20. बंधुआई (यानि गुलामी जां वापसी)- कहानी

इस्राएल देशै जां यहूदा देशै परमेश्वरेरै खिलाफ पाप केया। तैन्हैं तैस वायदेरा पालन ना केया जै परमेश्वरै तैन्हां सेईतै सीनै पहाड़ पर्वता पनि कियौरा थ्या। परमश्वरै बड़ै सारै भविषयवक्ता भेईजै कि सैक्यै तैन्हांनि चेतावनी दिया जा सैक्यै मैहणु अपड़ै पापा कना पश्र्चाताप किरिया जां परमेश्वरेरी आराधना करिया। पण तैन्हैं भविष्यवक्ता केरी गल्लै मनणा किना नंमा करि दित्ता।

तां फिरी परमेश्वरै तैन्हां दोईयो देशानि सजा दित्ती जां तैन्हेरै दुश्मणानि इजाजत दित्ती कि सै तैन्हां दोईयो देशा नाश करी दिया। अश्शूर देश अक ताकतवर देश थ्या, सैक्यै होरनियां देशा केरै प्रति बड़ै निर्दयी थ्यै। तैन्हैं आईछी करी इस्राएल देशैरा नाश करी दित्ता, जां अश्शूरी मैहणुवें इस्राएल देशैरै मतै सारै मैहणु मारी छडै, तैन्हेरी सारी चीजै लुटि नी, जां इस्राएल देशैरै मतै सारै इलाकै फुकि छडै।

अश्शूरी मैहणुवें इस्राएल देशैरै सारै अगुवे, अमीर मैहणु जां कारीगर मैहणु किट्ठै कियै जां सै तैन्हां अश्शूर देशानि लै गियै। इस्राएल देशा मझ सिर्फ कुछ गरीब इस्राएली मैहणु ऐ बचौरै थ्यै।

फिरी अश्शूरी मैहणुवें इस्राएल देशा मझ रींहणेरै तेईनी विदेशी मैहणु लै अंणै। तैन्हैं विदेशी मैहणुवें इस्राएल देशैरै नाश कियौरै शहर फिरी बसाय लियै। जै इस्राएली मैहणु बचौरै थ्यै तैन्हां सिंउ अश्शूरी मैहणुवें ब्याह करी लियै। ऐन्हैरा जै वंश भुवा तैन्हांनि सामरी नाँ दी दित्तु।

यहूदा देशैरै मैहणुवें हैरू कि किहीं परमेश्वरै तैस पन विश्वास ना कानेरी वजहि सिंउ जां तेसैरै हुक्मेरा पालन ना कानेरी वजहि सिंउ इस्राएल देशैरै मैहणुवंनी सजा दित्थी। पण फिरी बि तैन्हैं कनानी मैहणुवां केरै दैवता केरी भक्ति की। परमेश्वरै तैन्हांनि चेतावनी दींणेरै तेईनी भविष्यवक्तै भेईजै, पण तैन्हैं तैन्हेरी गल्लै अशुणी करि दित्ती।

अश्शूरी मैहणुवां केरै जरियै इस्राएल देशैरा नाश काना किना लगभग 100 साल बाद, परमेश्वरै बेबीलोन देशैरा राजा नबूकदनेस्सर यहूदा देशा पन हमला कानेरै तेईनी भेईजा। बेबीलोन देश अक ताकतवर देश थ्या। यहूदा देशैरा राजा नबूकदनेस्सरेरा दास बंणी करी हर साल मत्ती धन-दौलत दींणेरै तेईनी राजी भौ गिया।

पण कुछ साल बाद, यहूदा देशैरै राजै बेबीलोन देशैरै खिलाफ बगावत की। बेबीलोन देशैरै मैहणुवें फिरी वापस आईछी करी यहूदा देशा पन हमला करि दित्ता। तैन्हैं यरूशलेम शहरा पन कब्जा करी लिया, मंदिर नष्ट करी दित्ता जां शहरैरा जां मंदिरैरा खजाना लुटि करी लै गियै।

बेबीलोन देशैरै खिलाफ बगावत कानेरी वजहि सिंउ यहूदा देशैरै राजैनि सजा दित्ती जां नबूकदनेस्सरेरै सैनिकै तेसैरा पुत्र मारी छडा जां तेठां बाद राजा अंधा करि दित्ता। तेठां बाद, सैक्यै राजै लै गियै ताकि सै बेबीलोनेरी जैल्ही मझ मरी गहिया।

नबूकदनेस्सर जां तेसैरी सैनाय यहूदा देशैरै लगभग सारै मैहणु बेबीलोन देशानि लै नियें, सिर्फ तैस देशैरै गरीब मैहणु छडि दित्तै ताकि सै खेती बाड़ी करि-करी फसल बईया। ऐस दोरानेरै टैंमानि बंधुआई यानि देश निकाला नाँ दियु जैस मझ परमेश्वरेरै, मैहणु वायदेरै देशा किना निकोहि गांहणेरै तेईनी मजबूर केईथ्यै।

बेशक परमेश्वरै अपड़ै मैहणुवंनी तैन्हेरै पापा केरै तेईनी सजा दित्ती, तैन्हैरा देश निकाला भूंणा किना बाद बि, परमेश्वर तैन्हां जां अपड़ै वायदै ना थ्या भुलोरा। परमेश्वर लगातार अपड़ै मैहणुवां तकांता रिय्हा, जां अपड़ै भविष्यवक्ता केरै जरियै तैन्हां सेईतै गल्लै काता रिय्हा। परमेश्वरै वायदा केया कि, 70 साल बाद सैक्यै फिरी वायदेरै देशा मझ वापिस ऐईलै।

लगभग 70 साला बाद, कुस्रु जै फारस देशैरा राजा बणा, तेनि बेबीलोन देश हारा दित्ता, ऐठणीरै तेईनी बेबीलोन देशेरी वजाय फारस देशै केहिया देशा पनि राज केया। इस्राएली मैहणुवंनी अबै यहूदी बोलींथ्यै। जां तैन्हैं अपड़ी सारी जिन्दगी बेबीलोन देशा मझ कट्टी। सिर्फ कुछ पुरांणै यहूदी मैहणुवां यहुदा देश याद रिय्हा।

फारसी मैहणु बड़ै सामर्थी थ्यै, पण तैन्हैं हारोरै मैहणुवां पन दया की। फारसी मैहणुवां केरा राजा बणना किना कुछ टैंम बाद, कुस्रु अक हुक्म दित्ता कि कोई बि यहूदी जै यहूदा देशानि गांहणा चांहथा ता सै फारस देशा छडि करि यहूदा देशानि वापिस गहि सकता। तेनि तैन्हांनि मंदिर बणांणेरै तेईनी धन-दौलत बि दित्ती, गुलामिरै 70 साल बाद, यहूदी मैहणुवां केरी अक टोली यरूशलेम शहरानि वापिस चलि यैई।

जेख्णी यहूदी मैहणु येरूशलेम शहरा मझ पुज्जै ता तैन्हैं मंदिर जां शहरेरी चोउवो पासेरी कंथि फिरी दुबारै बंणाय। फारसी मैहणु हालै तेईनी बि तैन्हां पन राज करींथ्यै, पण अक बारी फिरी सैक्यै वायदै बाऐ देशा रींहथै थ्यै जां मंदिरा मझ आराधना कातै थ्यै।