9. परमेश्वर मूसै शदांता- कहानी
यूसुफेरै मरना किना बाद तेसैरै सभ रिश्तैदार मिस्र दैशा मझ बसि गियै। सै जां तेसैरा वंश केहिया साला तेईनी मिस्र दैशा मझ ऐ रिय्है जां तैन्हैं बड़ी आउलाद पेईदा की। जां फिरी सै सारै इस्राएली भौ गियै।
मत्तै साल बाद, इस्राएलिया केरी गिणती बधी गियौरी थी। जां मिस्र देशैरै मैहणु अबै ऐस गल्लै भुलि थ्यै गियौरै कि तैन्हैरी मजत कांनेरै तेईनी यूसुफै बड़ु किछ कियौरू थियु। मिस्र देशैरै मैहणु इस्राएलिया किना डरींथ्यै केईनी कि सै गिणती मझ बड़ै ज्यादै थ्यै। ऐठणीरै तेईनी तैस टैंमा मिस्र दैशा पनि अधिकार कांनारै फिरौन राजै इस्राएली मैहणु मिस्री मेहणुवां केरै गुलाम बंणा दित्तै।
मिस्र देशैरै मेहणुवें इस्राएली मैहणुवां पनि अत्याचार करि करी हर कंम कांनेरै तेईनी मजबूर कियै। तैस कठिन मैहनतिरी वजहि सिंउ तैन्हैरा जीवन बड़ा दुखी भौ गिया, पण परमेश्वरै तैन्हांनि अशीष दित्ती जां तैन्हैरै होरी जादी आउलाद पेईदा भुई।
जेख्णी फिरौन राजै तकाउ कि इस्राएली मैहणुवां केरी बड़ी जादी आउलाद पेईदा भूंती आ, तां फिरौन राजै सारी प्रजाईरै मैहणुंनी हुक्म दित्ता, इस्राएली मैहणवां केरै जैत्थरै बि बच्चै भौरै अत्तै तैन्हां सारा नील नदी मझ सुट्टी करी मारी दिया।
तैस टैंमा एकि खास इस्राएली जनेनी ऐकि छोकरूनि जन्म दित्ता। तेनि जां तेसैरै लाड़ै तैन्हैरै बोलै ज्यौतु भूंतु थियु सैक्या बच्चा छपा करी रखा।
जेख्णी तेसैरै मयि-बबै सै बच्चा होरा ज्यादा टैंम ना छपाईया, ता तैन्हैं सै मारी छडणेरै डरा किना ऐकि टोकरी मझ नील नदिरै किनारै सरकंडा केरै बिच रखि दित्ता। तैस बच्चेरी बड्डी भींणी ऐ तकांणेरै तेईनी दूर खड़ी करी तेसैरी देख-रेख की कि तैस बच्चै सेईतै कितु भौलु।
तां फिरौन राजेरी छोकरी नय्हूंणेरै तेईनी तैस नदी मझ यैई, जां नदिरै ब्रक्खै बतै सरकण्डेरू घहा मझ फसोरी टौकरी लधि, तेनि अपड़ी दासी सै टौकरी अंणनेरै तेईनी भेईजी, जां तैन्हैं तैस टोकरी मझ अक बच्चा लधा, तां तेसै बच्चै पन दया की जां सै अपड़ा बच्चा बंणा लिया। फिरी तेनि अक इस्राएलैरी जनानि तैस बच्चैनि दुध पिवांणेरै तेईनी कंमा पनि रखि लैई पण फिरौन राजेरी छोकरी ना थ्या पता कि सै जनानि तैस बच्चैरी सक्की माँ आ। जेख्णी सै बच्चा बडा भौ गिया कि तैस अपड़ी मायरू दुधैरी जरूरत ना थी, ता तेनि सै बच्चा राजै फिरौनेरी छोकरी किनि वापिस पुजा दित्ता, तैन्हैं तेसैरू नाँ मूसा रखु।
अक धियाड़ी, जेख्णी मूसा जुवान भौ गिया, ता तेनि हैरू कि ऐकि मिस्र देशैरा मैहणु ऐकि इस्राएली मैहणु पनि बजौरी आ। मूसै अपड़ा साउगी जै इस्राएल देशैरा थ्या तैस बचांणैरी कोशिश की।
तां मूसै सौचु कि सै कौस ना लांहणा तां तेनि सै मिस्र देशैरा मैहणु मारी छडा जां तेसैरी लास दबि छडी। पण मूसै जै कियौरू थ्यु सै सभ किछ कुनिक्यै हैरी थियु लियौरू।
जेख्णी फिरौन राजै ऐ पता लगि गिया कि मूसै कितु कियौरू आ। राजै फिरौनै मूसै खत्म कांनेरी कोशिश की, पण मूसा मिस्र दैशा किना बंणा मझ नशि गिया। फिरौने राजेरै सिपाहियै बि सैक्या बंणा मझ ना तोपिया।
मूसा मिस्र दैशा किना दूर बंणा मझ मिद्दान दैशा मझ अक पुव्हाल बंणी थ्या गियौरा। तेनि तैठि ऐकि छोकरी सिंउ ब्याह करि लिया जां तैस सिंउ दो पुत्र पेईदा भुवै।
मूसा तैठि अपड़ै शोहुरेरी भ्रैडा कैरी देखभाल करींथ्या। मूसैरा शोहुरा तैस देशैरा याजक थ्या। अक धियाड़ी, मूसा जेख्णी अपड़िया भ्रैडा केरी देखभाल काता थ्या तैठि तेनि अक जअतु झिल्ह हैरू जै फुकियूंणै बिना जऔरू थियु। तैस तकांणेरै तेईनी मूसा तैस झिल्हा नीड़ गिया। जेख्णी सैक्या तैस झिल्हा नीड़ पुज्जा ता परमेश्वरै मूसै सिंउ गल्ल की। “हे मूसा, अपड़ै बूट उतारी दै। तु ऐकि पवित्र जगाय पनि खड़ा आ।”
परमेश्वरै बोलु, “मीं अपड़ै मैहणुवां केरा दुख लधौरा। मूं तु फिरौन राजै किनि भेईजणा ताकि तु इस्राएली मैहणुवां मिस्र दैशेरी गुलामी किना कढि अणियां। मूं तैन्हांनि कनान दैश दींणा, सैक्या दैश जेठणीरा मीं अब्राहमनी, इसहाकनी जां याकूबानि दींणैरा वायदा कियौरा।”
मूसै बोलु, “अगर मैहणु पुछणा लगै कि आंउ कुनि आ भेईजौरा ता मूं तैन्हां मैहणुवंनी कितु बौलणु?” परमेश्वरै मूसेनी बोलु, “जै आंउ आ सै आंउ आ। तैन्हां सिंउ बोला, मीं ऐ तु तुहां किनि भेईजौरा। तैन्हां सिंउ ऐ बि बोलै, आंउ तुवाड़ै पूर्वजा केरा यानि अब्राहमेरा जां इसहाकेरा जां याकूबेरा परमेश्वर यहोवा आ। मिंडा ऐ नाँ हमेशा तेईनी आ।"
मूसा फरौन राजै किनि गांहणा किना डरींता थ्या, केईनी कि सै अटकि-अटकि करि बोलींथ्या, ऐठणीरै तेईनी परमेश्वरै मूसैरा भाई, हारून तेसैरी मजत कांनेरै तेईनी भेईजा।
निर्गमन अध्याय 1-4 किना अक बाइबलिरी कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।