13. इस्राएली मैहणुवां सेईतै परमेश्वरैरा वायदा- कहानी
परमेश्वरै इस्राएली मैहणुवां किना लाल समुन्द्र पार करवा, तां परमेश्वर तैन्हां बणां मझीं सीनै पहाड़ा पर्वता पनि लै गिया। ऐ सेहै पर्वत थ्या जेठि मूसै जअतु झिल्ह हेथियु। तैन्हैं मैहणुवें तैस पर्वता हैट अपु बेशणैरै तेईनी तम्बु बंणा दित्तै।
परमेश्वरै मूसै जां सभनियां इस्राएली मैहणुवां सिंउ बोलु, “तुवै हमेशा मिंडी गल्लैरा पालन करियां करा जां जै वायदा आंउ तुहां सेईतै काता तैस वायदै पनि टिकि रिय्हा। अगर तुवै ऐहीं कातै, ता तुवै मिंडै खास मैहणु भूंणै, ऐ सारी धरती मिंडी आ, जां तुवै मिंडी नजरी मझ याजका केरा राज्य जां अक पवित्र जाति बंणेलै।”
परमेश्वरा ऐईंणेरै तेईनी तैन्हैं मैहणुवें त्रा धियाड़ी अपांणा बिल्कुल तियार केया। तां परमेश्वर सीनै पहाड़ेरी चोट्टी पनि हैट उतरा, जेख्णी सै या ता भुन्जल भुवा, बिजई चमकणां लगी, काहिया केरी भयांकर आवाज भुई। तां मूसा ऐपु, पिच्चु पर्वता पनि चढ़ि गिया। सिर्फ मूसैनी ऐ पहाड़ा पनि ऐईंणैरी इजाजत थी।
तां परमेश्वरै मैहणुवां सिंउ अक वायदा केया, जां बोलु, “आंउ तुवाड़ा परमेश्वर यहोवा आ। आंउ ऐ आ जेनि तुवै मिस्र दैशेरी गुलामी किना छडाई। जां मूं छडि करी अबै कौसक्यै होरै दैवतैरी पुजा मेईं कातै।”
"तु अपड़ै तेईनी कोई मूर्ती मेईं बणांय, ना मूर्तिया केरी पुजा करै, केईनी कि आंउ तुवाड़ा सिर्फ अक्कै परमेश्वर आ। तु अपड़ै परमेश्वरैरू नाँ बेकार मझ मेईं लींता। तु आराम धियाड़ी पवित्र मंनणेरै तेईनी याद रखै। तु छी धियाड़ी अपड़ा कंम करै, सत्तवीं धियाड़ि तुवाड़ै तेईनी आराम कांनेरी जां मिंडी भक्ति कांनेरै तेईनी आ।”
“तु अपड़ै मयि-बबैरा आदर करै। तु कोसकैरा खून मेईं काता। तु व्याभिचार मेईं काता, ना चोरी करै, तु कोसकेरै खिलाफ झूठी गवाहि मेईं दींता, तु कौसेरै बि घरैरा लालच मेईं काता, जिहीं कि अपड़ै ग्रँवालेरी लाड़िरा, तेसैरै घरैरा, तैसेरिया चीजा केरा लालच मेईं काता।”
तां परमेश्वरै ऐक्यै दश हुक्म घौड़ेरै दुवां सलैटा पन लिखि करि मूसैनि दित्तै। फिरी परमेश्वरै मैहणुवंनी पालन कांनेरै तेईनी होरै बि मतै सारै नीति-नियम दित्तै। फिरी परमेश्वरै बोलु, “जै बि मैहणु ऐन्हां नीति-नियमा केरा पालन करैला ता परमेश्वरा अपड़ै वायदेरै मुताबिक तैन्हां मैहणुवंनी आशीष जां सुरक्षा प्रदान कांनी। परमेश्वरै ऐ बि बोलु कि अगर जै ऐन्हां नीति-नियमा केरा पालन ना करैला ता सैक्यै सजाहिरै हकदार भूंणै।
परमेश्वरै इस्राएली मैहणुवंनी अक बड़ा बड्डा तम्बु बंणाणेरै तेईनी बोलु, ऐस तम्बुनी मिलाप बाआ तम्बु बोलु। परमेश्वरै तैन्हांनि ठीक-ठीक शुणांउ कि ऐ तम्बु तुहां किहीं बंणाणा, जां तैस अन्दर ताउ केणुहीं चीजै रखणी अत्ति। परमेश्वरै तैन्हांनि बोलु, कि तैस तम्बुरै दो कमरै बंणाणेरै तेईनी अक बड्डा पड़दा ला दैई। सिर्फ महांयाजकानि ऐ तैन्हां कमरा मझ गांहणैरी इजाजत थी केईनी कि परमेश्वर तैस मझ रिहींथ्या।
परमेश्वरै तैन्हां मैहणुवंनी मिलाप बाऐ तम्बुरै सामणै अक वेदी बंणाणेरै तेईनी बोलु, ऐ एठणीरै तेईनी बंणाणी कि जै कोई परमेश्वरेरै नीति-नियमा केरा पालन ना करैला ता सै अपड़ै पापेरी माफिरै तेईनी तैस वेदी पनि ऐकि जानवरा अणिकरी याजका किनि लै आईछिया जां याजका सै जानवर परमेश्वरेरै तेईनी बलि दी करी वेदी पनि फुकि दींणा। परमेश्वरै बोलु कि तैस जानवरेरै खूना तैस मैहणुरै पापा साफ करी दींणै। ऐनि हिसाबै परमेश्वरा तैस मैहणुरै पाप ना तकांणै। सै मैहणु परमेश्वरेरी नजरी मझ शुद्ध भूंणा। परमेश्वरै मूसेरा भाई हारून जां हारूनेरा वंश अपड़ै याजक भूंणेरै तेइनी चुणी लियै।
परमेश्वरै तैन्हां मैहणुवंनी जै नीति-नियम दितौरै थ्यै सै तैन्हां नीति-नियमा कांनेरै तेईनी राजी भौ गियै। सै सिर्फ परमेश्वरेरै मैहणु भूंणेरै तेईनी जां सिर्फ तेसैरी ऐ आराधना कांनेरै तेईनी राजी भुवै। परमेश्वरेरै वायदै काना किना कुछ टैंम बाद तैन्हैं मैहणुवें बड़ै बुरै पाप कियै।
केहिया धियाड़िया तेईनी, मूसा सीनै पहाड़ेरी चोट्टी ऐ पनि रिय्हा। सै परमेश्वरा सेईतै गल्लै काता रिय्हा। पण मैहणु मुसै भातै-भातै खिज्जी गियै। ऐठणीरै तेईनी सै हारूना किनी सुन्ना लै करी यै जां तैसनि बोलु कि असैड़ै तेईनी अक मूर्ती बंणा, ताकि सै परमेश्वरेरी जगाई तैस मूर्तिरी भक्ति करी सकिया। ऐनि हिसाबै, तैन्हैं परमेश्वरेरै खिलाफ बड़ा बुरा पाप केया।
हारूने सुन्नेरै बछड़ैरी अक मूर्ति बंणाई। फिरी तैन्हैं मैहणुवें तैस मूर्तिरी पूजा कांनी शुरू करी दित्ती जां तैसनी बलि चाढ़ना लगै। तैन्हेरै पापेरी वजहि सिंउ परमेश्वर तैन्हां पन बड़ा गुस्सै भौ गिया जां तैन्हैरा नाश कांना चांहथा थ्या। पण मूसै परमेश्वरा किनि प्रार्थना की जां परमेश्वरै तेसैरी प्रार्थना शुणी जां सैक्यै नाश ना कियै।
तैठां किना बाद मूसा सीनै पहाड़ा पना हैट उतरी या। सै तैन्हां दुवां घौड़ेरा सलैटा अपड़ै हत्था पकड़ी करी लै या जैन्हां पनि परमेश्वरै दश आज्ञाय लिखोरी थी। फिरी तेनि सैकेई मूर्ती हैरी, तैस मूर्ती हैरी करी सै बड़ा गुस्सै भौ गिया जां तेनि सै सलैट जैन्हां पनि सै दश आज्ञाय लिखोरी थी सै चकनाचूर करी दित्तै। केईनी कि जै तैन्हैं मैहणुवें कियु सै परमेश्वरेरी आज्ञायरै खिलाफ थियु।
तां मूसै सैकेई मूर्ती आगी मझ फुकि करी तेसैरी धूड़ बंणा दित्ती, जां सै धूड़ पांणी मझ मिला करी सै पांणी तैन्हां मैहणुवंनी पिवा दित्तु। परमेश्वरै तैन्हां मैहणुवां पनि अक बड़ी बड्डी मुसीबत भेईजी, जैसेरी वजहि सिंउ बड़ै सारै मैहणु मरी गियै।
तां मूसा फिरी तैस पहाड़ा पनि चढ़ी गिया जां प्रार्थना की, “हे परमेश्वर ऐन्हां मैहणुवां केरै पाप माफ करी दै। परमेश्वरै मूसैरी प्रार्थना शुणी जां तैन्हां मैहणुवां केरै पाप माफ करी दित्तै। तां मूसै जै सलैट भनौरै थ्यै तैन्हां सैयि तेनि नवें सलैट बंणा दित्तै।
निर्गमन अध्याय 19-34 किना अक बाइबलिरी कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।