12. इस्राएली मैहणुवां केरू मिस्र दैशा किना चलि गांहणु (निर्गमन) –कहानी)
मिस्र दैशा किना निकोही करी इस्राएली मैहणु बड़ै खुश थ्यै। सै अबै गुलाम ना थ्यै, जां सैक्यै वायदै बाऐ दैशानि गांहथै थ्यै! जै किछ बि इस्राएली मैहणुवें मगथियु, मिस्री मैहणुवें सै सभ किछ दित्तु, यो तेईनी कि सुन्ना, चाँदी जां केही मेंहगी चीजै बि दी दित्ती। होरै देशेरै किछ मैहणुवें परमेश्वरा पन विश्वास केया जां जेख्णी इस्राएली मैहणु मिस्र दैशा किना चलि पियै ता सै बि तैन्हां साउगा चलि पियै।
परमेश्वरै धियाड़िरै टैंमा तैन्हानि बत्त शुणांणेरै तेईनी बदऐरा भयांकर खम्बा तैन्हेरै आघै-आघै चला। जां रातिरै टैंमा ऐ खम्बा आगिरा खम्बा बणी गिया। परमेश्वर जै कि तैस बदऐरै खम्बै जां आगिरै खम्बै मझ थ्या, हमेशा तैन्हां साउगा थ्या जां यात्राय मझ तैन्हैरी अगुवाई की। तैन्हां सिर्फ तैस खम्बेरै पीछै-पीछै चलणु थियु।
थोड़ै टैंम बाद, फिरौन राजै जां तेसैरै अधिकारियै अपड़ा मंन बदलि दित्ता। सै इस्राएली मैहणुवां फिरी अपड़ा गुलाम बंणाणा चांहथै थ्यै। ऐठणीरै तेईनी तैन्हैं इस्राएली मैहणुवां केरा पीछा केया। ऐ परमेश्वरै थ्या जेनि तैन्हैरै मंन बदली दित्तै। परमेश्वरै ऐ ऐठणीरै तेईनी कियु कि सै ऐ चांहथा थ्या कि हर मैहणु ऐ पता लगि गहिया कि फिरौन राजै किना जां मिस्री मैहणुवां केरै दैवता किना, यहोवा परमेश्वर सभनियां ज्यादा ताकतवर आ।
जेख्णी इस्राएली मैहणुवें मिस्र देशैरी सैना ऐईंती तकाय ता तैन्हां पता लगा कि सै फिरौन राजैरी सैना आ जै तैन्हैरा पीछा काती आ जां सैक्यै फिरौनेरी सैना जां लाल समुंद्रा बिच फसि गियौरै अत्तै। सै बड़ै डरि गियै जां रूंणा लगै, “कि असै मिस्र दैश केईनी छड्डा? अबै असुवां मरना किना कौ ना बचा सकता।
मूसै इस्राएली मैहणुवां सेईतै बोलु, “डरा मेईं! परमेश्वर आज तुवाड़ै तेईनी लड़ैला जां तुहां बचाला।” तां परमेश्वरै मूसै सिंउ बोलु, “ऐन्हां मैहणुवंनी लाल समुन्द्रा पार गांहणेरै तेईनी बोल।”
तां परमेश्वरै बदऐरा खम्बा लैकरी इस्राएली मैहणुवां जां मिस्री मेहणुवां केरै बिच रखि दित्ता ताकि मिस्री सैना इस्राएली मैहणुवां ना हैरी सकिया।
तां परमेश्वरै मूसै सिंउ बोलु, “समुन्द्रा पारियें पासै धेरै अपड़ा हत्थ बढ़ा जां तिहींयें मूसै अपड़ा हत्थ पार धेरै केया फिरी समुन्द्रेरै दो हैसै भौ गियै जां तेदि बतै गांहणेरै तेईनी बत्त बणीं गैयि।
इस्राएली मैहणु समुन्द्रा बिच शुक्की जमीनि पनि चलणा लगै, जां समुन्द्रा पार टपि गियै।
तां परमेश्वरै सैक्या बदअ बत्तै किना प्रन चुकि लिया ताकि मिस्री सैना इस्राएली मैहणुवां समुन्द्र पार कातै हैरी लिया। मिस्री सैनाय तैन्हां पकड़नेरै तेईनी तेन्हैरा पीछा कांनेरा फैसला लिया।
ऐठां किना बाद ऐहीं भू कि मिस्री मैहणुवें समुन्द्रेरी बिच्च बाई बत्तै बतै इस्राएली मैहणुवां केरा पीछा केया, पण परमेश्वरै मिस्री सैना डरा दित्ती जां तैन्हेरै रत्थ फसाय दित्तै। सै चिंडै दींणा लगै, “नशा! इस्राएलिया केरी तरफों परमेश्वर आ लड़ता!”
सारै इस्राएली मैहणु समुन्द्रेरै होरै पासै पुजि गियै। तां परमेश्वरै मूसै सिंउ बोलु कि समुन्द्रा धेरै हत्थ कर, जेख्णी मूसै ऐहीं कियु तां पांणी मिस्री सैनाय पनि अईछी पियु, जां पेहिलै सैयि भौ गियु। सारी मिस्री सैना डुबि गैई।
जेख्णी इस्राएली मैहणुवें हैरू कि मिस्री मैहणु मरि गियौरै अत्तै ता तैन्हैं परमेश्वरा पनि विश्वास केया कि मूसा परमेश्वरेरी तरफों भविष्यवक्ता थ्या।
इस्राएली मैहणु ऐठणीरै तेईनी बड़ै खुश थ्यै केईनी कि परमेश्वरै सैक्यै मरना किना जां गुलाम भूंणा किना बचा लियौरै थ्यै। अबै सै परमेश्वरैरी पूजा कांननी जां तैसेरी आज्ञायरा पालन कांननी आजाद थ्यै। इस्राएली मैहणुवें अपड़ी आजादिरा त्यौव्हार मनांणेरै तेईनी जां परमेश्वरैरी महिमा कांनेरै तेईनी मतै गीत लाय। केईनी कि परमेश्वरै सैक्यै मैहणु मिस्री सैनाय किना बचाउरै थ्यै।
परमेश्वरै इस्राएलियानि हर साल अक त्यौव्हार मनांणनि आदेश दित्ता, ऐस गल्लै याद कांनेरै तेईनी कि किहीं परमेश्वरै मिस्री मैहणु हारा दित्तै जां सैक्यै गुलाम भूंणा किना आजाद कियै। ऐस त्यौव्हारेरू नाँ फसाहेरा त्यौव्हार रखी गियु। ऐस त्यौव्हारा मझ सैक्यै खुशी मनांणेरै तेईनी ऐकि तकड़ै उरनुरा बलिदान करिया। जां भुनि करी बिना खमीर बाईया रोटिया सेईतै खईया। ऐस त्यौव्हारानि फसाहेरा त्यौव्हार बि बौलतै।
12:33-15:21 किना बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।