18. योकिया मझ बंडियोरा प्रदेश- कहानी

दाऊद राजै चाहिया साला तेईनी राज केया। फिरी सै मरि गिया, जां तेसैरै पुत्रै सुलैमानै इस्राएल देशा पन राज काना शुरू करि दित्ता। परमेश्वरै सुलैमाना सिंउ बात-चीत की जां तैस किना पुच्छु कि,”तु कितु चांहथा कि आंउ तिंडै तेईनी करिया। सुलैमानै परमेश्वरा किना मग्गु कि सै तेस बड़ै बुद्धीमान बंणा दिया। ऐकैई गल्लै शुणी करी परमेश्वर बड़ा खुश भुवा, ऐठणीरै तेईनी परमेश्वरै सुलैमान संसारा मझ सभनियां जादा बुद्धीमान मड़द बंणा दित्ता। सुलैमानै बड़ी सारी गल्लै शिख्री जां सैक्या अक बुद्धीमान राजा बंणि गिया जां परमेश्वरै सैक्या बड़ा अमीर मैहणु बंणा दित्थिया।

यरूशलेम शहरा मझ सुलैमानै सैक्या मंदिर बंणा जेसैरी योजना तेसैरै बाबै दाउदै बंणाउरी थी जां तेस मंदिरा बंणाणेरै तेईनी समान किट्ठा कियौरा थ्या। अबै मैहणु मिलाप बाऐ तम्बुरी जगाय किना तेस मंदिरा मझ परमेवरैरी भक्ति करींथ्यै जां बलिदान चढ़ाईंथ्यै। परमेश्वर तेस मंदिरा मझ जां अपड़ै मैहणुवां सेईतै रिहींथ्या।

पण सुलैमान होरनियां दैशेरी जनेनियां सिंउ प्यार करींथ्या। तेनि परमेश्वरेरै हुक्मेरा पालन ना केया जां लगभग 1,000 जनानियां सेईतै ब्याह करी लिया। ऐन्हां मझां बड़ी सारी जनानी होरनियां देशा किना योउरी थी जां ऐपु सेइतै अपड़ै दैवतै बि लैई थ्यै अंणौरै जां तैन्हेरी भक्ति करियां करींथी। जेख्णी सुलैमान बुढा भौ गिया ता तेनि बि तैन्हां केरै दैवता केरी भक्ति की।

ऐनि वजाहि सिंउ परमेश्वर सुलैमाना पन गुस्सै भुवा। परमेश्वरै बोलु कि मूं तिंडै मरना किना बाद इस्राएल देश दुवां हिस्सा मझ बंडि दींणा।

सुलैमाना मरना किना बाद, तेसैरा पुत्र रहबाम तैस देशैरा राजा बंणी गिया। रहबाम अक नासमझ मैहणु थ्या। इस्राएल देशेरै सारै मैहणु किट्ठै भुवै जां तैन्हैं अक फैसला लिया कि सेहै असैड़ा राजा बणियां। फिरी सै रहबामा किनि सुलैमानेरी शिकायत करी बोलणा लगै, “तिंडै बाबै सुलैमानै असुवां किना बड़ी मजूरी करवाउरी थी जां मतै सारै कर बसूल करींथ्या। तैन्हैं रहबामा सिंउ विंनति की कि असेड़ा कम घट कर।”

पण रहबामै तैन्हांनि नासमझी बा जवाब दित्ता जां बोलु कि, “तुवै बौलतै अत्तै कि मिंडै बाबै तुहां किना बड़ी तकड़ी मजूरी करावाई। पण मूं तुहां किना तैठां किना बि बड़ी तकड़ी मजूरी करांणी, जां मूं तुवै तैठां बि जादै दुखी कांनै।”

जेख्णी मैहणुवें सै ऐहीं बौलता शुणा, ता तैन्हां मझां दसा गौत्रा केरै मैहणु तेसैरै खिलाफ थ्यै, सिर्फ दो गौत्र तेस सिंउ सेहमत थ्यै। ऐ दो गौत्र यहूदेरा प्रदेश बंणी गिया।

बाकि दशै गोत्रै यारोबाम नाँईयेरा अक मड़द अपड़ा राजा बंणा लिया। ऐ गौत्र देशेरी उत्तरी दिशाय मझ थ्यै। तैन्हैं तैस इलाकेनी जां अपांणैनी इस्राएलैरा प्रदेश बोलु।

पण यारोबामै परमेश्वरेरै खिलाफ बगावत की जां मैहणुवां किना पाप करवा। तेनि अपड़ै मैहणुवां केरै जरियै भक्ति कांनेरै तेईनी दो मूर्ती बंणाई। सैक्यै अबै यहूदेरै प्रदेशा यरूशलेम शहरा मझ परमेश्वरेरै मंदिरा मझ तेसैरी भक्ति कांनेरै तेईनी ना गियै।

यहूदा जां इस्राएल योकिया केरै दुश्मण बंणी गियै जां योकिया केरै खिलाफ लड़ाई कांना लगै।

इस्राएल देशैरै नवें प्रदेशा मझ, जैत्थरै बि राजै यै सै सारै बुरै थ्यै। मतै सारै राजै तैन्हां होरनियां इस्राएली मैहणुवां केरै जरियै मारै गियै जै राजा बणना चाहथै थ्यै।

इस्राएल देशैरै सारै राजै जां मतै सारै मैहणुवें मूर्तिया केरी भक्ति की। जेख्णी तैन्हैं ऐहीं कियु, ता तैन्हैं ज्यादातर वैश्या सेईतै नाजायज रिश्ता रखा, जां यो तेईनी कि मतै बारी मूर्तिया केरै सामणै बच्चा केरी बलि बि की।

यहूदा प्रदेशेरै राजै, दाऊदेरै वंशेरै थ्यै। ऐन्हां राजा मझां किछ भलै मैहणु थ्यै जैन्हैं ईमानदारी सिंउ राज केया जां परमश्वरेरी भक्ति की। पण यहूदा प्रदेशेरै मतै सारै राजै बुराई करी- करी राज केया जां मूर्तिया केरी भक्ति की। तैन्हां मझियें कुछ राजै झूठा दैवता केरै तेईनी अपड़ै बच्चा केरी बलि चाढ़ी। यहूदा प्रदेशेरै मतै सारै मैहणुवें परमेश्वरेरै खिलाफ बगावत की जां होरनियां दैवता केरी भक्त की।