23. यीशुरा जन्म- कहानी

यूसुफ नाँईयेरै एकि मैहणु सेईतै मरियमेरी मगणी भौ थी गियौरी। जेख्णी यूसुफै शुणु कि मरियम दुपरांणी आ ता तैस पता थ्या कि सै तेसैरा बच्चा ना। पण, यूसुफ मरियमै बदनाम ना थ्या कांना चांहथा, ऐठणीरै तेईनी तेनि तैस पनि रहम करि-करी चुपचाप छडि दींणैरै बारै मझ सौच-विचार केया। पण ऐहीं कांना किना पेहिलै, एकि स्वर्गदूतै सुपनै मझ आईछी करी तैस सिंउ गल-बात की।

तेनि स्वर्गदूतै यूसुफा सिंउ बोलु, “हे यूसुफ, अबै तु अपड़ी भूंणै बाई लाड़ी मरियमै ऐपु सेईतै रखणा हैरी मेईं डरियै। केईनी कि जै तेसैरै पैटा मझ बच्चा आ सै पवित्र आत्मायरी तरफों आ। तैस एकि पुत्रानि जन्म दींणा तेसैरू नाँ यीशु रखै (जेठणीरा मतलब आ यहोवा बचांणार आ), केईनी कि तैस मैहणु तैन्हैरै पापा किना बचांणै।”

तां यूसुफ निंदर करि-करी बियुझी गिया जां प्रभुरै स्वर्गदूतेरै हुक्मेरै मुताबिक अपड़ी भूंणै बाई लाड़ी मरियमै अपड़ै घरै लै या। जां ज्यो तेईनी मरियमै बच्चैनि जन्म ना दित्ता त्यो तेईनी यूसुफ अपड़ी लाड़ी सिंउ ना झुल्ला।

जेख्णी मरियमैरा लुखियूंणैरा टैंम निड़ी या, तेख्णी औगुस्तुस कैसरै ऐ हुक्म दित्ता कि सारै रोमी सम्राज्येरै मैहणुवां केरी गिणती करियो जां तैन्हेरै नाँ लिखियो। तां मरियम जां यूसुफ बि अक लम्मा सफर करि-करी नासरत शहरेरै यहूदिया प्रदेशा मझ दाऊदेरै शहरा बैतलहम ग्राँईयानि गियै।।

जेख्णी मरियम जां यूसुफ बैतलहम शहरा मझ पुज्जै, तैन्हांनि रींहणेरै तेईनी कोई जगा ना मैई पण सैक्यै तैठि जेठि जानवर रिहींथ्यै तैठि रिय्है। सै जगा थी जेठि मरियमै अपड़ै बच्चैनि जन्म दित्थिया। तेनि सैक्या बच्चा फालड़ी मझ लपैटी करी जानवरा केरी चरनी मझ रखी दित्ता। तैन्हैं तेसैरू नाँ यीशु रखु।

तैस राती, तैठि सेईते एकि पट्टी मझ कुछ पुव्हाल अपड़िया भ्रैडा केरी कन्निरी देखभाल कातै थ्यै। अचानक परमेश्वरैरा अक चमकदार स्वर्गदूत तैन्हां किनी आईछी करी खड़ी गिया जां सैक्यै बड़ै डरी गियै। तां तेनि स्वर्गदूतै बोलु, “डरा मेईं, केईनी कि मूं किनी तुहांनि शुणांणेरै तेईनी बड़ी बधिया खुशखबरी आ। बैतलहम शहरा मझ मसीह, स्वामिरा जन्म भुवा सेहै मसीह प्रभु आ!”

गहि करी तैस बच्चैरी तौप करा, जां तुहां सैक्या बच्चा फालड़ी मझ लपैटौरा चरनी मझ रखौरा मेईंणा। तां अचानक असमांण स्वर्गदूतै ला भरी गिया, सै परमेश्वरैरी स्तुति कातै थ्यै। तैन्हैं बोलु, “सारी महिमा स्वर्गा मझ विराजमान परमेश्वरानि मेईया। धरती पनि तैन्हां मैहणुवां मझ शांति भुईया जैन्हेरी सै चिंता काता!”

तां स्वर्गदूत चलि गियै। सैक्यै पुव्हाल बि अपड़िया भ्रैडा छडि करि तैस बच्चै तकांणा बैतलहम शहरानि चलि गियै। तैन्हैं गहि करी मरियम जां यूसुफ, जां यीशु चरनी मझ झुलौरै तकाय, जिहीं तेनि स्वर्गदूतै बोलौरू थियु। सै बड़ै खुश थ्यै। तां फिरी सैक्यै पुव्हाल तैठां किना अपड़िया भ्रैडा किनि चलि गियै। तैन्हैं जै किछ बि शुणु जां हैरू तैस सारूरै तेईनी परमेश्वरैरी स्तुति कातै थ्यै।

पूर्व दिशाय किना कुछ मड़द यै जैन्हां तारा केरा भैद शुणाणैरा ज्ञान थ्या जां सैक्यै बड़ै बुद्धिमान थ्यै। तैन्हैं अक अदभुत तारा असमांणा मझ लधा। तैन्हैं बोलु कि ऐस तारै लेहिंणैरा मतलब ऐ आ कि यहूदिया केरा अक नवाँ राजा पेईदा भौरा। ऐठणीरै तेईनी तैन्हैं तैस बच्चै तकांणेरै तेईनी अपड़ै दैशा किना यात्रा कांनेरा फैसला केया। लम्मा सफर कांना किना बाद सैक्ये बैतलहम शहरा मझ पुज्जै जां सै तैस घरा मझ यै जेठी यीशु जां तेसैरै माँ-बब बेठौरै थ्यै।

जेख्णी ऐन्हैं मड़दै यीशु अपड़ी मायि सेईतै लधा ता तैन्हैं जेणु टंकी करी तैसनी प्रणाम कियु, जां तेसैरी आराधना की। तैन्हैं यीशुनी कीमती चीजै यानि, सुन्ना, मुर्र, लोबान भेंट चाढ़ी। फिरी सै घरैनि वापस चलि गियै।