11. फसहैरा त्यौव्हार- कहानी

परमेश्वरै मूसा जां हारून फिरौन राजै किनि ऐ बौलणेरै तेईनी भेईजै कि इस्राएली मैहणुवां छडि दै। तैन्हैं तैसनी चेतावनी दित्ती कि अगर तु ऐन्हां मैहणुवां ना छडैला, ता परमेश्वरा मिस्र देशैरै मैहणुवां केरै जां जानवरा केरै जैठै पुत्र मारी दींणै। फिरौन राजै ऐ शुणी करी बि परमेश्वरा पन विश्वास काना किना जां तेसैरी गल्ल मंनणा किना नंमा करि दित्ता।

फिरी परमेश्वरै बोलु, कि आंउ, तैस मैहणु जै मूं पनि विश्वास करैला तेसैरै जैठै पुत्रा बचा लैला। जां हर परिवार ऐकि शुद्ध निष्कलंक उरनुरा बलिदान दैला।

परमेश्वरै इस्राएली मैहणुवां सिंउ तैस उरनुरा खून अपड़ै दुवारेरै चौगटा पनि लांणेरै तेईनी बोलु, जां तैन्हां तेसै राति तैस उर्नुरु मास भुनि करी बिना खमीर बाई रोटिया सेईतै छुईं खांणु थियु। परमेश्वरै ऐ बि बोलु कि रोटि खांणा किना बाद छुईं-छुईं मिस्र देशैरै मैहणुवां छडणानि बि तियार बेशै।

जिहीं कांननी परमेश्वरै इस्राएली मैहणुवंनी बोलौरू थियु तैन्हैं तेठणीरै मुताबिक सभ किछ कियु। “परमेश्वरै बोलु, कि तेसै राति अधरातै मूं मिस्र देशैरै मझम्मैं बतै गांहणु, जां मिस्र देशैरै हर मैहणुरै जां जानवरेरै जैठै बच्चै मारी छडणै।”

इस्राएली मैहणुवां केरै हरेक दुवारा पनि उरनुरा खून लगौरा थ्या, ऐठणीरै तेईनी परमेश्वरै सैक्यै घरै छडि दित्तै। तैन्हां घरा अंतरियें सारै मैहणु सलामत थ्यै। सैक्यै सारै मेम्नेरै मतलब उरनुरै खूनेरी वजहि सिंउ बचि गेईथ्यै।

पण मिस्री मैहणुवें परमेश्वरा पनि विश्वास ना केया जां तेसैरी गल्ल ना मंनी। ऐठणीरै तेईनी परमेश्वरै तैन्हैरै घरै ना छड्डै। परमेश्वरै मिस्री मैहणुवां केरै सारै परिवारेरै सारै जैठै बच्चै मारी छडै।

जैल्हिरै केईदिया केरै जैठै पुत्रा किना लै करी फिरौन राजेरै जैठै पुत्रा तेईनी, हरेक जैठा पुत्र मरी गिया। ऐस गहरी घटनाय तका करी मिस्र देशैरै मैहणु रूंणा जां हिक पिटणा लगै।

तां तेसै राती, फिरौन राजै मूसा जां हारून शदाय जां बोलु, “तुवै इस्राएली मैहणुवां लैकरी झटपट मिस्र दैशा किना चलि गहा।” मिस्र देशैरै मैहणुवें बि इस्राएली मैहणुवंनि बोलु, कि छंदै तुवै झटपट ऐठां किन निकोही गहा।