14. बणां मझ भटकणु- कहानी

सीनै पहाड़ा पनि परमेश्वरा सेईतै वायदा कांना किना बाद, परमेश्वरै इस्राएली मैहणुवां केरी अगुवाई वायदेरै देशा कनान तेईनी की। परमेश्वरै बदऐरै खम्बै ला तैन्हां केरी अगुवाई की, जां सैक्यै तेसैरै पीछै-पीछै चलै।

परमेश्वरै अब्राहम, इसहाक जां याकूबा सेईतै वायदा कियौरा थ्या कि सै वायदेरा सै देश तेन्हैरै वंशानि दैला, पण ऐस टैंमा तैठि बड़िया जातिया केरै मैहणु रिहींथ्यै। तैन्हां मैहणुवंनी कनानी जातिरै मैहण बोलींथ्यै। ऐ कनानी मैहणु परमेश्वरैरी भक्ति ना करींथ्यै जां तेसैरी आज्ञा ना मनींथ्यै। सै झूठा दैवता केरी भक्ति करींथ्यै जां बड़ै भारी बुरै कंम करींथ्यै।

परमेश्वरै इस्राएली मैहणुवां सिंउ बोलु, “जेख्णी तुवै तैस वायदेरै देशा मझ गाहलै ता तेठणीरै सारा कनानियां मैहणुवां किना छुटकारा पा लैई। तैन्हां सेईतै यारी कारी मेईं लांतै जां तैन्हां सिंउ ब्याह बि मेईं कातै। तुहां तैन्हेरी मूर्ती पूरी तराहि सिंउ नष्ट करि दींणी। अगर तुवै मिंडै आदेशैरा पालन ना करेलै, जां मिंडै बदलै तेन्हैरै दैवता केरी भक्ति करेलै ता तुवै सजायरै हकदार भूंणै।”

जेख्णी इस्राएली मैहणु कनान दैशेरी सीमाय पन पुज्जै, तां मूसै इस्राएली मैहणुवां केरै गौत्रा मझां अक-अक करि करी बाराह मड़द चुणै। तेनि तैन्हां मड़दानि आदेश दित्ता कि गहा तैस दैशेरा पता करा जां तका करि अईछा कि सै केतिया दैश आ। सैक्यै ऐठणीरै तेईनी बि भेईजै कि सै पता ला लिया कि कनानी मैहणु कियौतै ताकतवर जां कियौतै कमजौर अत्तै।

तैन्हैं बारहै मड़दै कनान दैशा मझ चाही दियाड़ी सफर केया, जां फिरी सै वापिस अईछी गियै। तैन्हैं मैहणुवंनी शुणांउ, कि “तेठणिरी जमीन बड़ी उपजाउ आ जां तैठि बड़ि भारी फसलि अत्ति!” पण दश भेदियै बोलु, “तैन्हेरै नगरै बड़ै दृढ़ै अत्तै जां सैक्यै मैहणु बड़ै लम्मै-झम्मै अत्तै! अगर असै तैन्हां पन हमला कातै ता तैन्हां असै जरूर हारयांणी दींणै जां असै तैन्हां मारी छडणै।“

तां इकदम कालेब जां यहोशू जां होरनियें दुवें भेदियै बोलु, “ऐ सच आ कि कनान दैशेरै मैहणु लम्मै-झम्मै जां ताकतवर अत्तै, पण असै तैन्हां जरूर हारियांणी सकतै! परमेश्वर असेड़ै तेईनी लड़ैला।”

पण मैहणुवें कालेब जां यहोशुरी गल्लै ना शुणी। सै मूसै जां हारूना पन गुस्सै भौ गियै जां बोलु, “तुहैं असै ऐस खतरनाक जगाय पन केईनी अंणै? असुवां मिस्र दैशा मझ ऐ रींहणु चेहिंथु थियु। अगर असै तैस दैशा मझ गांहथै ता असै लड़ाई मझ मरि गांहणै, जां कनानेरा मैहणुवां असेड़ी लाड़ी जां बच्चै गुलाम बंणा लींणै।” सैक्यै मैहणु तैन्हां मिस्र दैशानि वापिस गांहणेरै तेईनी अक अगुवा चुणना चांहथै थ्यै।

जेख्‍णी तैन्हैं मैहणुवें ऐहीं बोलु ता परमेश्वर बड़ा गस्सै भौ गेईथ्या। सै मिलाप बाऐ तम्बू मझ या जां बोलु, “तुहैं मिंडै खिलाफ बगावत की, ऐठणीरै तेईनी तुहां सभनियां ऐस बणां मझ भटकणु पूंणु। हरेक जणा जै बिहा सालैरा या तैठां जादी उम्रिरा आ सै तैठियै मरी गांहणा जां कदि बि तैस दैशा मझ गहि ना सकैला जै आंउ तुहांनि दींता आ। सिर्फ कालेब जां यहोशू तैस दैशा मझ पुजेलै।”

जेख्णी मैहणुवें परमेश्वरा किना ऐहीं शुणु, ता सै बड़ै दुखी भौ गियै केईनी कि तैन्हैं पाप थ्या कियौरा। ऐठणीरै तेईनी तैन्हैं कनान दैशेरै मैहणुवां पन हमला कांनेरा फैसला केया। मूसै तैन्हांनि चेतावनी दित्ती कि यहोवा परमेश्वर तुहां साउगा ना, मेईं गहा, तुवै दुशमणां किना हारी गांहणै, पण तैन्हैं मूसेरी गल्लै ना शुणी।

परमेश्वर ऐस लड़ाई मझ तैन्हां साउगा ना थ्या, ऐठणीरै तेईनी कनानी मैहणुवें सै हारियांणी दित्तै जां तैन्हां मझां बड़ै भारी ता मरि गियै। तां इस्राएली मैहणु कनान दैशा किना वापिस हठि यै। जां इस्राएली मैहणु चाहिया साला तेईनी सै बणां मझ भटकतै रिय्है।

इस्राएली मैहणु चाहिया साला केरै दौरान बणां मझ भटकतै रिय्है, तां बि परमेश्वरै तैन्हेरी जरूरतिया केरा इन्तजाम केया। तेनि तैन्हांनि स्वर्गा किना रोटि दित्ती जैसनि “मन्ना” बौलतै। परमेश्वरै तैन्हेरै तम्बुनि बटेर नैँईयेरै पंछी भेईजै ताकि तैन्हेरै तेईनी खांणुनि मास बि भुईया। परमेश्वरै ऐन्हां चाहिया साला मझ ना ता कौसकेरै लिकड़ै फटणा दित्तै जां ना ऐ बूट फटणा दित्तै।

यो तेईनी कि परमेश्वरै चमत्कार करी करि तैन्हेरै तेईनी पींणेरै तेईनी शपड़ा मझां पंणी कढु। पण यौउतु सभ किछ कांनेरै वाबजूद, इस्राएली मैहणु परमेश्वरेरै जां मूसेरै खिलाफ बुड़बुणांतै रिय्है। फिरि बि, परमेश्वर अपड़ै वायदेरै मुताबिक विश्वासयोग्य बंणी रिय्हा, जै वायदा तेनि अब्राहम, इसहाक जां याकूबेरै वंशजा केरै तेईनी कियौरा थ्या सै तेनि पूरा केया।

अक टैंम होरा या जेख्णी इस्राएली मैहणुवां किनि पींणुनि पांणी ना थियु, तां परमेश्वरै मूसैनि बोलु, “जेख्णी तु शपड़ानि पांणिरै तेईनी बोलेला, तेख्णी तैस शपड़ा किना अपड़ै आप पांणी निकूंणा लगि पूंणु।” पण मूसै शपड़ा सेईतै कोई गल्ल ना की। ऐठणिरी वजाय तेनि शपड़ा पनि दो बार शोठि ला बहि, ऐनि हिसाबै तेनि परमेश्वरेरै आदेशैरा पालन ना केया। सभनियांनि शपड़ा मझां पांणी ता पीणुनि निकोहि गियु, पण परमेश्वर मूसै सिंउ बड़ा गुस्सै भौ गिया। तेनि बोलु, “तीं मिंडै आदेशैरा पालन ना केया, ऐठणीरै तेईनी तु वायदेरै दैशा मझ ना पुजेला।”

जेख्णी इस्राएली मैहणु बणां मझ चाहिया साला तेईनी भटकी रिय्हौरै थ्यै, तेख्णी जैन्हैं परमेश्वरेरै खिलाफ बगावत कियौरी थी सै सारै मरि थ्यै गियौरै। तां परमेश्वरै फिरी सैक्यै मैहणु वायदेरै दैशा मझ भेईजै जां तेन्हैरी अगुवाई की। अबै मूसा बड़ा बुढा भौ थ्या गियौरा, ऐठणीरै तेईनी परमेश्वरै तैन्हां मैहणुवां केरी अगुवाईरै तेईनी जां तेसैरी मजत कांनेरै तेईनी यहोशू चुणि लिया। परमेश्वरै मूसै सिंउ वायदा केया कि अक धियाड़ी सै तैन्हां मैहणुवां किनि मूसै सैयि भविषयवक्तै भेईजैला।

तां परमेश्वरै मूसैनि ऐकि पहाड़ेरी चोट्टी पनि गांहणेरै तेईनी बोलु ताकि सै वायदेरै तैस दैशा हैरी सकिया। मूसै वायदेरा दैश हैरा पण परमेश्वरै मूसैनि तैस दैशा मझ गांहणैरी इजाजत ना दित्ती। तेठां बाद मूसा मरि गिया, जां इस्राएली मैहणुवें 30 धियाड़िया तेईनी शौक मना। यहोशू तैन्हैरा नवाँ अगुवा बंणी गिया। यहोशू अक बधिया अगुवा थ्या केईनी कि तेनि परमेश्वरा पनि विश्वास केया जां तेसैरै आदेशैरा पालन केया।