16. छडांणार- कहानी

यहोशू मरना किना बाद इस्राएली मैहणुवें परमेश्वरेरै हुक्मेरा जां नीति-नियमा केरा पालन ना केया, जां तैन्हैं तैस वायदेरै देशा किना जै बचि गियौरै कनानी मैहणु थ्यै सैक्यै भेईर ना कढै। इस्राएली मैहणुवें अपड़ै सच्चै परमेश्वर, यहोवा छडि करी कनानी मैहणुवां केरै दैवता केरी भक्ति कांनी शुरू करी दित्ती। इस्राएलिया किनी कोई राजा ना थ्या, ऐठणीरै तेईनी हर कोई तिहींयें काता थ्या जिहीं तैन्हां खरू लगतु थियु।

केईनी कि इस्राएली मैहणु लगातार परमेश्वरैरा अपमान कातै थ्यै, ऐठणीरै तेईनी परमेश्वरैरा कौप तैन्हां पन भड़कि पेया, जां सैक्यै दुशमणा केरै आधीन करी दित्तै; जां फिरी तैन्हेरै बोलै अपड़ै दुश्मणा केरै सामणै ना टिकियु। ऐन्हैं दुश्मणै इस्राएली मैहणुवां कैरी चीजै लुटि लेई, जां तैन्हैरी धन-दौलत नाश करी दित्ती, जां बड़ै भारी इस्राएली मैहणु मरी गियै। तैठां बाद, मत्तै साला बाद इस्राएली मैहणुवें अपड़ै पापा केरा पश्चाताप केया जां परमेश्वरा किना प्रार्थना की कि सै असु बचाईया।

हर बार परमेश्वर इस्राएली मैहणुवां केरी शुणींथ्या जां तैन्हां बचांणेरै तेईनी मतै सारै छडांणै बाऐ भेईजै। पण मैहणु परमेश्वरा भुलणा लगै जां होरनियां केरै दैवता केरै पीछै चलिकरी तैन्हैरी भक्ति कांना लगै। तां परमेश्वरै एकि दुश्मणा केरी जातिनी मिघानी मैहणुवंनी इजाजत दित्ती कि सै इस्राएली मैहणुवां हारा दिया।

मिघानियें सत्ता साला तेईनी इस्राएली मैहणुवां केरी फसल लुट्टि। इस्रएली मैहणु बड़ै डरि गियै, जां सैक्यै गुफाईया मझ छपि गियै ताकि मिघानी मैहणु तैन्हां तौपि ना सकिया। आखिर मझ, तैन्हैं परमेश्वरा किनि विंनति की कि सै असुवां बचाईया।

गिदोन नाँईयेरा अक इस्राएली मैहणु थ्या। अक धियाड़ि सै एकि शांत जगाय किणक फंडता थ्या, ताकि मिघानी मैहणु तैस चौरी ना सकिया। यहोवा परमेश्वरेरा स्वर्गदूत गिदोना किनि या जां तैसनि बौलु, “हे शूरवीर सूरमा, परमेश्वर ताउ सेईतै आ। गा जां इस्राएली मैहणुवां मिघानियां किना बचा।“

परमेश्वरै गिदोनानि तैस वेदी भुणां छिढांणानि जां भनणानि बोलु। पण गिदोन मैहणुवां हैरी डरींता थ्या, ऐठणीरै तेईनी तेनि रात भूंणा दित्ती। जेख्णी राती गियु तेख्णी सै गिया जां तेनि सै वेदी भन्नि छडि। तेनि परमेश्वरेरै तेईनी अक होरी वेदी बंणाई जां तैस पनि परमेश्वरेरै तेईनी बलि चाढ़ी।

दुईं दिहा मैहणुवें हैरू कि कुनिक्यै वेदी भन्नि करी टुकड़ै-टुकड़ै करि छडोरी आ, ऐठणीरै तेईनी सै बड़ै गुस्सै भुवै। सै गिदोना मांनेरै तेईनी तेसैरै घरै गियै, पण गिदोनेरै बाबै बोलु, “तुवै केईनी अपड़ै दैवतै बचांणैरी कोशिश कातै अतै? अगर सै दैवता, ता तैस अपड़ा बचाव ऐपु काना देया। ऐ गल्ल शुणि करी तैन्हैं गिदोन ना मारा।

तां इस्राएली मैहणुवां लुटणेरै तेईनी मिघानी मैहणु फिरी आईछि गियै। सै यौउतै जादै थ्यै कि तैन्हैरी गिणति ना करि सकींथ्यै। गिदोनै तैन्हेरै खिलाफ लड़नेरै तेईनी इस्राएली मैहणु किठियूंणेरै तेईनी शदाय। गिदोनै परमेश्वरा किना दुवां चिन्हां केरी मांग की ताकि तैस विश्वास भौ गहिया कि परमेश्वर सच्च मझ तैसनि इस्राएली मैहणुवां बचाणानि बौलता।

पेहिलै चिन्हेरै तेईनी, गिदोनै भ्रैडेरी उन्नै जमीनि पनि रखि करी परमेश्वरा सेईतै बोलु, भियागेरी औश सिर्फ भ्रैडेरी तैस उन्नै पनि पुईया जां भुणा ना पुईया। परमेश्वरै ऐहियें कियु। दुईं राति, तेनि परमेश्वरा सिंउ बोलु कि जमीन बिल्ही भौ गहिया पण भ्रैडेरी उन्न शुक्की रिय्हा। परमेश्वरै ऐहीं बि कियु। ऐन्हां दुवां चिन्हां केरी वजहि सिंउ, गिदोने विश्वास केया कि परमेश्वर सच्च मझ चांहथा कि सै इस्राएली मैहणुवां मिघानियां मैहणुवां किना बचाईया।

तेख्णी बत्ती हजार मैहणु गिदोना किनी यै, पण परमेश्वरै बोलु कि ऐ ता बड़ै जादै अत्तै। तेख्णी गिदोने 2200 मैहणु वापस घरेनी भेईजी दित्तै जै लड़ाई काना किना डरींतै थ्यै।परमेश्वरै गिदोना सेईतै बोलु, कि ऐक्यै मैहणु हालै बि बड़ै जादै थ्यै। ऐठणीरै तेईनी गिदोनै 300 सैनिका छडि करी बाकी सारै घरैनि वापस भेईजी दित्तै।

तैस राती परमेश्वरै गिदोना सेइतै बोलु, “मिघानियां केरै डैरै गा जां शुणता रैही कि सैक्यै कितु गल-बात कातै अत्तै ता तु तैन्हां पन हमला काना हैरी मेईं डरींता।” ऐठणीरै तेईनी तैस राती गिदोन हैट तैन्हेरै डैरै गिया तां तेठि अक सैनिक मिघानी सैनिका सिंउ अपड़ै सुपनेरै बारै मझ शुणाता थ्या। सै अपड़ा साउगियानि शुणांता थ्या, “ऐस सुपनेरा मतलब ऐ भुवा कि गिदोनेरी सैनाय मिघानियां केरी सैना हारा दींणी।“ जेख्णी गिदोने ऐ शुणु ता तेनि परमेश्वरेरी स्तुति की।

तेख्णी गिदोन अपड़ै डैरैनि वापस चलि गिया जां तेनि हर एकिनि अक-अक नरसिंगा, अक मिट्टिरा घड़ा, जां अक मशाल दित्ती। तैन्हैं मिघानी सैनिका केरा डैरा चुतरफा घैरी लिया जैठि मिघानी सैनिक झुलोरै थ्यै। गिदोनेरै 300 सैनिकै अपड़ी मशाली घड़ै मझ ढकोरी थी ऐठणीरै तेईनी मिघानी मैहणुवें तैन्हां मशालिया केरी लौ ना थी लधौरी।

तां गिदोनेरै सारै सैनिकै अपड़ै घड़ै भनि दित्तै, जां इकदम मशालिया मझां आग निकूंहणा लगी। तैन्हैं अपड़ै नरसिंगै बजाय जां जौरै चिंडै दींणा लगै, “यहोवा परमेश्वरैरी जां गिदोनेरी तलवार!”

परमेश्वरै मिघानी मैहणु हक्कै- बक्कै करी छडै, ऐठणीरे तेईनी तैन्हैं योकिया पनि बजि बारी जां यौउख बढणां लगि पियै। तैठां बाद, बाकि इस्राएली मैहणु बि तैन्हेरै डैरै किना शदा लियै ताकि मिगानी मैहणुवां केरा पीछा करि सकिया। तैन्हैं मतै सैरै मारी छडै। जां बाकि बचौतरै मिघानी मैहणु इस्राएल देशानि दाउड़ा लाय। तैस धियाड़ी बाराह हजार सैनिक मारी छडै। परमेश्वरै इस्राएली मैहणु बचा लियै।

तां इस्राएली मैहणुवें गिदोना सेईतै बोलु, कि तु असैड़ा राजा बंणी गा। पण गिदोने बोलु आंउ तुवाड़ा राजा ना बंणी सकता, पण आंउ तुहां किना किछ मगणा चांहथा कि तुवै तैन्हां गैहणा मूंनी दी दिया जै तुहैं मिघानी मैहणुवां किना लुटौरै अतै, तैन्हैं मैहणुवें बड़ा भारी गिदोनानि सुन्ना दी दित्ता।

तां गिदोने तेनि सुन्नै ला ऐपुनि खास कपड़ै बंणा लियै जेतियै मिघानी मैहणुवां केरा राजा लाईंथ्या। पण मैहणुवें तेसैरी भक्ति कांनी शुरू करी दित्ती जिहीं कि सै कोई मूर्ती आ। तां परमेश्वरै फिरी इस्राएली मैहणुवंनी सजा दित्ती केईनी कि तैन्हैं मूर्तिरी भक्ति की। परमेश्वरै तैन्हेरै दुश्मणानि इजाजत दित्ती कि सै इस्राएली मैहणुवां हारा दिया। आखिर मझ तैन्हैं फिरी क बारी परमेश्वरा किना मजतिरै तेईनी प्रार्थना की, जां परमेश्वरै तैन्हां बचांणेरै तेईनी अक छडांणै बा भेईजा।

ऐ गल्लै मतै बारी भुई कि इस्राएली मैहणु पाप करेलै, जां परमेश्वर तैन्हांनि सजा दैला, जां तैन्हां अपड़ा पापा किना पश्चाताप काना जां परमेश्वरा तैन्हां छडांणेरै तेईनी केणुक्या भेईजणा। मतै साला तेईनी, परमेश्वरै मतै छडाणै बाऐ भेईजै जैन्हैं इस्राएली मैहणु तैन्हेरै दुशमणां किना बचाय।

आखिर मझ, तैन्हैं मैहणुवें परमेश्वरा किना प्रार्थना की कि असुवां बि होरनियां देशा सैयि राजा चेहिंथा। जै तकांणनि लम्मा जां ताकतवर भुईया, जां जै लड़ाईया मझ असैड़ी अगुवाई करि सकिया। परमेश्वरा तैन्हैरी ऐ प्रार्थना मंजूर ना थी, पण परमश्वरै तैन्हांनि तेत्तिया ऐ राजा दित्ता जेतिया सै चांहथै थ्यै।