17. दाउदा सेईतै परमेश्वरैरा वायदा- कहानी

शाऊल इस्राएल देशैरा पेहिला राजा थ्या। सै लम्मा जां छै थ्या, जेतिया इस्राएली मैहणु चांहथै थ्यै बिल्कुल तेत्तिया थ्या। शाऊलै इस्राएल देशा मझ अक अच्छा राजा बणी करी अपड़ा योगदान दित्ता। पण बाद मझ सै बुरा मैहणु बणी गिया जां तेनि परमेश्वरेरै हुक्मेरा पालन ना केया, ऐठणीरै तेईनी परमेश्वरै तैसेरी जगाय अक होरा मैहणु चुणा जै अक धियाड़ी तैसेरी जगाय राजा बणना।

शाऊलेरी जगाय पनि परमेश्वरै अक जुवान इस्राएली मैहणु चुणा जेसैरू नाँ दाऊद थियु। दाऊद बैतलहम शहरैरा अक पुव्हाल थ्या। सै अपड़ै बाबेरी भ्रैडा केरी रखवाली करींथ्या, केही बारी दाऊदै शैर जां रिक्ख मारै केईनी कि सैक्यै भ्रैडा पनि हमला करींथ्यै। दाऊद अक नम्र जां धर्मी मैहणु थ्या। तेनि परमेश्वरा पनि विश्वास केया जां तेसैरै हुक्मेरा पालन केया।

जेख्णी दाऊद हालै जुवान मड़द थ्या, तेनि लम्मैं-चौड़ै फलिस्तीन सैनिक गोलियतेरै खिलाफ लड़ाई की। गोलियत अक बड़ा खतरनाक सैनिक थ्या। सै बड़ा तकतवर जां लगभग त्रा मीटर लम्मा थ्या। पण परमेश्वरै गोलियता मारना जां इस्राएली मैहणुवां बचांणानि दाऊदेरी मजत की। ऐठां बाद, दाऊदै इस्राएल देशैरै दुश्मणा पनि केही बारी जीत हासिल की। दाऊद अक बड़ा बड्डा सैनिक बणी गिया, जां तेनि मतिया लड़ाईया मझ इस्राएली सैनायरी अगुवाई की। इस्राएली मैहणुवें तेसैरी बड़ी तारीफ की।

इस्राएली मैहणु दाऊदा सिंउ बड़ा प्यार करींथ्यै ऐस गल्लै पनि शाऊल तैस सिंउ जलन रखणा लगा। शाऊलै दाऊदा मांनेरी मति बारी कोशिश की, ऐठणीरै तेईनी दाऊद तैस किना जां तेसैरै सैनिका किना बचणैरै तेईनी बणां मझ नशि गिया। अक धियाड़ि, जेख्णी शाऊल जां तेसैरै सैनिक दाऊदा तौपतै थ्यै तां शाऊल तैस तौपता एकि गुफाय मझ गिया। ऐ सैहै गुफा थी जैस मझ दाऊद छपौरा थ्या, पण शाऊलै सै ना लधा। दाऊद शाऊलेरै पीछै नीड़ ऐ थ्या जां तैस मारी सकींथ्या पण तेनि ऐहीं ना कियु। पण दाऊदै पीछै किना आईछी करी शाऊलेरै कपड़ेरा अक टुकड़ा कटि लिया, जेनि ला सै शाऊलानि शुणा सकिया कि सै राजा बणनेरै तेईनी तैस मांना ना थ्या चांहथा।

कुछ टैंम बाद, शाऊल लड़ाई मझ मरि गिया, जां दाऊद इस्राएलेरा राजा बंणी गिया। सै अक अच्छा राजा थ्या, जां मैहणु तैस सिंउ बड़ा प्यार करींथ्यै। परमेश्वरै दाऊदानि आशीष दित्ती जां सैक्या कामयाब बणा। दाऊदै केही लड़ाई लड़ि, जां परमेश्वरै इस्राएलेरै दुश्मणा हारांणेरै तेईनी दाऊदेरी मजत की। दाऊदै यरूशलेम शहर जिति लिया जां सै इस्राएल देशैरी राजधानी बणा ली, जेठि सै रिय्हा जां शासन केया। दाऊद चाहिया साला तेईनी राजा रिय्हा। दाउद राजेरै टैंमा, इस्राएल दैश ताकतवर जां अमीर बणी गिया।

दाऊद अक मंदिर बणांणा चांहथा थ्या जेठि सारै इस्राएली मैहणु परमेश्वरैरी आराधना करी सकिया जां तेसैरै तेईनी बलिदान चाढ़ी सकिया। लगभग 400 साला किना, सैक्यै मैहणु मूसेरै बंणाउरै तम्बू मझ परमेश्वरैरी आराधना जां बलिदान चढाईंथ्यै।

पण तैठि नातान नाँईंयैरा अक भविष्यवक्ता थ्या। परमेश्वरै सै दाऊदा किनि ऐ बोलणेरै तेईनी भेईजा, कि “तीं बड़ी लड़ाई लड़ोरी अत्ती, ऐठणीरै तेईनी ताउ मिंडै तेईनी ऐक्या मंदिर ना बणांणा। तिंडा पुत्र ऐस मंदिरा बंणाला। पण मूं ताउनी बड़ी जादी आशीष दींणी। तिंडै वंशा मझां कोई अक राजा मिंडै मैहणुवां पनि हमेशा तेईनी राज करैला। जां मसीह बि तिंडै वंशैरा भौला।” मसीह परमेश्वरैरा चुणौरा अक मैहणु थ्या जै ऐस संसारैरा मैहणुवां तैन्हैरै पापा किना बचाला।

जेख्णी दाऊदै नातान भविष्यवक्तैरा संदेश शुणा ता तेनि परमेश्वरैरा धन्यवाद केया जां तेसैरी स्तुति की। परमेश्वर तेसैरा आत्म-सम्मान बधींता थ्या जां तेसनी बड़ी भारी आशीष दींता थ्या। बेशक, दाऊदा ना थ्या पता कि परमेश्वरा ऐकेई गल्लै केख्णी पूरी कानी। इस टैंमा असै मैहणु जांणतै कि इस्राएली मैहणुवां हजार साल तेईनी मसीहरा इन्तजार कांना पेईथ्या।

दाऊदै मतै साला तेईनी बड़ै ईमानदारी सिंउ मैहणुवां पन राज केया, जां बड़ै प्यार सिंउ परमेश्वरेरै हुक्मेरा पालन केया जां परमेश्वरै तैसनि आशीष दित्ती। पण दाऊदै अपड़ि जिन्दगिरै आखरी टैंमा मझ परमेश्वरेरै खिलाफ बड़ा बड्डा पाप करी दित्ता।

अक धियाड़ी, जेख्णी दाऊदेरै सारै सैनिक लड़ाई काना गियौरै थ्यै तां दाऊद अपड़ै मैहला भेईर या। तां तेनि अक छै जनानी छत्ती पनि नहयूंती हैरी, तेनि तैस पना अपड़ी नजर ना हठाय। सै तैस ना जाणींथ्या, पण बाद मझ तेनि पता करि लेया कि तेसैरू नाँ बतशेबा आ।

दाऊदै अपड़ी नजर तैस पना हठांणेरी वजाय, अपड़ा अक सैनिक तैस जनानी अणनेरै तेईनी भेईजी दित्ता। दाऊद तैस जनानी सिंउ झुल्ला जां सैकेई वापिस घरैनि भेईजी दित्ती। कुछ धियाड़ी बाद बतशेबाय दाऊद राजेनी ऐक्या बिशैक भेईजा कि आंउ दुपरांणी आ।

बतशेबायरै लाड़ैरू नाँ ऊरिय्याह थियु। सै दाउदैरा अक खास सैनिक थ्या। तैस टैंमा सै लड़ाई कांना गियौरा थ्या। दाऊदै ऊरिय्याह लड़ाई किना वापिस शदा लिया जां तैसनि बोलु अपड़ि लाड़ी सेईतै बेश। पण होरै सैनिक लड़ाई मझ थ्यै ऐठणीरै तेईनी ऊरिय्याह घरै गांहणानि मुकरी गिया। तां दाऊदै ऊरिय्याह वापिस लड़ाई मझ भेईजी दित्ता, फिरी दाऊदै योआब सैनापति सेईतै बोलु, कि ऊरिय्याहै खतरनाक दुश्मणा बिच छडि करी वापिस चलि आईछा ताकि सै लड़ाई मझ मरी गहिया। तां ऐहीं भू कि ऊरिय्याह लड़ाई मझ मरी गिया।

ऊरिय्याह लड़ाई किना मरी गांहणा किना बाद, दाऊदै बतशेबाय सिंउ ब्याह करी लिया। बाद मझ तेनि दाऊदेरै पुत्रानि जन्म दित्ता। दाऊदै जै किछ बि कियु तेनि ला परमेश्वर तैस पनि बड़ा भारी गुस्सै भुवा। ऐठणीरै तेईनी परमेश्वरै नातान भविष्यवक्ता ऐ शुणांणेरै तेईनी दाऊदा किनि भेईजा कि तेसैरा पाप कियौता बड्डा जां बुरा आ। दाऊदै अपड़ै पापा किना पश्चाताप केया जां परमेश्वरै तेसैरा पाप माफ करि दित्ता। फिरी दाऊदै अपड़ी बाकि जिन्दगिरै बुरै हालाता मझ बि परमेश्वरा पनि विश्वास केया जां तेसैरै हुक्मेरा पालन केया।

ऐन्हां पापा केरी वजाहि सिंउ दाऊदेरा पुत्र मरी गिया। ऐनि हिसाबै परमेश्वरै दाऊदानि सजा दित्ती। ऐठणीरै अलावा, दाऊदा मरना तेईनी, तेसैरै अपड़ै परिवारेरै कुछ मैहणुवें तेसैरै खिलाफ लड़ाई की, जां दाऊद ताकती बतै कमजौर भूंता गिया। पण दाऊद परमेश्वरै सामणै विश्वासयोग्य बणी ना रिय्हा, फिरी बि परमेश्वर अपड़ै वायदै पन कायम रिय्हा। तैठां किना बाद, दाऊदैरा जां बतशेबायरा दुवां पुत्र पेईदा भुवा, जां तैन्हैं तेसैरू नाँ सुलैमान रखु।