22. यूहन्ना बपतिस्मा दींणै बाऐरा जन्म- कहानी

पुरांणै टैंमा मझ परमेश्वर अपड़ै मैहणुवां सेईतै स्वर्गदूता जां भविष्यवक्ता केरै जरियै गल्लै करींथ्या। पण तैस टैंमा किना लैकरी फिरी 400 साल बिरतणा तेईनी परमेश्वरै तैन्हां सेईतै गल्ल ना की। तां परमेश्वरै जकर्याह नाँईयेरै भविष्यवक्ता किनी अक स्वर्गदूत भेईजा। जकर्याह जां तेसैरी लाड़ी इलीशिबा परमेश्वरैरा आदर करींथ्यै। सैक्यै बड़ै बुढी थ्यै गियौरै, जां तैन्हांनी कोई बि आउलाद ना थी भोरी।

अक धियाड़ी जकर्याह अपड़ी मंडली सेईतै परेश्वरेरै सामणै याजकेरा कम काता थ्या। याजका केरी रीतिरै मुताबिक तेसैरै नाँ पनि चिट्ठी निकोथी कि प्रभुरै मंदरा मझ गहि करी धूप जा। धुप जातै टैंमा आराधना कांनारै मैहणुवां केरी सारी मंडली मंदरेरै आंगणा मझ प्रार्थना काती थी। तां तेनि परमेश्वरेरा अक स्वर्गदूत धूप जानै बाई वेदिरै सुमलै पासै खड़ियोउरा लधा। जकर्याह तैस हैरी करी बिजी गिया जां बड़ा डरींणा लगा।पण स्वर्गदूतै तैस सिंउ बोलु, ‘हे जकर्याह, डरै मेईं केईनी कि परमेश्वरै तिंडी प्रार्थना शुणी लियौरी आ, जां तिंडी लाड़ी इलीशिबाय किना तिंडै तेईनी अक पुत्र पेईदा भूंणा, जां तु तेसैरू नाँ यूहन्ना रखै। तेसैरै पेईदा भूंणै ला तुवै ता खुश भौ गांहणै, पण होरनियां मैहणुवां बि खुश भौ गांहणु। तां जकर्याहै स्वर्गदूता किना पुच्छु, “ऐस गल्लै आंउ किहीं सच्ची मनि लियुं, केईनी कि आंउ जां मिंडी लाड़ी ता बड़ै बुढै भौ गियौरै अत्तै।“

तेनि स्वर्गदूतै जकर्याहैनि जवाब दित्ता, “मिंडु नाँ जिब्राईल आ, जै परमेश्वरेरै सामणै खड़ा रींहथा। परमेश्वरै आंउ ताउ किनी ऐक्या शुभ संदेश शुणांणेरै तेईनी भेईजौरा। तका जेउ तेईनी ऐ गल्लै पूरी ना भौ गाहली, तेउ तेईनी तु टट्टा रींहणा जां किछ बि बिचारी ना सकता, केईनी कि तीं मिंडी गल्ला केरा विश्वास ना केया, जै कि अपड़ै टैंमा पनि पूरी भूंणी।” जै मैहणु मंदरेरै आंगणा मझ जकर्याह भातै थ्यै सै सौचणा लगै जकर्याह मंदरा मझ यौउती देर कितु काता? जेख्णी सै भेईनी या, ता सै तैन्हांनि इशारा मझ बोलणा लगा, केईनी कि तेसैरी जुबान बंद थी सै बिचारी ना सकींथ्या, सै सभ मंदरा भेईर खड़ियोरै मैहणु बुझि गियै कि मंदरा मझ जरूर ऐसनी कोस्केरै दर्शन भुवै।जेख्णी तेसैरी सेवा कांनेरी धियाड़ी पुरी गेई, तां जकर्याह यरूशलेम शहर छडी करी अपड़ै घरैनि वापस चलि गिया। कुछ धियाड़ी बाद तेसैरी लाड़ी इलीशिबा दुपराणी भुई; पण पंज महीनै सै अपड़ै घरै रैहि। जां सै अपड़ै मंना मझ सौचणा लगी कि, “मैहणुवां मझ मिंडी बदनामी दूर कांनेरै तेईनी, परमेश्वरै ऐन्हां धियाड़िया मझ मूं पन दया की।”

जेख्णी इलीशिबाय छट्ठा महीना लगा, तां परमेश्वरै जिब्राईल स्वर्गदूत, गलील प्रदेशेरै नासरत शहरा मझ, मरियम नाँईयेरी एकि कुँवारी छोकरी किनि भेईजा; मरियमेरी मगणी यूसुफ नाँईयेरै एकि मैहणु सिंउ भौ थी गियौरी, जै कि राजै दाऊदेरै खनदानेरा थ्या। स्वर्गदूतै तैस किनी गहि करि बोलु, “मरियम ताउनी मिंडा नमस्कार। ताउ पनि परमेश्वरैरी दया भौरी आ जां सै ताउ सेईतै आ।” स्वर्गदूतेरी ऐसै गल्लै शुणी करी मरियम डरी गैई, जां सौचणा लगी कि ऐस गल्लैरा कितु मतलब आ?स्वर्गदूतै तेस सिंउ बोलु, “हे मरियम; डरै मेईं, केईनी कि परमेश्वरेरी दया ताउ पन भौरी आ, जां शुण, “तु दुपराणी भूंणी, ताउ अक पुत्र पेईदा काना; तु तेसैरू नाँ यीशु रखै। सै महान भूंणा, जां परम प्रधान परमेश्वरैरा पुत्र भूंणा जां हमेशा तेईनी राज करैला।”

तां मरियम स्वर्गदूता सिंउ बोलणा लगी, “ऐ किहीं भौ सकतु, केईनी कि आंउ ता कुँवारी आ?“ स्वर्गदूतै तैसनी जवाब दित्ता, “पवित्र आत्मा जां तेसैरी सामर्थ ताउ पनि बंणी रींहणी; ऐठणीरै तेईनी जै बच्चा ताउ किना पेईदा भूंणा, सै पवित्र जां परमेश्वरैरा पुत्र भुंणा।“ जै तेनि स्वर्दूतै बोलु तैस पनि मरियमै विश्वास केया।

ऐ भूंणा किना थोड़ै टैंम बाद, मरियम इलीशिबाय सिंउ मिलणा गैई जिहीं मरियमै तैसनि नमस्कार कियु, तिहीयें बच्चा तेसैरै पैटा मझ उटका, जां इलीशिबा पवित्र आत्माय ला भरी गैई। परमेश्वरै जै किछ तैन्हेरी जिन्दगी मझ कियु तैस हैरी करी बाकी जनेनी बड़ी खुश भुई। त्रा महीनै मरियम इलीशिबाय किनी रैहि करी अपड़ै घरैनि वापस चलि गैई।

ऐठां किना बाद, इलीशिबाय बच्चैनि जन्म दित्ता। जकर्याहै जां इलीशिबाय तैस बच्चैरू नाँ यूहन्ना रखु, जिहीं तेनि स्वर्गदूतै तैस सिंउ बोलोरू थियु। तां परमेश्वरै जकर्याहैनि इजाजत दित्ती कि सै फिरी बिचाना लगी पुईया। जकर्याहै बोलु, परमेश्वरैरी स्तुति भुईया, केईनी कि तेनि अपड़ै मैहणुवां पनि दया की, जां बोलु, ऐ जै मिंडा पुत्र आ सै सर्वशक्तमान परमेश्वरैरा भविष्यवक्ता भूंणा। जां तैस मैहणुवंनी शुणांणु कि किहीं सैक्यै अपड़ै पापा किना माफी प्राप्त करी सकतै!”