10. दश मुसीबती- कहानी

परमेश्वरै मूसै जां हारूननी चेतावनी दित्ती कि फिरौन राजै ढींठ भौ गांहणु। जेख्णी सै फिरौन राजै किनि गियै ता तैन्हैं बोलु, “इस्राएलेरा परमेश्वर ऐहीं बौलता, मिंडै मैहणुवां गांहणा दै।” पण फिरौन राजै तैन्हैरी ना शुणी जां तैन्हांनि बोलु, कि मूं इस्राएली मैहणु ना छडणै, फिरौन राजै सैक्यै मैहणु तकड़ी मैहनत कांननी मजबूर कियै।

फिरौन राजा हौरा ढींठ भौ गिया, जां तैन्हां मैहणुवां ना थ्या छडणा चांहथा, ऐठणीरै तेईनी परमेश्वरै मिस्र दैशा पन दश खतरनाक मुसीबती भेईजी। ऐन्हां मुसीबतिया केरै जरियै परमेश्वर शुणांणा चांहथा थ्या, कि सै फिरौन राजै किना जां मिस्र देशेरै दैवता किना ज्यादा ताकतवर आ।

परमेश्वरै नील नदिरू पांणी खुना सैयि बदली दित्तु, पण फिरी बि फिरौन राजा इस्राएली मैहणुवां छडणा ना थ्या चांहथा।

परमेश्वरै पूरै मिस्र दैशा मझ गोहि भेईजी। फिरौन राजै गोहिया दूर कांनेरै तेईनी मूसै सिंउ विनती की। जेख्णी फिरौन राजै हैरू कि सारी गोहि मरी गेई, तां तेनी अपड़ा मंन होरा कठोर करी लिया जां इस्राएली मैहणु ना छड्डै।

ऐठणीरै तेईनी परमेश्वरै खतरनाक टिड्डिया केरी मुसीबत भेईजी। तैठां किना बाद परमेश्वरै खून चूसणै बाई मेछी भेईजी। फिरौन राजै मूसा जां हारून शदाय जां तैन्हां सिंउ बोलु, अगर सैक्यै तैस मुसीबती रौकी दैलै ता इस्राएली मैहणु मिस्र दैश छडि करी गही सकतै। जेख्णी मूसै प्रार्थना कि ता परमेश्वरै मिस्र दैशा किना खून चूसणै बाई मेछी दूर करी दित्ती। फिरौन राजै फिरी अपड़ा मंन कठोर करी दित्ता जां सैक्यै मैहणु फिरी ना छड्डै।

ऐठां किना बाद, परमेश्वरै मिस्रिया केरै सारै पालतु जानवर बिमार करी मारी छडै। पण फिरौन राजैरा मंन होरा कठोर भौ गिया जां तेनि इस्राएली मैहणु ना छड्डै।

तेख्णी परमेश्वरै मूसेनी बोलु, हत्था धूड़ लै जां तैस फिरौन राजेरै सामणै असमांणा धेरै सुट। जेख्णी तेनि ऐहीं कियु ता मिस्र देशैरा मैहणुवां जां जानवरा केरै शरीरा पनि बडै-बडै दर्दनाक गंडै भौ गियै, पण इस्राएली मैहणुवंनी किछ ना भू। तेख्णी परमेश्वरै फिरौन राजैरा मंन कठोर करी दित्ता। फिरौन राजै इस्राएली मैहणु फिरी ना छड्डै।

ऐठां किना बाद, परमेश्वरै मिस्र दैशा पन बडि-बडि अशण सुट्टी, जां अशणी ला सारी फसल बर्बाद भौ गैई, जां जै कौ घरा किना भेईर निकौथा सै मारी दित्ता। फिरौन राजै मूसा जां हारून शदाय जां तैन्हांनि बोलु, “मीं पाप कियौरा, तुवै सारै मैहणु गहि सकतै।“ मूसै प्रार्थना की जां असमांणा किना अशण पूंणी बंद भौ गैई।

पण फिरौन राजै फिरी पाप केया जां अपड़ा मंन फिरी कठोर करी लिया। तेनि इस्राएली मैहणु ना छड्डै।

फिरी परमेश्वरै मिस्र दैशा मझ टिट्टा केरी मुसीबत भेईजी। ऐन्हैं टिट्टै मिस्र देशैरी सारी फसल खा लैई जै अशणी किना बर्बाद भूंणा किना बचौरी थी।

फिरी परमेश्वरै त्रा धियाड़ी मिस्र दैशा मझ चणपट्ट अंधारू करी छडु। ऐ अंधारू यौउतु काउ थियु कि मिस्र देशैरै मैहणुवां केरै बोलै भेईर ना निकोहियु। पण जेठि इस्राएली मैहणु रिहींथ्यै तैठि प्रगड़ु थियु।

ऐन्हां नउवा मुसीबतिया किना बाद बि, फिरौन राजै इस्राएली मैहणु ना छड्डै जां छडणा किना नंमा केया। केईनी कि फिरौन राजै ना थियु शुणौरू, ऐठणीरै तेईनी परमेश्वरै अक लाष्ट मुसीबत भेईजणैरी योजना बंणाई। ऐनि मुसीबती ला फिरौन राजैरा मंन बदली गांहणा।