15. वायदेरा देश- कहानी

अन्त मझ, अबै सै टैंम अईछी गियौरा थ्या कि इस्राएली मैहणु वायदेरै देशा, कनान मझ गहि सकींथ्यै। तैस देशा मझ यरीहो नाँईयेरा अक शहर थ्या। तैसेरी सुरक्षायरै तेईनी तेसैरै चोउवो पासै बड़ि बड्डी मजबूत कंथी थी, यहोशु अन्त मझ तैस शहरा मझ दो भेदियै भेइजै। तैस शहरा मझ राहाब नाँईंयेरी अक वेश्या रिहींथी, तेनि सैक्यै भेदियै अपड़ै घरा मझ छपा छडै, जां फिरी बाद मझ तेनि तैन्हैरी तैस शहरा किना नशणानि मजत की। तेनि ऐहीं ऐठणीरै तेईनी कियु कि सेकैई परमेश्वरा पनि विश्वास करींथी। तैन्हैं कसम खाउरी थी कि इस्राएली मैहणु जेख्णी यरीहो शहरैरा नाश करेलै तेख्णी राहबेरी जां तेसैरै परिवारैरी रक्षा करेलै।

इस्राएली मैहणुवां वायदेरै देशा गांहणानि यरदन नदी पार कांनी पेईथी। परमेश्वरै यहोशु सेईतै बोलु, ‘याजका पेहिलै गांहणा दै।” जेख्णी याजकै यरदन नदी मझ अपड़ा पैयिड़ रखा ता पांणिरी छाली रुकि गेई, जेनि ला कि इस्राएली मैहणु नदिरै पारियैं पासै शुक्की जगाय पुजि सकिया।

जेख्णी तैन्हैं मैहणुवें यरदन नदी पार करी लैई, तां परमेश्वरै यहोशु सिंउ बोलु, कि यरीहो शहरा पन हमला कांनेरै तेईनी तैयार रैय्ही, बल्कि सै शहर बड़ा मजबूत थ्या। परमेश्चरै तैन्हां मैहणुवां सिंउ बोलु कि याजका जां सैनिका छियां धियाड़िया तेईनी तैस शहरेरै चोउवो पासै चक्कर लांणा। फिरी याजकै जां सैनिकै तिहींयें कियु।

फिरी सत्तवीं धियाड़ी, इस्राएली मैहणुवें तैस शहरेरै चोउवो पासै सत्त बारी होरै चक्कर लाय। जेख्णी सैक्यै शहरेरै चोउवो पासै सत्त चक्कर ला बेठै, ता याजकै अपड़ी काही बजाई जां सैनिकै जौरदार नारहै लाय।

तां यरीहो शहरेरी चोउवो पासेरी मजबूत कंथी छिढी गेई! फिरी इस्रएली मैहणुवें परमेश्वरेरै हुक्मेरै मुताबिक, जै किछ तैस शहरा मझ थियु सै सभ किछ नष्ट करी दित्तु। तैन्हैं सिर्फ राहब जां तेसैरा परिवार छडि दित्ता, केईनी कि सै इस्राएली मैहणुवां मझ किठी गेईथ्यै। जेख्णी कनान देशा मझ रींहणरै होरनियें मैहणुवें शुणु कि तैन्हैं यरीहो शहर नष्ट करी दित्ता, ता सै डरी गियै कि इस्राएली मैहणुवां तैन्हां पनि बि हमला कांना।

परमेश्वरै इस्राएली मैहणुवंनी हुक्म दितौरा थ्या कि कनान देशा मझ रींहणारी कौस बि जाति सेईतै यारी-दोस्ती मेईं लांतै। पण कनान देशा मझ रींहणारी गिबोनियो नाँईयेरी एकि जाति यहोशु सेईतै झूठ बोलु कि असै कनान देशा किना दूर रींहणारै मैहणु अत्तै। तैन्हैं यहोशु सेईतै बोलु, कि तुवै असुवां सेईतै यारी-दोस्ती बणा लेया। पण यहोशु जां इस्राएली मैहणुवें परमेश्वरा किना ना पुच्छु कि सै गिबोनी मैहणु कोठां किना अत्तै। तैन्हैं गोबोनियां सेईतै यारी-दोस्ती ला लैई।

त्रियां धियाड़िया किना बाद, इस्राएली मैहणुवां पता लगा कि गिबोनी मैहणु कनान देशा मझ ऐ रिहींथ्यै। सै बड़ै गुस्सै भौ गियै केईनी कि गिबोनियें तैन्हानि धौखा दित्थिया। पण इस्राएली मैहणुवें गिबोनियां सेईतै यारी-दोस्ती बंणा रखी केईनि कि सै तैन्हैं परमेश्वरेरै सामणै बंणाउरी थी।

तां कुछ टैंम बाद, कनान देशा मझ रींहणारी एकि होरी जाति जां एमोरिया केरै राजै शुणु कि गबोनी मैहणुवें इस्राएली मैहणुवां सेईतै यारी-दोस्ती ला लैई, ऐठणीरै तैईनी तैन्हैं अपड़ि-अपड़ि सैना किट्ठी की जां अक बड़ि बड्डी सैना बंणाई जां गिबोनी मैहणुवां पनि हमला करि दित्ता। गिबोनी मैहणुवें यहोशुनी बिषैक भेईजा कि असैड़ी मजत कर।

ऐ गल शुणी करी यहोशु इस्राएली सैना किट्ठी की जां गिबोनी मैहणुवां केरी मजत कांनेरै तेईनी तैन्हैं पूरी रात सफर केया। भियगा पिचारि सिंउ तैन्हैं एमोरिया केरी सैना हैरान करी छडि जां तैन्हां पनि हमला करि दित्ता।

तैस धियाड़ी परमेश्वर इस्राएली मैहणुवां केरै तेईनी लड़ा। तेनि एमोरी मैहणु उलझनी मझ पा दित्तै जां बड़ै-बड़ै अशणिरै दांणै बरसाय जां एमोरी मैहणु मारी छडै।

परमेश्वरै दीह असमाणां मझ एकि जगाय रौकि दित्तु ताकि इस्राएली मैहणुवंनी एमोरिया हारियांणनेरै तेईनी ज्यादा टैंम मैई सकिया। तैस धियाड़ी, परमेश्वरै इस्राएलिया केरै तेईनी अक बड़ि बड्डी जीत हासिल कांनानि मजत की। जेख्णी परमेश्वरै एमोरी सैना हारियांणी दित्ती, ता बड़ै सारै कनानी जातिरै मैहणुवें किठी करि इस्राएली मैहणुवां पनि हमला करि दित्ता। यहोशु जां इस्राएली मैहणुवें बि तैन्हां पनि हमला करि दित्ता जां सैक्यै सारै मरी छडै।

ऐन्हां लड़ाईया किना बाद, परमेश्वरै इस्राएलेरै सारा गौत्रानि सारा दैश दी दित्ता, जेसैरा दींणैरा वायदा तैन्हैरै पूर्वजा सेईतै कियौरा थ्या। फिरी सै तैस देशेरै अधिकारी बंणी करि रीहणा लगै। तां फिरी परमेश्वरै इस्राएलानि तेसैरै पूरै लाकैनि शांति दित्ती।

जेख्णी यहोशु बुढा भौ गिया ता तेख्णी तेनि सारै इस्राएली मैहणु किट्ठै कियै। तां यहोशु इस्राएली मैहणुवंनी सैक्या वायदा याद करा जै तैन्हैं परमेश्वरा सेईतै सीनै पहाड़ पर्वता पनि कियौरा थ्या, कि सै तैस वायदेरा पालन करिया। इस्राएली मैहणुवें वायदा केया कि सै परमेश्वरेरै सामणै ईमानदार बंणी रैहलै जां तेसैरै हुक्मेरा पालन करेलै।