिर्फ मिस्र दैशा मझ ऐ ना, पण कनान दैशा मझ बि बड़ा थ्या पियौरा, जेठि याकूब जां तेसैरा परिवार रिहींथ्या।
ऐठणीरै तेईनी याकूबै अपड़ा सभनियां बडा पुत्र अनाज खरीदणैरै तेईनी मिस्र दैशानि भेईजा। जेख्णी सै अनाज खरीदणेरै तेईनी यूसुफेरै सामणै खड़ै भुवै ता तैन्हैं भाईयै यूसुफ ना पछियांणा। पण यूसुफै सैक्यै पछियांणी लियै।
यूसुफै ऐ जांणनेरै तेईनी कि क्या मिंडै भाईयै अपांणा बदलौरा कि ना, तैन्हां परखणा किना बाद, यूसुफै तैन्हां सिंउ बोलु, “आंउ तुवाड़ा भया यूसुफ आ! डरा मेईं। जेख्णी तुहैं आंउ गुलाम भूंणेरै तेईनी बेचथिया ता तुहैं बुरू कांनेरी सोचथी, पण परमेश्वरै तैस बुराईरै बदलै मूं सिंउ भलाई की! तुवै बि अईछी करी मिस्र दैशा मझ रिय्हा ताकि आंउ तुवाड़ै तेईनी जां तुवाड़ै परिवारेरै तेईनी अनाजेरा इन्तजाम करी सकिया।“
जेख्णी यूसुफेरै भया अपड़ै घरै वापिस कनान दैशा मझ चलि यै जां अपड़ै बाबै याकूबनी शुणांउ कि यूसुफ तिंडा पुत्र हालै बि जींता ता ऐस गल्लै शुनी करी यूसुफ बड़ा ज्यादा खुश भुईथ्या।
हालाँकि याकूब तैस टैंमा बड़ा बुढा भौ थ्या गियौरा तां बि सैक्या अपड़ै पूरै परिवारै समैत मिस्र दैशानि चलि गिया, जां सै तैठियै बसि गियै। याकूबै मरना पेहिलै हरेक पुत्रानिआशीर्वाद दित्ता।
परमेश्वरै जै वायदा अब्राहमा सिंउ कियौरा थ्या सैक्या वायदा इसहाका पन जां तैठां किना बाद याकूबा पन, जां तैठां बाद बाराह पुत्रा केरै वंश इस्राएलेरै बाराह गौत्रा पन अईछी गिया। तैन्हां बाराह पुत्रा केरै वंश इस्राएलेरै बाराह गौत्र बंणी गियै।
उत्पत्ति अध्याय 37-50 किना अक बिइबलिरी कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।