21. परमेश्वर मसीहरै ऐईंणैरा वायदा काता- कहानी

जेख्णी परमेश्वरै संसारैरी रचना की, ता तैस पता थ्या कि तैस बाद मझ अक धियाड़ी जरूर मसीह भेईजणा पूंणा। तेनि आदमा जां हव्वाय सिंउ वायदा केया कि तैस ऐहियें कांनु। परमेश्वरै बोलु कि हव्वाय किना एकि मैहणु जन्म लींणा जैस कीड़ैरू मुंडक प्रिंचि छडणु। जेनि कीड़ै हव्वाय किना धौखै मझ सै फल खलाईथ्यु सै बिल्कुल शैतान थ्या। परमेश्वरेरै वायदेरा मतलब ऐ थ्या कि मसीह पूरी तराहि सेईतै शैतान हारियांणी दींणा।

परमेश्वरै अब्राहमा सेईतै वायदा कियौरा थ्या कि तेसैरै जरियै संसारेरिया सारिया जातियानि आशीष मेईंणी। परमेश्वरा अक धियाड़ि मसीह भेईजी करि ऐक्या वायदा पूरा कांना। सैक्या मसीह संसारेरी सारिया जातिया केरै मैहणुवां तैन्हेरै पापा किना बचाला।

परमेश्वरै मूसै सिंउ वायदा कियौरा थ्या कि ऐईंणै बाऐ टैंमा मझ मूसै सैयि अक होरा भविष्यवक्ता भेईजेला। ऐ भविष्यवक्ता मसीह भूंणा। ऐनि हिसाबै, परमेश्वरै फिरी वायदा केया कि सै मसीह भेईजैला।

परमेश्वरै दाऊद राजै सेईतै वायदा कियौरा थ्या कि तेसैरै वंशा मझां अक मसीह भूंणा। सेहै राजा भूंणा जां परमेश्वरेरै मैहणुवां पनि महेशा तेईनी राज करैला।

परमेश्वरै यिर्मियाह भविष्यवक्ता सेइतै गल्ल की जां बोलु कि अक धियाड़ि तैस नवाँ वायदा कांना। पण सै तैस वायदै सैयि ना भूंणा जै परमेश्वरै इस्राएली मैहणुवां सेईतै सीनै पहाड़ा पनि कियौरा थ्या। जै नवाँ वायदा मूं तैन्हां धियाड़िया मझ तैन्हां सिंउ कांना, सै ऐ आ कि आंउ अपांणा तैन्हां पन प्रकट करेला।हर मैहणु तैस सेईतै प्यार रखेला जां तेसैरै नियमा केरा पालन कांनेरी इच्छा रखेला। परमेश्वरै वायदा केया कि आंउ तैन्हेरै दिल्ला पनि लिखेला कि सैक्यै मिंडै मैहणु भौलै, जां सै परमेश्वरा जांणेलै जां परमेश्वर तैन्हेरै पाप माफ करेला। सेहै मसीह भूंणा जै तैन्हां सेईतै तैस नवें वायदै करेला।

परमेश्वरेरै भविष्यवक्तै ऐ बि बोलु कि मसीह अक भविष्यवक्ता भूंणा। अक भविष्यवक्ता सै मैहणु आ जै परमेश्वरेरै वचन शुणता जां फिरी परमेश्वरेरा संदेश मैहणुवंनी शुणांता। जैस भेईजणैरा परमेश्वरै वायदा कियौरा थ्या सैक्या मसीह अक सिद्ध भविष्यवक्ता भूंणा। मतलब तैस मसीह परमेश्वरेरा संदेश शुणना जां मैहणुवंनी सै संदेश अच्छी तराहि सिंउ शिख्रांणा।

इस्राएली याजकै मैहणुवां केरै पापा केरै तेईनी परमेश्वरानि बलिदान चाढ़नै जारी रखै। ऐ बलिदान मैहणुवां केरै पापा केरै तेईनी परमेश्वरेरी सजाय किना बचणेरै तेईनी चाढ़ींथ्यै। याजकै मैहणुवां केरै तेईनी प्रार्थना बि की। पण, सैक्या मसीह सिद्ध महायाजक भूंणा जै संसारेरै मैहणुवां केरै पाप ऐपु पनि लै करि अपांणा परमेश्वरानि दींणेरै तेईनी बलिदान करेला। मतलब, तैस कदि पाप ना काना, जां जेख्णी सै अपांणा बलिदान कांनेरै तेईनी दी दैला, ता संसारैरा मैहणुवां केरै पापा केरै तेईनी कोई बि बलिदान जरूरी ना भूंणा।

राजा सै भूंता जै मैहणुवां पन राज काता, जां मैहणुवां केरा न्याय काता, जां कदि- कदि सै गलती कातै। दाऊद राजै सिर्फ इस्राएली मैहणुवां पन राज केया, पण दाऊद राजेरा वंश मसीह पूरै संसारा पन राज करेला। सै हमेशा तेईनी राज करेला, हमेशा सच्चाई सिंउ न्याय करेला जां सही फैसला करेला।

परमेश्वरेरै भविष्यवक्तै मसीहरै बारै मझ बड़ि जादा भविष्यवांणी कियोरी थी। उदाहरणेरै तेईनी, मलाकी नाँईयेरै भविष्यवक्तै अपड़ि किताबी मझ बोलोरू थियु कि मसीहरै ऐईंणा किना पेहिलै अक भविष्यवक्ता ऐईला। सै मसीहरै ऐईंणेरै तेईनी मैहणुवां केरै मंना तियार करेला।ऐठणीरै अलावा, यशायाह भविष्यवक्तै अपड़िया किताबिया मझ लिखोरू आ कि मसीह ऐकि कुवांरी छोकरी किना जन्म लींणा। जां मीका भविष्यवक्तै बि अपड़िया किताबिया मझ जिक्र केया कि मसीह बैतलहम ग्राँईया मझ जन्म लैला।

यशायाह भविष्यवक्तै ऐ बि लिखु कि मसीह गलील प्रदेशेरै इलाकै मझ वास करेला। जै मैहणु बड़ै दुखी अत्तै मसीह तैन्हांनि शांति दैला। सै केईदिया बि आजाद करेला। मसीह बिमार मैहणुवां जां जै टांउणै अत्तै जां जै कांणै अत्तै, जै टट्टै अत्तै या जै लट्टै अत्तै तैन्हां बि ठीक करेला।

यशायाह भविष्यवक्तै ऐ बि लिखु कि मैहणुवां मसीह सिंउ नफरत कांनी जां तैन्हां सैक्या ना मंनणा। होरनियें भविष्यवक्तै बि बोलु कि मसीहरा अक साउगी तेसेरै खिलाफ भूंणा जां तैन्हां तेसेरै लिकड़ा केरै तेईनी जुआ खेलणा। जकर्याह भविष्यवक्तै बि अपड़ि किताबिया मझ लिखोरू आ कि मसीहरै ऐकि साउगी होरनियां मैहणुवां किना चांदिरै सिक्कै लींणै जां सै पकड़वा दींणा जां मारी छडवांणा।

भविष्यवक्तै ऐ बि बोलोरू आ कि मसीह किहीं मरनु। यशायाहै भविष्यवाणी की कि मैहणुवां मसीह पन थुकणु, तेसैरा मजाक उडांणा, जां सै चुथणा। तैन्हां सैक्या घ्रुंचि करी बिन्हीं दींणा जां तैस बड़ा भारी दुख जां कष्ट सैहन करि करी मरि गांहणु, जबकि तेनि किछ बि गलत ना कियोरू।

भविष्यवक्तै ऐ बि बोलु कि मसीह महान भूंणा जेनि कोई पाप ना भूंणा कियौरा। सै संसारेरै सारा मैहणुवां केरै पापा केरी वजहि सिंउ मारियूंणा। तेसेरै मरने ला परमेश्वरा जां मैहणुवां बिच मेल मिलाप भौ गाहला। ऐठणीरै तेईनी परमेश्वर चांहथा कि मसीह मरिया।

भविष्यवक्तै ऐ बि बोलु कि परमेश्वरा मसीह मौरा मझां जींता कांना। मसीहरी मोऊत जां दुबारै जींतै भूंणु ऐ साबित काता कि संसारेरा मैहणुवां सिंउ नवाँ वायदा कांना परमेश्वरेरी अक योजना थी, ताकि सै संसारेरा मैहणुवां बचा सकिया जैन्हैं तेसेरै खिलाफ पाप कियौरा।

परमेश्वरै मसीहरे बारै मझ भविष्यवक्तानि बड़ी सारी गल्लै शुणाउरी थी, पण मसीह ऐन्हां मझां कौस बि भविष्यवक्ता केरै जीवन काला मझ ना या। ऐन्हां भविष्यवाणियां शुणांणा किना लगभग 400 साल बाद, सही टैंमा पनि, परमेश्वरै मसीह इस संसारा मझ भेईजा।