19. भविष्यवक्ता (परमेश्वरेरी तरफों बोलणै बा)- कहानी

परमेश्वर हमेशा इस्राएलिया किनि भविष्यवक्ता भेईजता रिहींथ्या। भविष्यवक्ता परमेश्वरेरै संदेश शुणी करी मैहणुवंनी शुणांईथ्यै।

जेख्णी अहाब इस्राएल देशैरा राजा थ्या ता तैस टैंमा एलिय्याह भविष्यवक्ता थ्या। अहाब अक बुरा मैहणु थ्या। तेनि झूठै बाल दैवतेरी भक्ति कांनानि मैहणु मजबूर करी दित्तै। ऐठणीरै तेईनी एलिय्याहे अहाब राजै सिंउ बोलु कि परमेश्वर तैन्हां मैहणुवंनी सजा दींणार आ। तेनि तैस सिंउ बोलु, “जेख्णी तेईनी आंउ झड़ि पूंणेरै तेईनी ना बोलूं तियो तेईनी इस्राएल देशा मझ झड़ि ना पूंणी जां ना ऐ औश पूंणी।“ ऐनि गल्लै ला अहाब राजै बड़ा गुस्सा या जां तेनि एलिय्याह मारी छडणैरा फैसला लिया।

ऐठणीरै तेईनी परमेश्वरै एलिय्याह सिंउ बोलु कि तु बणां मझ गहि करी छपि बेश, केइनी कि अहाब राजा ताउ मांनेरी ताकि मझ आ। एलिय्याह ऐस गल्लै शुणि करी बणां मझ तैस सुदली किनि गिया जेठि गांहणेरै तेईनी परमेश्वरै तैसनि बोलोरू थियु। कईयै हर रौज भ्यगा जां सन्नहीं एलिय्याहनि रोट्टी जां मीट लै आईछींथ्यै। अहाब राजा जां तेसैरै सैनिक एलिय्याहै तौपतै थ्यै, पण तैन्हेरै बोलै सै ना तोपिया। थोड़ी धियाड़ी बाद झड़ि ना ऐईंणेरी वजही सिंउ सैकेई सुदल शुकि गैई।

तां एलिय्याह नीड़ियें एकि देशानि चलि गिया। तैस देशा मझ अक गरीब विधवा थी जेसैरा अक पुत्र थ्या। अकाल पूंणेरी वजही सिंउ तैन्हां किनी लगभग दुवां त्रियां धियाड़िरा राशन थ्या बचौरा। सै दो जंणै थोड़ै धियाड़ी ऐ अपड़ु पैट भरि करी जींतै रैय्ही सकींथ्यै। पण फिरी बि तेनि जनेनी एलिय्याहेरी तैस टैंमा मजत की। ऐठणीरै तेईनी परमेश्वरै तैन्हेरै घड़ै मझियुं अट्टु जां कुप्पिया मझियां तैल मुकणा ना दित्ता। पूरै अकाला मझ बि तैन्हांनि राशनेरी कोई कमि ना भुई जां एलिय्याह तेठि कुछ साल रिय्हा।।

साढ़ै त्रियां साला बाद, परमेश्वरै एलिय्याह सिंउ बोलु कि मूं फिरी झड़ि भेईजणी तु इस्राएल देशानि वापस गा, जां अहाब राजै सिंउ मिल। ऐठणीरै तेईनी एलिय्याह अहाब राजै किनी गिया, जेख्णी अहाब राजै सै लधा ता तेनि बोलु, “अच्छा तु आ, मुसीबत पेईदा कांने बा! तु सच्चै सर्वशक्तिमान यहोवा पमेश्वरा छडि करी मामूली बाल देवतैरी भक्ति काता।” तेख्णी अहाब राजै सारै इस्राएली मैहणु शदाय जां सैक्यै सारै मैहणु कर्मेल पहाड़ा पनि किट्ठै कियै।

सारै इस्राएली मैहणुवां समैत जां बाल दैवतेरै 450 भविष्यवक्ता कर्मेल पहाड़ा पनि किट्ठै कियै। एलिय्याहै मैहणूवां सिंउ बोलु, “केख्णी तेईनी तुवै अपड़ै पापा किना मंन फिरालै? जै यहोवा परमेश्वर आ तेसैरी भक्त करा। अगर बाल परमेश्वर आ ता तेसैरी भक्ति करा।”

तां एलिय्याहै बाल दैवतेरै भविष्यवक्ता सेईतै बोलु, “एकि जानवरेरी बलि करि-करी तेसैरू मास बलिदान कांनेरै तेईनी वेदी पनि रखा, पण आग मेईं लांतै। तेठां बाद मूं बि तिहीयें कांनु, जां एकि अलग वेदी पन तैस मासा रखैला। तेख्णी अगर परमेश्वर वेदी पनि आग सुटैला तां तुहां पता लगि गांहणा कि सै सच्चा परमेश्वर आ।” तां बालेरै भविष्यवक्तै अक बलि वेदी पनि रखी पण आग ना लाय।

तां बाल देवतेरै भविष्यवक्तै बाला किना प्रार्थना की, “हे बाल देवता, असैड़ी शुण!” पूरी धियाड़ी तैन्हैं प्रार्थना की जां जौरै-जौरै चिंडै दींणा लगै जां यो तेईनी कि तैन्हैं अपांणा बि चाकु ला बढि दित्ता, पण बाल देवतै तैन्हैरी ना शुणी, जां तेनि कोई आग ना सुट्टी।

पूरी धियाड़ी प्रार्थना कांना किना बाद बाल देवतेरै भविष्यवक्तै प्रार्थना कांनी बंद करि दित्ती। तैठां किना बाद जेख्णी एलिय्याहै होरै जानवरेरू मास वेदी पन रखि दित्तु, फिरी तेनि मैहणुवां सिंउ बोलु, बड़ै-बड़ै भांडै पांणी ला भरा जां ऐस बलिदना पनि तियो तेईनी डोलतै रिय्हा ज्यो तेईनी मास, छिड़ी जां वेदिरै चोउवो पासैरी जमीन धिकि ना गांहथी।

फिरी एलिय्याहै प्रार्थना की, “हे यहोवा, अब्राहम, इसहाक, जां याकूबेरै परमेश्वर, असुनि लुहा कि तु इस्राएलेरा परमेश्वर आ जां ऐ कि आंउ तिंडा दास आ। हे यहोवा परमेश्वर मिंडि शुण, ताकि ऐन्हां मैहणुवां पता लगि गहिया कि तु ऐ सच्चा परमेश्वर आ।”

तिहिंयो इकदम, असमांणा किना आग छुड़खी जां तेनि मास, छिड़ि, घौड़, मिट्टी समैत सब किछ फुकि दित्तु जां वेदिरै चोउवो पासै जै चिक्खर थी सै सारी फुकि छडि। जेख्णी मैहणुवें ऐ सभ किछ हैरू, ता सैक्यै जमीनी पनि जेणुवां केरै भारै पैई करी बोलणा लगै, “यहोवा ऐ परमेश्वर आ! यहोवा ऐ परमेश्वर आ!”

तां एलिय्याह बोलणा लगा, “बाल देवतेरा अक बि भविष्यवक्ता बचि ना सकिया!” ऐठणीरै तेईनी मैहणुवें बालेरै भविष्यवक्तै पकड़ी करि तैन्हां तेठां किना अलग लै गियै जां सैक्यै मारी छडै।

तां एलिय्याहै अहाब राजै सिंउ बोलु, “छुईं-छुईं अपड़ै घरैनि नशी गा, केईनि कि झड़ी पूंणारी आ।” थोड़ी देर बाद अम्बर बिल्कुल काआ भौ गिया जां भयांकर झड़ी पूंणी शुरू भौ गैई। यहोवा परमेश्वरै सैकेई शुहाई मुका दित्ती जां ऐ साबित करि दित्तु कि सेहै सच्चा परमेश्वर आ।

जेख्णी एलिय्याह अपड़ा कंम पूरा करि बेठा, फिरी परमेश्वरै एलीशा नाँईयेरा अक मड़द चुणी लिया। परमेश्वरै एलीशायरै जरियै मतै चमत्कार कियै। अक चमत्कार नामान नाँईयेरै अकि मैहणु सेईतै भुवा। सै एकि दुश्मणेरी सेनायरा सरदार थ्या, जां तैसनि कौढ़ थ्या। नामाने एलीशेरै बारै मझ शुणोरू थियु, ऐठणीरै तेईनी सै एलीशाय किनी या जां तेनि तैस किना ठीक भूंणैरी अरदास की। एलीशाय नामान कोढ़ी सिंउ बोलु कि गहि करी यरदन नदी मझ सत्त बारी डुबकी मार।

नामान ऐस गल्लै पन गुस्सै भौ गिया। तेनि ऐहीं काना किना नंमा करि दित्ता, केईनी कि तैसनि विश्वास ऐ ना थ्या भूंता कि ऐहीं काने ला सै ठीक भौ सकता, तैसनि ऐ मूर्खताय बाई गल्ल लगी। पण बाद मझ तेनि अपड़ा मंन बदलि दित्ता जां गहि करी यरदन नदी मझ सत्त बारी डुबकी मारी। जेख्णी सै सत्तवीं डुबकी मारी करी पांणी मझां भेईर निकौथा ता परमेश्वरै सैक्या कौढ़ेरी बिमारी किना बिल्कुल ठीक करी दित्ता।

परमेश्वरै ऐनि हिसाबै इस्राएली मैहणुवां किनि मतै सारै भविष्यवक्ता भेईजै, जां तैन्हां मैहणुवां सिंउ बोलु कि मूर्तिया केरी भक्ति कांनी बंद करि दिया, जां होरनियां मैहणुवां सिंउ खरा बर्ताव जां दया कातै रिय्हा। तैन्हैं भविष्यवक्तै मैहणुवंनी चेतावनी दित्ती कि बुरै कंम कानै छडि देया जां परमेश्वरेरै हुक्मेरा पालन करा। फिरी ऐ बि बोलु, “जै तुवै ऐहीं ना करेलै ता परमेश्वरा तुवै दोषी समझी करी तुवाड़ा न्याय कांना जां तुहांनि सजा दींणी।”

बड़ै बारी मैहणुवें परमेश्वरेरै हुक्मेरा पालन ना केया, जां घड़ि-घड़ि तैन्हैं भविष्यवक्ता सिंउ बुरा बर्ताव केया, जां यो तेईनी कि केख्णी-केख्णी ता सै मारी बि छडै। अक बारी, तैन्हैं यिर्मियाह भविष्यवक्ता शुक्कै कुवें मझ सुटि दिता जां सैक्या तेठि मरनानि छडि छडा। कुवें मझ पाणी ना थियु सिर्फ चिक्खर थी यिर्मियाह तैस चिक्खरै मझ फसि गिया। पण राजै तैस पन दया यैई जां तेनि अपड़ै सेवकानि हुक्म दित्ता कि यिर्मियाह मरना किना पेहिलै तैस कुवें मझां भेईर छिकि लिया।

भविष्यवक्तै परमेश्वरेरै बारै मझ मैहणुवंनी लगातार बोलतै रिय्है चाहे मैहणु तैन्हां सिंउ नफरत कातै थ्यै। तैन्हैं मैहणुवंनी चेतावनी दित्ती कि अगर तुवै अपड़ै पापा किना पश्चाताप ना करेलै ता परमेश्वरा तुवाड़ नाश करी दींणा। तैन्हैं मैहणुवंनी परमेश्वरेरा सैक्या वायदा याद करवा कि मसीह छुईं ऐईंणै बाआ।